കോഴിക്കോട്: എലത്തൂർ മോരിക്കരയിലെ ഇൻഡസ്ട്രിയൽ യൂണിറ്റിൽ 26 വയസ്സുകാരി കൊല്ലപ്പെട്ട കേസിൽ പ്രതി വൈശാഖനെതിരെ നിർണ്ണായകമായ ശാസ്ത്രീയ തെളിവുകൾ പോലീസ് കണ്ടെത്തി (Elathur Murder Case). കൊലപാതകം നടന്ന ജനുവരി 24-ന് രാവിലെ 9.20-ന് “വൈശാഖൻ എന്നെ കൊല്ലും, 16 വയസ്സുമുതൽ ഇയാൾ എന്നെ പീഡിപ്പിക്കുകയാണ്” എന്ന് കാണിച്ച് യുവതി തന്റെ കൗൺസിലർക്ക് സന്ദേശമയച്ചിരുന്നു. താൻ കൊല്ലപ്പെട്ടാൽ അതിന്റെ ഉത്തരവാദി വൈശാഖൻ ആയിരിക്കുമെന്ന് യുവതി സന്ദേശത്തിൽ വ്യക്തമാക്കിയതിന് പിന്നാലെ, ഉച്ചയോടെയാണ് കൃത്യം നടന്നത്. കഴിഞ്ഞ ഒരു മാസമായി പ്രതിയിൽ നിന്ന് അകലാൻ യുവതി ശ്രമിച്ചിരുന്നുവെന്നും ഇതിന്റെ പ്രതികാരമാണ് കൊലപാതകമെന്നും പോലീസ് സ്ഥിരീകരിച്ചു.
യുവതിയെ കൊലപ്പെടുത്താൻ പത്ത് ഉറക്കഗുളികകൾ ജ്യൂസിൽ കലർത്തിയാൽ മതിയെന്ന് പ്രതി ഗൂഗിളിൽ തിരഞ്ഞതായും തെളിവ് ലഭിച്ചിട്ടുണ്ട്. പത്തു ഗുളികകൾ നൽകിയാൽ അപായപ്പെടുമെന്ന വിവരത്തിന്റെ അടിസ്ഥാനത്തിലാണ് പ്രതി ജ്യൂസിൽ മരുന്ന് പൊടിച്ചു നൽകിയത്. മരുന്ന് പൊടിക്കാൻ ഉപയോഗിച്ച ചുറ്റികയും ഗ്ലാസുകളും പോലീസ് കസ്റ്റഡിയിലെടുത്തു. ഒരുമിച്ച് ആത്മഹത്യ ചെയ്യാമെന്ന് യുവതിയെ വിശ്വസിപ്പിച്ച് രണ്ട് കുരുക്കുകൾ തയ്യാറാക്കിയ ശേഷം, യുവതിയെ മയക്കി കെട്ടിത്തൂക്കുകയായിരുന്നു. കൊലപാതകത്തിന് ശേഷം മൃതദേഹത്തെ പ്രതി ലൈംഗികമായി ചൂഷണം ചെയ്തതായും സിസിടിവി ദൃശ്യങ്ങളിൽ നിന്ന് വ്യക്തമായിട്ടുണ്ട്.
തെളിവെടുപ്പിനിടെ ഒട്ടും കൂസലില്ലാതെയാണ് വൈശാഖൻ തന്റെ ക്രൂരതകൾ പോലീസിനോട് വിവരിച്ചത്. കൊലപാതകം നടന്ന ഇൻഡസ്ട്രിയൽ യൂണിറ്റ്, ഉറക്കഗുളിക വാങ്ങിയ മെഡിക്കൽ ഷോപ്പ്, ജ്യൂസ് വാങ്ങിയ ബേക്കറി, കല്ലായിലെ കൗൺസിലിങ് സെന്റർ എന്നിവിടങ്ങളിൽ പ്രതിയെ എത്തിച്ചു. താൻ ചെയ്ത പ്രവൃത്തിയിൽ കുറ്റബോധമുണ്ടെന്ന് പ്രതി മാധ്യമങ്ങളോട് പറഞ്ഞെങ്കിലും, സിസിടിവി ഹാർഡ് ഡിസ്ക് നശിപ്പിക്കാൻ ഇയാൾ നേരത്തെ പദ്ധതിയിട്ടിരുന്നു. എന്നാൽ പോലീസ് ഇൻഡസ്ട്രിയൽ യൂണിറ്റ് കൃത്യസമയത്ത് സീൽ ചെയ്തതോടെ ഈ നീക്കം പരാജയപ്പെട്ടു. പ്രതിയുടെ തടമ്പാട്ടുതാഴെയുള്ള വീട്ടിൽ നിന്നും ഹാർഡ് ഡിസ്ക് പോലീസ് പിടിച്ചെടുത്തിട്ടുണ്ട്. നിലവിൽ ഫെബ്രുവരി രണ്ട് വരെ പോലീസ് കസ്റ്റഡിയിലുള്ള പ്രതിയെ കൂടുതൽ ചോദ്യം ചെയ്തുവരികയാണ്.
Summary
Police have gathered crucial evidence against Vysakhan in the Elathur murder case, including a distress message sent by the victim to her counselor just hours before her death. Investigations revealed that the suspect pre-planned the murder by researching lethal dosages of sleeping pills on Google and tricked the victim into a fake suicide pact before brutally killing and abusing her.
