ബിവറേജസ് ജീവനക്കാർക്ക് ബോണസ് തുകയിൽ വലിയ നേട്ടം

തിരുവനന്തപുരം: ഈ ഓണം ജീവനക്കാർക്കും ബിവറേജസ് ഔട്ട്‌ലെറ്റുകൾ തേടിയെത്തുന്നവർക്കും അനുഗ്രഹമാണ്. ജീവനക്കാർക്ക് 95,000 രൂപ വരെ ബോണസായി ലഭിക്കും. സർക്കാരിൻ്റെ ബോണസ് പരിധി കവിയുന്നത് ഒഴിവാക്കാൻ പെർഫോമൻസ് ഇൻസെൻ്റീവും എക്സ് ഗ്രേഷ്യയും വെവ്വേറെ നൽകും. കഴിഞ്ഞ തവണ ഇത് 90,000 രൂപയായിരുന്നു. 5000 കോടിയിലധികം രൂപയാണ് മദ്യത്തിലൂടെ സർക്കാരിന് നികുതിയിനത്തിൽ ലഭിക്കുന്നത്. ബെവ്കോ -യ്ക്ക് ഔട്ട്‌ലെറ്റുകളിലും ഓഫീസുകളിലുമായി 5000 ജീവനക്കാരുണ്ട്. സ്വീപ്പർമാർക്ക് 5000 രൂപ ബോണസായി ലഭിക്കും. എക്‌സൈസ് മന്ത്രിയുടെ ചേംബറിൽ നടന്ന ചർച്ചയിലാണ് ബോണസ് സംബന്ധിച്ച് തീരുമാനമായത്.

സംസ്ഥാനത്ത് ഓണക്കാലത്ത് തൊഴിലാളികൾക്ക് 67 കോടി രൂപയുടെ ധനസഹായം അനുവദിച്ചതായി തൊഴിൽ വകുപ്പ് മന്ത്രി വി ശിവൻകുട്ടി അറിയിച്ചു. ബോണസ്, ഓണക്കിറ്റ്, എക്‌സ്‌ഗ്രേഷ്യ, ഇൻകം സപ്പോർട്ട് സ്‌കീം എന്നിവ പ്രകാരമാണ് തുക അനുവദിച്ചത്. സംസ്ഥാനത്ത് പരമ്പരാഗത തൊഴിൽ മേഖലകളിൽ ഏർപ്പെട്ടിരിക്കുന്നവർക്ക് വരുമാന സഹായ പദ്ധതിയിൽ 45 കോടി അനുവദിച്ചു. കയർ, കൈത്തറി, ഖാദി, ബീഡി, ചുരുട്ട്, മത്സ്യം തുടങ്ങിയ മേഖലകളിലെ 4,47,451 തൊഴിലാളികൾക്ക് ഓണക്കാലത്ത് ആനുകൂല്യം ലഭിക്കും. സംസ്ഥാനത്ത് അടഞ്ഞുകിടക്കുന്ന സ്വകാര്യ പൊതുമേഖലാ സ്ഥാപനങ്ങൾ, കയർ സ്ഥാപനങ്ങൾ, തോട്ടങ്ങൾ എന്നിവിടങ്ങളിലെ തൊഴിലാളികൾക്ക് എക്സ്ഗ്രേഷ്യ ധനസഹായമായി 2,14,64,000 രൂപ അനുവദിച്ചു. ഈ ഓണത്തിന് 10,732 തൊഴിലാളികൾക്ക് 2000 രൂപ വീതം ധനസഹായം ലഭിക്കും. ഒരു വർഷമോ അതിൽ കൂടുതലോ പൂട്ടിക്കിടക്കുന്ന കശുവണ്ടി ഫാക്ടറികളിലെ തൊഴിലാളികൾക്ക് 3,20,73,450 രൂപ എക്സ്ഗ്രേഷ്യ ധനസഹായമായി ലഭിക്കും. സംസ്ഥാനത്ത് അടഞ്ഞുകിടക്കുന്ന 398 കശുവണ്ടി ഫാക്ടറികളിലെ 14,647 തൊഴിലാളികൾക്ക് ഓണക്കാലത്ത് 2250 രൂപ നിരക്കിൽ ധനസഹായം ലഭിക്കും. വികലാംഗ പെൻഷൻ വിതരണത്തിനായി കേരള കശുവണ്ടിത്തൊഴിലാളി ദുരിതാശ്വാസ ക്ഷേമനിധി ബോർഡിന് 2 കോടി അനുവദിച്ചു.