തിരുവനന്തപുരം: നിയമസഭാ തിരഞ്ഞെടുപ്പിൽ പിന്നാക്ക സമുദായത്തിൽ നിന്നുള്ളവർക്ക് ജയസാധ്യതയുള്ള മണ്ഡലങ്ങൾ അനുവദിക്കണമെന്ന് ശിവഗിരി മഠം ആവശ്യപ്പെട്ടു. വർക്കല ശിവഗിരി മഠം സന്ദർശിക്കാനെത്തിയ രാഹുൽ ഗാന്ധിയുമായി നടത്തിയ കൂടിക്കാഴ്ചയിലാണ് ഈ ആവശ്യം രേഖാമൂലം ഉന്നയിച്ചത്.(Backward communities should be made to contest in seats where they are sure to win, Sivagiri Mutt to Rahul Gandhi)
എഐസിസി ജനറൽ സെക്രട്ടറി കെ.സി. വേണുഗോപാൽ, അടൂർ പ്രകാശ് എംപി എന്നിവർക്കൊപ്പമാണ് രാഹുൽ ഗാന്ധി ശിവഗിരിയിലെത്തിയത്. ഗുരുദേവന്റെ മഹാസമാധിയിൽ പുഷ്പാർച്ചന നടത്തിയ അദ്ദേഹം ശാരദാമഠത്തിലും വൈദിക മഠത്തിലും സന്ദർശനം നടത്തി.
തുടർന്ന് മഠത്തിലെ ഗസ്റ്റ് ഹൗസിൽ വെച്ച് സ്വാമിമാരുമായി നടത്തിയ കൂടിക്കാഴ്ചയിലാണ് തിരഞ്ഞെടുപ്പ് സംബന്ധിച്ച നിർണ്ണായക ആവശ്യം ഉയർന്നത്. മഠത്തിന്റെ ആവശ്യം ഗൗരവകരമാണെന്നും ഇക്കാര്യം പാർട്ടി തലത്തിൽ പരിശോധിച്ച് ഉചിതമായ തീരുമാനമെടുക്കാമെന്നും രാഹുൽ ഗാന്ധി മറുപടി നൽകി.
