കൊച്ചി: മലയാളീ താരസംഘടനയായ ‘അമ്മ’യ്ക്കുള്ളിൽ (AMMA) എക്സിക്യൂട്ടീവ് കമ്മിറ്റിയിലെ ആഭ്യന്തര കലഹങ്ങൾ തെരുവ് യുദ്ധത്തിലേക്ക് (AMMA association issues 2026). പ്രമുഖ താരങ്ങൾ ഓരോരുത്തരായി പരസ്യ പ്രതികരണങ്ങളുമായി രംഗത്തെത്തിയതോടെ സംഘടനയുടെ ഇപ്പോഴത്തെ ഭാരവാഹികൾ അടിയന്തിരമായി രാജിവെച്ച് നേതൃത്വം പിരിച്ചുവിടണമെന്ന ആവശ്യവുമായി മുതിർന്ന നടി പൊന്നമ്മ ബാബു രംഗത്തെത്തി.
ഇപ്പോഴത്തെ ഭാരവാഹികൾ ഇതേപടി തുടർന്നാൽ സംഘടനയിലെ പ്രശ്നങ്ങൾ കൂടുതൽ വഷളാകുമെന്നും പ്രസിഡന്റിനും സെക്രട്ടറിക്കും ഇടയിലുള്ള ‘ഈഗോ’ പ്രശ്നങ്ങളാണ് എല്ലാത്തിനും കാരണമെന്നും അവർ തുറന്നടിച്ചു. ഒന്നിച്ച് നിൽക്കേണ്ടവർ തമ്മിലടിക്കുന്നത് നാണക്കേടാണെന്നും സ്ത്രീകൾ നേതൃനിരയിലേക്ക് വന്നപ്പോൾ അവർക്ക് വേണ്ടി എന്തെങ്കിലും ചെയ്യുമെന്ന് പ്രതീക്ഷിച്ചിരുന്നുവെന്നും പൊന്നമ്മ ബാബു മാധ്യമങ്ങളോട് പറഞ്ഞു.
അൻസിബയുടെ വെളിപ്പെടുത്തലും ടിനി ടോമിനെതിരെയുള്ള പരാതികളും
എക്സിക്യൂട്ടിവ് കമ്മിറ്റിയില് നിന്ന് രാജിവച്ച നടി അന്സിബ ഹസ്സന് സംഘടന നേതൃത്വത്തിനെതിരെയും നടൻ ടിനി ടോമിനെതിരെയും ഗുരുതര ആരോപണങ്ങളുമായി കഴിഞ്ഞദിവസം രംഗത്തെത്തിയിരുന്നു. തനിക്കെതിരെ ജിഹാദി വിളി ഉണ്ടായെന്നും, മതപരിവര്ത്തനം നടത്തിയെന്ന് ആരോപിച്ചെന്നും, അവിഹിത ബന്ധമുണ്ടെന്ന് വരുത്തിത്തീർക്കാൻ പൊലീസിന് വ്യാജ പരാതി നല്കിയെന്നും അടക്കമുള്ള കടുത്ത ആക്ഷേപങ്ങളാണ് അൻസിബ ഉന്നയിച്ചത്.
ഇതിന് പിന്നാലെ ടിനി ടോമിനെതിരെ നടി നീനാ കുറുപ്പും രംഗത്തെത്തി. സംഘടനയുടെ കുടുംബമേളക്കിടെ ടിനി ടോം തന്നെ കയ്യേറ്റം ചെയ്യാന് ശ്രമിച്ചെന്നും അസഭ്യം പറഞ്ഞെന്നും കാണിച്ച് നീന സംഘടനയ്ക്ക് ഔദ്യോഗിക പരാതി നൽകിയിട്ടുണ്ട്. പ്രമുഖ മാധ്യമങ്ങൾ വഴി ഈ തർക്കങ്ങൾ പുറത്തുവന്നതോടെ സംഘടന കടുത്ത പ്രതിസന്ധിയിലാണ്.
അൻസിബയ്ക്ക് പിന്നിൽ നീനയെന്ന് ലക്ഷ്മിപ്രിയ; നേതൃത്വത്തിന് മാപ്പെന്ന് മാലാ പാർവതി
അതേസമയം, ഈ വിവാദങ്ങളിലേക്ക് നടി ലക്ഷ്മിപ്രിയയും കടന്നുവന്നതോടെ തർക്കം മുറുകി. അൻസിബയ്ക്കെതിരെ സംഘടനയിൽ പരാതി നൽകിയത് താനാണെന്ന് വെളിപ്പെടുത്തിയ ലക്ഷ്മിപ്രിയ, അൻസിബയുടെ ആരോപണങ്ങൾ പൂർണ്ണമായി നിഷേധിച്ചു. അൻസിബയ്ക്ക് പിന്നിൽ നീനാ കുറുപ്പാണെന്നും സെക്രട്ടറിയും പരിവാരങ്ങളും ചേർന്ന് അമ്മ ഓഫീസിനെ ഒരു അധോലോക കേന്ദ്രമാക്കിയെന്നും ലക്ഷ്മിപ്രിയ വാർത്താസമ്മേളനത്തിൽ ആരോപിച്ചു. എന്നാൽ, ഇതേ സമയം ടിനി ടോമിനെ ലക്ഷ്മിപ്രിയ ന്യായീകരിക്കുകയും ചെയ്തു.
ഇതിനിടയിലാണ് സംഘടനയിൽ നടക്കുന്ന കാര്യങ്ങളിൽ കടുത്ത അമർഷം രേഖപ്പെടുത്തി നടി മാലാ പാർവതി രംഗത്തെത്തിയത്. സംഘടനയിൽ എന്താണ് സംഭവിക്കുന്നതെന്ന് സാധാരണ അംഗങ്ങൾ അറിയുന്നില്ലെന്നും തമ്മിൽത്തല്ലുന്ന ഈ നേതൃത്വം അടിയന്തിരമായി മാറണമെന്നും അവർ ആവശ്യപ്പെട്ടു. സംഘടനയുടെ നേതൃനിരയിലേക്ക് സ്ത്രീകൾ വരണമെന്ന് വാദിച്ചതിനും അതിനായി ഇടപെട്ടതിനും താൻ പരസ്യമായി മാപ്പു ചോദിക്കുന്നുവെന്നും മാലാ പാർവതി കൂട്ടിച്ചേർത്തു.
ജനറൽ ബോഡിയിൽ അന്തിമ തീരുമാനം?
ഗുരുതരമായ പരാതി ഉയർന്ന സാഹചര്യത്തിൽ അൻസിബ ഹസനെ നേരിട്ട് കേൾക്കാൻ തയ്യാറാണെന്ന് എക്സിക്യൂട്ടിവ് കമ്മിറ്റി വ്യക്തമാക്കുകയും അവരെ അമ്മ ഓഫീസിലേക്ക് വിളിപ്പിക്കുകയും ചെയ്തിരുന്നു. എന്നാൽ ഇതിനോട് അനുകൂലമായി പ്രതികരിക്കാൻ അൻസിബ തയ്യാറായിട്ടില്ലെന്നാണ് വിവരം. അടുത്ത മാസം നടക്കാനിരിക്കുന്ന സംഘടനയുടെ വാർഷിക ജനറൽ ബോഡി യോഗത്തിൽ നിലവിലെ ഭരണസമിതിയെ പൂർണ്ണമായി മാറ്റുമോ, അതോ അതിന് മുൻപ് അനുരഞ്ജന ചർച്ചകളിലൂടെ പ്രശ്നം പരിഹരിക്കുമോ എന്നാണ് ഇനി കണ്ടറിയേണ്ടത്.
Story Summary: Internal conflicts within AMMA have worsened as actress Ponnama Babu demanded the dissolution of the current leadership. Mala Parvathi apologized for promoting women in management, while actresses Ansiba Hassan and Neena Kurup raised serious allegations against Tini Tom, which were contested by Lakshmi Priya.
