കൊച്ചി: താരസംഘടനയായ ‘അമ്മ’യിലെ (AMMA) ഭരണസമിതിയുടെ കൂട്ടരാജിയും ആഭ്യന്തര തർക്കങ്ങളും ചലച്ചിത്ര മേഖലയിൽ പുകയുന്നതിനിടയിൽ, നടൻ ടിനി ടോമിനെതിരെ താൻ ഔദ്യോഗികമായി പരാതി നൽകിയിട്ടില്ലെന്ന് വ്യക്തമാക്കി നടി നീന കുറുപ്പ് (Neena Kurup Tini Tom controversy). എക്സിക്യൂട്ടീവ് കമ്മിറ്റികളിൽ ഉണ്ടായ കടുത്ത തർക്കങ്ങളും താരങ്ങൾ ചേരിതിരിഞ്ഞ് പോരിനിറങ്ങിയതുമാണ് അമ്മയിൽ വലിയ ഭരണപ്രതിസന്ധിക്ക് വഴിവെച്ചത്. യോഗത്തിനിടയിൽ നടൻ ടിനി ടോമിനെതിരെ നടി അൻസിബ ഹസൻ പരസ്യമായി രംഗത്തെത്തിയതിന് പിന്നാലെ നീന കുറുപ്പും ചില വിഷയങ്ങൾ ഉന്നയിച്ചിരുന്നു.
ഇതിന് പിന്നാലെ, കേട്ടാൽ അറയ്ക്കുന്ന രീതിയിൽ ടിനി ടോം തനിക്കെതിരെ യോഗത്തിൽ വെച്ച് അസഭ്യവർഷം നടത്തിയെന്നും കൈയേറ്റം ചെയ്യാൻ ശ്രമിച്ചെന്നും കാണിച്ച് നീന കുറുപ്പ് സംഘടനയ്ക്ക് രേഖാമൂലം പരാതി നൽകിയെന്ന തരത്തിൽ മാധ്യമങ്ങളിൽ വാർത്തകൾ പ്രചരിച്ചിരുന്നു. എന്നാൽ, താൻ ഇത്തരത്തിൽ ഒരു പരാതിയും ഒരിടത്തും നൽകിയിട്ടില്ലെന്ന് നീന കുറുപ്പ് ദീപിക ഓൺലൈനിനോട് പ്രതികരിച്ചു. “അത് സംഘടനയ്ക്ക് ഉള്ളിലുള്ള ഒരു ആഭ്യന്തര കാര്യം മാത്രമാണ്, അതിനെക്കുറിച്ച് പുറത്താരോടും ഒന്നിനും ഞാൻ പരാതി പറഞ്ഞിട്ടില്ല,” നീന കുറുപ്പ് വ്യക്തമാക്കി.
അതേസമയം, സംഘടനയ്ക്കുള്ളിൽ വലിയ ചർച്ചയായ നടി ലക്ഷ്മിപ്രിയയുമായി ബന്ധപ്പെട്ട വിവാദ വിഷയത്തിൽ കൂടുതൽ പ്രതികരിക്കാൻ നീന കുറുപ്പ് വിസമ്മതിച്ചു. ‘അമ്മ’ ജനറൽ ബോഡി യോഗത്തിന് ശേഷം ലക്ഷ്മിപ്രിയ പെട്ടെന്ന് രാജി പ്രഖ്യാപിച്ചതിനെതിരെ നീന കുറുപ്പും മായ വിശ്വനാഥനും ഞായറാഴ്ച മാധ്യമങ്ങൾക്ക് മുന്നിൽ ശക്തമായി രംഗത്തെത്തിയിരുന്നു. ലക്ഷ്മിപ്രിയയുടെ രാജിയെക്കുറിച്ചുള്ള ചോദ്യത്തിന്, ഈ വിഷയത്തിൽ ഇനി കൂടുതലൊന്നും സംസാരിക്കാൻ താൽപര്യമില്ലെന്നായിരുന്നു നടിയുടെ പുതിയ മറുപടി.
എന്നാൽ, മുൻപ് മാധ്യമങ്ങളോട് സംസാരിക്കവെ ലക്ഷ്മിപ്രിയയുടെ രാജിയെ നീന കുറുപ്പ് സ്വാഗതം ചെയ്തിരുന്നു. “എനിക്ക് എന്താണെങ്കിലും ഇപ്പോൾ സന്തോഷമായി. യഥാർത്ഥത്തിൽ പുറത്താക്കേണ്ടതായിരുന്നു. പക്ഷേ അതിനെക്കാൾ പ്രധാനപ്പെട്ട മറ്റ് പല കാര്യങ്ങളും ജനറൽ ബോഡിയിൽ സംസാരിക്കാൻ ഉണ്ടായിരുന്നത് കൊണ്ടാണ് നടപടി വൈകിയത്. തനിക്ക് സംഘടനയിൽ നിന്ന് എന്താണ് ശിക്ഷയായി കിട്ടാൻ പോകുന്നതെന്ന് അവൾക്ക് തന്നെ കൃത്യമായി മനസ്സിലായി കാണും, അതുകൊണ്ടാണ് സ്വയം രാജിവെച്ച് ഒഴിഞ്ഞത്. ആ പേര് പോലും ഇനി ഉച്ചരിക്കാൻ ഞാൻ ഇഷ്ടപ്പെടുന്നില്ല. അത്രയ്ക്കും മാനസിക വിഷമവും ട്രോമയും ഉണ്ടാക്കിയ സ്ത്രീയാണവർ. കഴിഞ്ഞ 39 വർഷമായി സിനിമാ ഇൻഡസ്ട്രിയിൽ ഉള്ള ആളാണ് ഞാൻ. ഇതുവരെ എന്നെക്കുറിച്ച് ഒരു മോശം വാർത്ത എഴുതാൻ നിങ്ങൾക്ക് ഞാൻ അവസരം തന്നിട്ടുണ്ടോ? എന്നിട്ടാണ് അവർ എന്നെക്കുറിച്ച് അനാവശ്യ കാര്യങ്ങൾ പറഞ്ഞത്,” എന്നായിരുന്നു നീന കുറുപ്പ് കഴിഞ്ഞ ദിവസം ഓൺലൈൻ മാധ്യമങ്ങളോട് വൈകാരികമായി പ്രതികരിച്ചത്.
Story Summary: Actress Neena Kurup clarified that she has not filed any official complaint against actor Tini Tom, stating that the issues raised during the AMMA executive meeting were strictly internal. This comes after rumors circulated that she complained about verbal abuse and physical confrontation by Tini Tom. Meanwhile, Neena refused to comment further on Lakshmipriya’s sudden resignation from the association, though she had previously expressed relief over it, accusing Lakshmipriya of causing severe trauma.
