കൊച്ചി: സംസ്ഥാനത്ത് സ്വർണ്ണവില സർവ്വകാല റെക്കോർഡുകൾ ഭേദിച്ച് മുന്നേറുന്നു. ഇന്നലെ രേഖപ്പെടുത്തിയ റെക്കോർഡ് വർദ്ധനവിന് ശേഷം ഇന്ന് വിലയിൽ മാറ്റമില്ലാതെ തുടരുകയാണ്. ഒരു പവൻ സ്വർണ്ണത്തിന് 1,18,760 രൂപയും ഒരു ഗ്രാമിന് 14,845 രൂപയുമാണ് ഇന്നത്തെ നിരക്ക്.(Kerala Gold price remains at the record height today)
ജനുവരി 26 തിങ്കളാഴ്ച രാവിലെ പവന് 1,800 രൂപ വർദ്ധിച്ച് 1,19,320 രൂപ എന്ന ചരിത്രത്തിലെ ഏറ്റവും ഉയർന്ന നിരക്കിലെത്തിയിരുന്നു. എന്നാൽ ഉച്ചയ്ക്ക് ശേഷം 560 രൂപ കുറഞ്ഞാണ് നിലവിലെ വിലയായ 1,18,760-ൽ എത്തിയത്. പണിക്കൂലി, 3% ജിഎസ്ടി, മറ്റ് സെസ്സുകൾ എന്നിവ കൂടി ചേരുമ്പോൾ ഒരു പവൻ ആഭരണം വാങ്ങാൻ ഉപഭോക്താക്കൾ ശരാശരി 1.25 ലക്ഷം രൂപയ്ക്ക് മുകളിൽ നൽകേണ്ടി വരും.
2025 ഡിസംബർ 23-ന് ഒരു ലക്ഷം കടന്ന സ്വർണ്ണവില, വെറും ഒരു മാസത്തിനുള്ളിലാണ് 1.20 ലക്ഷത്തിനടുത്തെത്തിയത്. ആഗോള വിപണിയിലെ അനിശ്ചിതത്വങ്ങളാണ് ആഭ്യന്തര വിപണിയിലും പ്രതിഫലിക്കുന്നത്. ഗ്രീൻലാൻഡ് വിഷയത്തിൽ യൂറോപ്യൻ രാജ്യങ്ങൾക്ക് മേൽ അധിക തീരുവ ചുമത്തുമെന്ന യുഎസ് പ്രസിഡന്റ് ഡൊണാൾഡ് ട്രംപിന്റെ പ്രസ്താവന ആഗോള വിപണിയെ ആശങ്കയിലാഴ്ത്തി.
ഇറാനെതിരെയുള്ള അമേരിക്കയുടെ സൈനിക നീക്കങ്ങളെക്കുറിച്ചുള്ള റിപ്പോർട്ടുകൾ സുരക്ഷിത നിക്ഷേപം എന്ന നിലയിൽ സ്വർണ്ണത്തിലേക്ക് നിക്ഷേപകരെ ആകർഷിക്കുന്നു. അന്താരാഷ്ട്ര വിപണിയിൽ ഡോളറിനെതിരെ രൂപയുടെ മൂല്യം റെക്കോർഡ് താഴ്ചയിലേക്ക് പോയത് ഇറക്കുമതി ചെലവ് വർദ്ധിപ്പിച്ചു. ആഗോള വിപണിയിൽ സ്വർണ്ണം ഔൺസിന് 5,000 ഡോളർ എന്ന നാഴികക്കല്ല് പിന്നിട്ട സാഹചര്യത്തിൽ വരും ദിവസങ്ങളിലും വിപണിയിൽ വലിയ ചാഞ്ചാട്ടങ്ങൾക്ക് സാധ്യതയുണ്ടെന്ന് സാമ്പത്തിക വിദഗ്ധർ വിലയിരുത്തുന്നു.
