സ്വന്തം പാട്ടുകളിലൂടെയും വേറിട്ട ആലാപന ശൈലിയിലൂടെയും ആരാധകരെ നേടിയ കലാകാരിയാണ് ഗൗരി ലക്ഷ്മി. എന്നാൽ വസ്ത്രധാരണത്തിന്റെ പേരിലും നിലപാടുകളുടെ പേരിലും നിരന്തരം സൈബർ ആക്രമണങ്ങൾ നേരിടാറുള്ള താരം, തന്നെ വ്യക്തിപരമായി അധിക്ഷേപിക്കാൻ ശ്രമിച്ചയാൾക്ക് ഇൻസ്റ്റാഗ്രാമിലൂടെയാണ് മറുപടി നൽകിയത്.
“പാടാൻ കഴിയില്ല, അജ്മാനിൽ ജോലി തരാം”
ഗൗരിയുടെ വീഡിയോയ്ക്ക് താഴെ വന്ന ഒരു കമന്റാണ് വിവാദത്തിന് ആധാരം. “പാസ്പോർട്ട് ഉണ്ടോ? അജ്മാനിൽ ഒരു ജോബ് വേക്കൻസിയുണ്ട്. ദയവ് ചെയ്ത് പാടല്ലേ, ചേച്ചിക്ക് പാടാനുള്ള കഴിവ് ദൈവം തന്നിട്ടില്ല” എന്നായിരുന്നു ഒരാളുടെ പരിഹാസം.
ഗൗരിയുടെ മറുപടി
തന്റെ വീഡിയോയ്ക്ക് ലഭിച്ച ഈ കമന്റും അതിന് താൻ നൽകിയ മറുപടിയും താരം ഇൻസ്റ്റാഗ്രാം സ്റ്റോറിയായി പങ്കുവെച്ചു.
“എനിക്ക് തൊഴിലുണ്ടാക്കിത്തരാനുള്ള അനിയന്റെ താല്പര്യം സന്തോഷമുണ്ടാക്കുന്നു. പക്ഷേ എനിക്ക് നാട് വിട്ടു പോകണ്ട അനിയാ. എനിക്കിഷ്ടമുള്ള ജോലി ചെയ്ത് സന്തോഷമായിട്ട് ഞാന് ജീവിച്ചോളാം. പിന്നെ ഇടയ്ക്ക് അന്യരാജ്യങ്ങളില് പോവാനുള്ള അവസരവും എന്റെ തൊഴില് എനിക്ക് നല്കുന്നുണ്ട്. അതുകൊണ്ട് ഇവിടെ പെട്ടുപോയി എന്ന പേടി അനിയന് വേണ്ട. അനിയനും അനിയന്റെ തൊഴില് മേഖലയില് സന്തുഷ്ടനാണെന്ന് വിചാരിക്കുന്നു.” – ഗൗരി കുറിച്ചു.
സൈബർ ആക്രമണങ്ങളെയും പരിഹാസങ്ങളെയും അർഹിക്കുന്ന അവജ്ഞയോടെ തള്ളിക്കളയുന്ന ഗൗരിയുടെ ഈ രീതിക്ക് വലിയ പിന്തുണയാണ് സോഷ്യൽ മീഡിയയിൽ ലഭിക്കുന്നത്. മുൻപും സ്റ്റേജ് ഷോകളിലെ വസ്ത്രധാരണത്തിന്റെ പേരിലും മറ്റും സൈബർ ഇടങ്ങളിൽ വലിയ ചർച്ചകൾക്ക് ഗൗരി ലക്ഷ്മി കാരണമായിട്ടുണ്ട്.
