തിരുവനന്തപുരം: സീറ്റ് വിഭജനത്തിലെ അതൃപ്തിയെത്തുടർന്ന് കഴിഞ്ഞ വ്യാഴാഴ്ച ആർ.ജെ.ഡിയിൽ നിന്ന് രാജിവെച്ച മുൻ മന്ത്രി വി. സുരേന്ദ്രൻ പിള്ള പാർട്ടിയിലേക്ക് തിരിച്ചെത്തുന്നു (V Surendran Pillai RJD,). ശ്രേയാംസ് കുമാർ ആവശ്യപ്പെട്ടതനുസരിച്ചാണ് തന്റെ മടങ്ങിവരവെന്ന് സുരേന്ദ്രൻ പിള്ള മാധ്യമങ്ങളോട് പറഞ്ഞു. തിരുവനന്തപുരം മണ്ഡലത്തിൽ മത്സരിക്കാൻ നടത്തിയ രാഷ്ട്രീയ നീക്കങ്ങൾ ഒന്നൊന്നായി പരാജയപ്പെട്ടതാണ് ഈ പെട്ടെന്നുള്ള തീരുമാനത്തിന് പിന്നിലെന്നാണ് വിലയിരുത്തൽ.
തിരുവനന്തപുരത്ത് എൽ.ഡി.എഫ് സ്വതന്ത്രനായി മത്സരിക്കാൻ സുരേന്ദ്രൻ പിള്ള ശ്രമിച്ചിരുന്നു. എന്നാൽ ആന്റണി രാജുവും ജനാധിപത്യ കേരള കോൺഗ്രസും ഇതിനെ ശക്തമായി എതിർത്തു. എൽ.ഡി.എഫിൽ അവസരം ലഭിക്കാതെ വന്നതോടെ ബി.ജെ.പി നേതൃത്വവുമായും അദ്ദേഹം ചർച്ചകൾ നടത്തിയിരുന്നു. എന്നാൽ ബി.ജെ.പി പശ്ചാത്തലമുള്ള ഒരാളെ ഇടതുപക്ഷം സ്വീകരിക്കുന്നതിനെ സി.പി.എം പ്രാദേശിക നേതൃത്വവും എതിർത്തു.
ബി.ജെ.പിയിലെ തടസ്സം: തിരുവനന്തപുരത്ത് കരമന ജയനെ തന്നെ സ്ഥാനാർത്ഥിയാക്കണമെന്ന ബി.ജെ.പി മണ്ഡലം കമ്മിറ്റിയുടെ കടുത്ത നിലപാടും സുരേന്ദ്രൻ പിള്ളയ്ക്ക് തിരിച്ചടിയായി.
ആർ.ജെ.ഡിക്ക് കൂടുതൽ സീറ്റുകൾ നൽകാമെന്ന എൽ.ഡി.എഫ് വാഗ്ദാനം പാലിക്കാത്തതിൽ പ്രതിഷേധിച്ചായിരുന്നു സുരേന്ദ്രൻ പിള്ള നേരത്തെ രാജിവെച്ചത്. ആകെ മൂന്ന് സീറ്റുകൾ മാത്രം ലഭിച്ച സാഹചര്യത്തിൽ ഇടതുമുന്നണിയെ പുറത്തുനിന്ന് പിന്തുണച്ചാൽ മതിയെന്ന പാർട്ടി ധാരണ ലംഘിക്കപ്പെട്ടതായും അദ്ദേഹം ആരോപിച്ചിരുന്നു. എന്നാൽ നിലവിലെ രാഷ്ട്രീയ സാഹചര്യത്തിൽ പാർട്ടിയിലേക്ക് തന്നെ മടങ്ങാനാണ് അദ്ദേഹം തീരുമാനിച്ചിരിക്കുന്നത്.
Story Summary:
Former Minister V. Surendran Pillai, who resigned from the RJD last Thursday, has decided to return to the party. His attempts to secure a candidacy in the Thiruvananthapuram constituency—either as an LDF independent or with the BJP—failed after facing strong opposition from local leaders and alliance partners like Antony Raju. Pillai stated his return follows a request from M.V. Shreyams Kumar.
