കൊച്ചി: വരാനിരിക്കുന്ന തിരഞ്ഞെടുപ്പിൽ ചാലക്കുടി, പെരുമ്പാവൂർ മണ്ഡലങ്ങൾ പിടിച്ചെടുക്കാൻ സിനിമാതാരങ്ങളെ കളത്തിലിറക്കാൻ എൻ.ഡി.എ നീക്കം (Kerala Assembly Election 2026). ബിജെപിയും ട്വന്റി 20-യും സംയുക്തമായാണ് പ്രമുഖ താരങ്ങളെ സമീപിച്ചിരിക്കുന്നത്. ഇതിനായി ഒരു പ്രൊഫഷണൽ ഏജൻസി വഴി ചർച്ചകൾ ആരംഭിച്ചതായാണ് വിവരം.
ഒരു മുൻ നായിക നടി, നിലവിൽ നായക വേഷങ്ങൾ ചെയ്യുന്ന യുവനടൻ, മുൻകാല നായകൻ എന്നിവരുമായാണ് എൻ.ഡി.എ നേതൃത്വം ചർച്ച നടത്തുന്നത്. ബിജെപി ചിഹ്നത്തിലോ അല്ലെങ്കിൽ ട്വന്റി 20 സ്ഥാനാർത്ഥിയായോ ഇവരെ മത്സരിപ്പിക്കാനാണ് ധാരണ. അടുത്തിടെ ട്വന്റി 20-യിൽ ചേർന്ന സംവിധായകൻ അഖിൽ മാരാറിനെ തൃപ്പൂണിത്തുറയിൽ മത്സരിപ്പിക്കാൻ സാധ്യതയേറി. കൊട്ടാരക്കര സീറ്റിലായിരുന്നു മാരാർക്ക് താൽപ്പര്യമെങ്കിലും അവിടെ കോൺഗ്രസ് വിട്ടെത്തിയ ആർ. രശ്മിയെ പരിഗണിക്കുന്നതിനാലാണ് തൃപ്പൂണിത്തുറയിലേക്ക് മാറ്റുന്നത്.
എറണാകുളം ജില്ലയിൽ കുന്നത്തുനാട്, പെരുമ്പാവൂർ, അങ്കമാലി, തൃക്കാക്കര, വൈപ്പിൻ, കൊച്ചി എന്നിങ്ങനെ 6 സീറ്റുകളിൽ ട്വന്റി 20 മത്സരിച്ചേക്കും. മികച്ച സ്ഥാനാർത്ഥികളുണ്ടെങ്കിൽ പിറവം, മൂവാറ്റുപുഴ സീറ്റുകളും ബിജെപി വിട്ടുനൽകിയേക്കും.ട്വന്റി 20 കൺവീനർ സാബു എം. ജേക്കബ് ഇത്തവണ മത്സരരംഗത്തുണ്ടാകില്ലെന്ന് പാർട്ടി വൃത്തങ്ങൾ സൂചിപ്പിച്ചു. ബിസിനസ് തിരക്കുകൾ കാരണമാണ് അദ്ദേഹം മാറിനിൽക്കുന്നത്.
സ്ഥാനാർത്ഥി നിർണ്ണയം സംബന്ധിച്ച് അടുത്ത ഏതാനും ദിവസങ്ങൾക്കുള്ളിൽ എൻ.ഡി.എ ഔദ്യോഗിക പ്രഖ്യാപനം നടത്തിയേക്കും. ട്വന്റി 20-യുമായുള്ള സഖ്യം എറണാകുളം ജില്ലയിലെ ഫലത്തെ എങ്ങനെ സ്വാധീനിക്കുമെന്നാണ് രാഷ്ട്രീയ ലോകം ഉറ്റുനോക്കുന്നത്.
Story Summary: NDA is actively considering fielding film stars in Chalakudy and Perumbavoor for the upcoming elections. Discussions are reportedly ongoing with four prominent actors. Director Akhil Marar, who recently joined Twenty20, is being considered for the Tripunithura seat. While Twenty20 expects to contest 20-30 seats across Kerala as an NDA ally, its convener Sabu M. Jacob is unlikely to contest due to business commitments.
