ഇസ്ലാമാബാദ്: പശ്ചിമേഷ്യൻ യുദ്ധം ഗൾഫ് മേഖലയെയാകെ വിഴുങ്ങുമ്പോൾ, സൗദി അറേബ്യയുടെ സുരക്ഷാ കാര്യത്തിൽ പാകിസ്ഥാൻ പുലർത്തുന്ന നിശബ്ദത ലോകരാജ്യങ്ങളെ അത്ഭുതപ്പെടുത്തുന്നു. തിങ്കളാഴ്ച സൗദി അരാംകോ റിഫൈനറിക്ക് നേരെ ഇറാൻ നടത്തിയ അതിശക്തമായ ആക്രമണത്തിന് പിന്നാലെയും പാകിസ്ഥാൻ സൈനികമായോ നയതന്ത്രപരമായോ ശക്തമായ നിലപാട് സ്വീകരിച്ചിട്ടില്ല.(Iran attack on Saudi Arabia, Pakistan remains silent despite defense agreement)
2025 സെപ്റ്റംബറിൽ പാകിസ്ഥാനും സൗദി അറേബ്യയും ഒപ്പുവെച്ച ‘നാറ്റോ മാതൃകയിലുള്ള’ സുപ്രധാന പ്രതിരോധ കരാർ പ്രകാരം, ഇരു രാജ്യങ്ങളിൽ ഏതെങ്കിലും ഒന്നിന് നേരെയുണ്ടാകുന്ന ആക്രമണം സംയുക്തമായ ഭീഷണിയായി കണക്കാക്കി നേരിടേണ്ടതാണ്. എന്നാൽ സൗദിക്ക് നേരെ തുടർച്ചയായി മിസൈൽ-ഡ്രോൺ ആക്രമണങ്ങൾ ഉണ്ടായിട്ടും പാകിസ്ഥാൻ വെറും ‘ഐക്യദാർഢ്യത്തിൽ’ ഒതുങ്ങുകയാണ്.
ഇറാനുമായി പാകിസ്ഥാൻ പങ്കിടുന്ന നീണ്ട അതിർത്തിയും ചരിത്രപരവും സാംസ്കാരികവുമായ ബന്ധങ്ങളും പെട്ടെന്നൊരു സൈനിക നീക്കത്തിന് തടസ്സമാണ്. ഇറാനുമായി ഒരു യുദ്ധമുണ്ടായാൽ അത് പാകിസ്ഥാനകത്ത് വലിയ വിഭാഗീയ സംഘർഷങ്ങൾക്ക് കാരണമായേക്കാം. നിലവിൽ കടുത്ത സാമ്പത്തിക തകർച്ച നേരിടുന്ന പാകിസ്ഥാന് മറ്റൊരു യുദ്ധം താങ്ങാനാവില്ല. വടക്കുപടിഞ്ഞാറൻ അതിർത്തിയിൽ അഫ്ഗാനിസ്ഥാനുമായുള്ള സംഘർഷവും ആഭ്യന്തരമായി താലിബാൻ ഉയർത്തുന്ന ഭീഷണിയും ഇസ്ലാമാബാദിനെ വലയ്ക്കുന്നുണ്ട്.
ഇന്ത്യയുമായുള്ള ബന്ധം വഷളായി നിൽക്കുന്ന സാഹചര്യത്തിൽ, പശ്ചിമേഷ്യയിൽ ഒരു പുതിയ യുദ്ധമുഖം തുറക്കുന്നത് പാകിസ്ഥാന്റെ പ്രതിരോധ സംവിധാനത്തെ ദുർബലമാക്കും. പാകിസ്ഥാനും സൗദിയും തമ്മിലുള്ള കരാർ ഒരു ‘ഔപചാരിക രാഷ്ട്രീയ സൂചന’ മാത്രമാണെന്നും, യഥാർത്ഥത്തിൽ ഇറാന്റെ സൈനിക ശക്തിയെ നേരിടാൻ പാകിസ്ഥാൻ തയ്യാറല്ലെന്നുമാണ് രാഷ്ട്രീയ നിരീക്ഷകർ കരുതുന്നത്.
