മണിക്കൂറുകളോളം ലാപ്ടോപ്പിനും മൊബൈലിനും മുന്നിൽ ചെലവഴിക്കുന്നവരിൽ ഇന്ന് സാധാരണമായി കണ്ടുവരുന്ന ഒന്നാണ് കണ്ണിന് പിന്നിലുണ്ടാകുന്ന തലവേദന (Natural Remedies for Headache Behind Eyes). ജോലിസ്ഥലത്തെ സമ്മർദ്ദം, നിർജ്ജലീകരണം, ഉറക്കക്കുറവ് എന്നിവയൊക്കെ ഇതിന് കാരണമാകാറുണ്ട്. ഇടയ്ക്കിടെയുണ്ടാകുന്ന ഇത്തരം വേദനകൾ പലപ്പോഴും നമ്മുടെ ദൈനംദിന പ്രവൃത്തികളെ ബാധിക്കുകയും ശ്രദ്ധ കേന്ദ്രീകരിക്കാൻ ബുദ്ധിമുട്ടുണ്ടാക്കുകയും ചെയ്യുന്നു.
എന്തൊക്കെയാണ് കാരണങ്ങൾ?
കണ്ണിന് പിന്നിലെ വേദനയ്ക്ക് പിന്നിൽ പ്രധാനമായും താഴെ പറയുന്ന കാരണങ്ങളുണ്ടാകാം:
- ടെൻഷൻ ഹെഡേക്ക്: മാനസിക സമ്മർദ്ദവും കഴുത്തിലെ പേശികളുടെ വലിവും ഇതിന് കാരണമാകുന്നു.
- ഡിജിറ്റൽ ഐ സ്ട്രെയിൻ: ദീർഘനേരം സ്ക്രീനുകളിലേക്ക് നോക്കിയിരിക്കുന്നത് കണ്ണിന് ചുറ്റുമുള്ള പേശികൾക്ക് ആയാസമുണ്ടാക്കുന്നു.
- സൈനസ് പ്രശ്നങ്ങൾ: സൈനസൈറ്റിസ് മൂലം കണ്ണിന് പിന്നിൽ അമിതമായ മർദ്ദവും വേദനയും അനുഭവപ്പെടാം.
- മൈഗ്രേയ്ൻ: തലയുടെ ഒരു വശത്ത് മാത്രം കേന്ദ്രീകരിക്കുന്ന കഠിനമായ
- വേദനയാണിത്. ഇത് ചിലപ്പോൾ മൂന്ന് ദിവസം വരെ നീണ്ടുനിൽക്കാം.
പരിഹാരമാർഗ്ഗങ്ങൾ
ഈ അസ്വസ്ഥതകൾ കുറയ്ക്കാൻ ലളിതമായ ചില ശീലങ്ങൾ സഹായിക്കും:
- ധാരാളം വെള്ളം കുടിക്കുക: ശരീരത്തിൽ ജലാംശം കുറയുന്നത് തലവേദനയ്ക്കുള്ള പ്രധാന കാരണമാണ്. ദിവസവും ആവശ്യത്തിന് വെള്ളം കുടിക്കുന്നത് രക്തയോട്ടം മെച്ചപ്പെടുത്താനും വേദന കുറയ്ക്കാനും സഹായിക്കും.
- 20-20-20 നിയമം പാലിക്കുക: സ്ക്രീൻ ഉപയോഗിക്കുമ്പോൾ ഓരോ 20 മിനിറ്റിലും 20 അടി ദൂരെയുള്ള വസ്തുവിലേക്ക് 20 സെക്കൻഡ് നേരം നോക്കുക. ഇത് കണ്ണിന്റെ ആയാസം കുറയ്ക്കാൻ സഹായിക്കും.
- കോംപ്രസ് ഉപയോഗിക്കുക: നെറ്റിയിലോ കണ്ണിന് മുകളിലോ തണുത്തതോ അല്ലെങ്കിൽ ചെറിയ ചൂടുള്ളതോ ആയ തുണി ഉപയോഗിച്ച് അമർത്തുന്നത് പേശികൾക്ക് ആശ്വാസം നൽകും.
- ഉറക്കം ക്രമീകരിക്കുക: കൃത്യമായ സമയത്ത് ഉറങ്ങുന്നതും എഴുന്നേൽക്കുന്നതും തലവേദന തടയാൻ സഹായിക്കും. ഉറങ്ങുന്നതിന് ഒരു മണിക്കൂർ മുൻപ് ഫോൺ ഉപയോഗം ഒഴിവാക്കുക.
- റിലാക്സേഷൻ വ്യായാമങ്ങൾ: ശ്വസന വ്യായാമങ്ങൾ, മെഡിറ്റേഷൻ, കഴുത്തിന് നൽകുന്ന ലഘുവായ സ്ട്രെച്ചിംഗുകൾ എന്നിവ പേശീവലിവ് കുറയ്ക്കാൻ സഹായിക്കും.
എപ്പോൾ ഡോക്ടറെ കാണണം?
തലവേദന കഠിനമാവുകയോ, കാഴ്ച മങ്ങുകയോ, പനി, ആശയക്കുഴപ്പം എന്നിവ ഉണ്ടാകുകയോ ചെയ്താൽ ഉടൻ തന്നെ ഒരു ഡോക്ടറുടെ സഹായം തേടേണ്ടതാണ്. ഇടയ്ക്കിടെയുണ്ടാകുന്ന തലവേദനകൾ മറ്റ് ആരോഗ്യപ്രശ്നങ്ങളുടെ ലക്ഷണമാകാൻ സാധ്യതയുണ്ട്.
