ബെംഗളൂരു: ‘കാന്താര 2’ സിനിമയുമായി ബന്ധപ്പെട്ട പരാതിയിൽ ബോളിവുഡ് താരം രൺവീർ സിംഗ് മാപ്പ് പറയണമെന്ന് കർണാടക ഹൈക്കോടതി. മതവികാരങ്ങളെ മാനിക്കാൻ പൊതുപ്രവർത്തകർക്കും കലാകാരന്മാർക്കും ഉത്തരവാദിത്വമുണ്ടെന്ന് കോടതി നിരീക്ഷിച്ചു. ഇതിന്റെ ഭാഗമായി താരം മൈസൂരിലെ ചാമുണ്ഡി ക്ഷേത്രം സന്ദർശിക്കണമെന്നും കോടതി ഉത്തരവിൽ വ്യക്തമാക്കുന്നു.(Karnataka High Court asks Ranveer Singh to apologise, visit temple)
കാന്താരയിലെ ദൈവ സങ്കൽപ്പവുമായി ബന്ധപ്പെട്ട് രൺവീർ സിംഗ് നടത്തിയ അനുകരണമാണ് വിവാദത്തിന് കാരണമായത്. ഇത് മതവികാരം വ്രണപ്പെടുത്തിയെന്ന് ആരോപിച്ച് ബെംഗളൂരു പോലീസാണ് താരത്തിനെതിരെ കേസെടുത്തത്. ദൈവകോലത്തെയും അതുമായി ബന്ധപ്പെട്ട ആചാരങ്ങളെയും മോശമായി ചിത്രീകരിച്ചുവെന്നായിരുന്നു പരാതി.
തന്റെ പ്രവൃത്തികളിൽ നിരുപാധികം ക്ഷമാപണം നടത്തി സത്യവാങ്മൂലം സമർപ്പിക്കാൻ തയ്യാറാണെന്ന് രൺവീർ സിംഗ് കോടതിയെ അറിയിച്ചു. കോടതിയുടെ നിർദ്ദേശപ്രകാരം ചാമുണ്ഡി ക്ഷേത്രം സന്ദർശിക്കാൻ താൻ സന്നദ്ധനാണെന്നും താരം വ്യക്തമാക്കിയിട്ടുണ്ട്.
