തിരുവനന്തപുരം: യൂട്യൂബ് ചാനലുകൾ വഴി നിരന്തരമായി സൈബർ അധിക്ഷേപം നേരിടുന്നതായി ചൂണ്ടിക്കാട്ടി പ്രമുഖ സീരിയൽ നടി രേഖ രതീഷ് മുഖ്യമന്ത്രി പിണറായി വിജയന് പരാതി നൽകി. മുഖ്യമന്ത്രിയുടെ ഓഫീസിൽ നേരിട്ടെത്തി നൽകിയ പരാതി തുടർനടപടികൾക്കായി സൈബർ പൊലീസിന് കൈമാറി. ഇൻസ്റ്റഗ്രാമിൽ പങ്കുവെച്ച വൈകാരികമായ വീഡിയോയിലൂടെയാണ് താരം തന്റെ ദുരവസ്ഥ വെളിപ്പെടുത്തിയത്.(Actress Rekha Ratheesh directly complains to the Chief Minister against cyber attacks)
ഒരു കൂട്ടം യൂട്യൂബ് ചാനലുകൾ തന്നെ വ്യക്തിപരമായി അധിക്ഷേപിക്കുകയാണെന്ന് രേഖ പറയുന്നു. താൻ വീണ്ടും വിവാഹിതയാകുന്നു എന്നതടക്കമുള്ള വ്യാജവാർത്തകൾ ഇവർ പ്രചരിപ്പിക്കുന്നു.
താൻ മകന് വേണ്ടി ജീവിക്കാൻ ശ്രമിക്കുകയാണെന്നും എന്നാൽ ഇത്തരം സൈബർ ആക്രമണങ്ങൾ തന്നെ മാനസികമായി തകർക്കുന്നുവെന്നും താരം വ്യക്തമാക്കി. യൂട്യൂബ് ചാനലുകൾക്കെതിരെ കർശന നടപടി വേണമെന്നും രേഖ ഓർമ്മിപ്പിച്ചു.
