എക്കാലത്തും മനുഷ്യരെ അത്ഭുതപ്പെടുത്തിയിട്ടുള്ള ഒന്നാണ് ഈജിപ്തും അതിൻ്റെ ചരിത്രവും. ചരിത്രമെന്നാൽ പഴമയാണെന്ന് കരുതുന്നവർക്ക് ഒരു തിരിച്ചടിയാണ് ഈജിപ്തിലെ അത്യപൂർവ്വമായ വാസ്തുവിദ്യകളും, രീതികളും.(Tomb of Tutankhamun)
1332 – 1323 ബി സിയിൽ പുരാതന ഈജിപ്തിലെ പതിനെട്ടാം രാജവംശത്തിൻ്റെ അവസാനകാലത്ത് ഭരിച്ചിരുന്ന ഒരു പുരാതന ഈജിപ്ഷ്യൻ ഫറവോ ആയിരുന്നു തൂത്തൻഖാമുൻ. തൂത്തൻഖട്ടനിൽ ജനിച്ച അദ്ദേഹം, KV55 മമ്മിയാണെന്ന് കരുതപ്പെടുന്ന അഖിനാട്ടൻ്റെ മകനാണെന്ന് വിലയിരുത്തപ്പെടുന്നു.
ഡി എൻ എ പരിശോധനയിലൂടെ തൂത്തൻഖാമുൻ്റെ അമ്മയെ തിരിച്ചറിഞ്ഞു. കെവി 35ൽ അടക്കം ചെയ്തിട്ടുള്ള അവർ തൻ്റെ ഭർത്താവിൻ്റെ പൂർണ സഹോദരിയാണ്. തൻ്റെ മുൻഗാമികളായ സ്മെൻഖാരെയുടെയും നെഫർനെഫെറുവാറ്റൻ്റെയും ഹ്രസ്വ ഭരണത്തിന് ശേഷം ഒമ്പതാം വയസ്സിൽ തുത്തൻഖാമുൻ സിംഹാസനത്തിലേറി. തൻ്റെ അർദ്ധസഹോദരിയായ അങ്കസെൻപാറ്റനെ വിവാഹം ചെയ്തു.
അദ്ദേഹത്തിൻ്റെ ഭരണകാലത്ത് അദ്ദേഹം പുരാതന ഈജിപ്ഷ്യൻ മതത്തിൻ്റെ പരമ്പരാഗത ബഹുദൈവാരാധന പുനഃസ്ഥാപിച്ചു. ആറ്റനിസം എന്നറിയപ്പെടുന്ന മതപരമായ മാറ്റം ഇല്ലാതാക്കി. തൻ്റെ 18-ാം വയസ്സിൽ തൂത്തൻഖാമുൻ അപ്രതീക്ഷിതമായി മരണമടഞ്ഞു. ചരിത്രം ഏറെ ചർച്ച ചെയ്ത വിഷയമാണ് അദ്ദേഹത്തിൻ്റെ ആരോഗ്യവും, മരണകാരണവും. ഇത്രയൊക്കെ വിവരങ്ങൾ ലഭ്യമായെന്നിരിക്കുകിലും, തൂത്തൻഖാമുൻ എന്ന പേര് ലോകത്തിന് പരിചിതമാകാൻ കാരണം അദ്ദേഹത്തിൻ്റെ ശവകുടീരമാണ്. ചരിത്രം മാറ്റിയെഴുതിയ ഒരു കണ്ടെത്തലായിരുന്നു അത്.
ബ്രിട്ടീഷ് പ്രഭു ജോർജ്ജ് ഹെർബർട്ട് സ്പോൺസർ ചെയ്ത ബ്രിട്ടീഷ് ഈജിപ്തോളജിസ്റ്റ് ഹോവാർഡ് കാർട്ടറുടെ നേതൃത്വത്തിലുള്ള സംഘമാണ് 1922-ൽ അദ്ദേഹത്തിൻ്റെ ശവകുടീരം (KV62) കണ്ടെത്തിയത്. പുരാതന കാലത്ത് കൊള്ളയടിക്കപ്പെട്ടിരുന്നുവെങ്കിലും രാജാക്കന്മാരുടെ താഴ്വരയിൽ കണ്ടെത്തിയ കേടുപാടുകളില്ലാത്ത ഏക രാജകീയ ശവകുടീരമാണ് തൂത്തൻഖാമുൻ്റേത്. യഥാർത്ഥ ഉള്ളടക്കങ്ങളിൽ ഭൂരിഭാഗവും അത് നിലനിർത്തി.
ഈ കണ്ടെത്തൽ പത്രങ്ങൾക്ക് ഒരു ചൂടേറിയ വിഷയമായി മാറി. 5,000-ലധികം പുരാവസ്തുക്കൾ ഉള്ള ഈ ശവക്കല്ലറ പുരാതന ഈജിപ്തിനെക്കുറിച്ചും അതിൻ്റെ സംസ്ക്കാരത്തെക്കുറിച്ചും ജനതയോട് സംസാരിച്ചു. ഇപ്പോൾ ഈജിപ്ഷ്യൻ മ്യൂസിയത്തിൽ സൂക്ഷിച്ചിരിക്കുന്ന തൂത്തൻഖാമുൻ്റെ മുഖംമൂടിയാണ് കണ്ടെത്തിയ വസ്തുക്കളിൽ ഏറെ പ്രശസ്തമായത്.
1961 മുതൽ ഈജിപ്ഷ്യൻ ഗവൺമെൻ്റ് ഇവിടേക്ക് ടൂറുകൾ അനുവദിച്ചു. അതേസമയം, ഇവിടെ ഖനനത്തിൽ ഏർപ്പെട്ടിരുന്ന ചില വ്യക്തികളുടെ മരണത്തെ ചിലർ "ഫറവോന്മാരുടെ ശാപം" എന്ന് വിളിച്ചു. തൂത്തൻ ഖാമുൻ്റെ ശവകുടീരത്തിൽ നാല് അറകളും ഒരു പ്രവേശന ഗോവണിയും ഇടനാഴിയും ആണുള്ളത്. അക്കാലത്തെ മറ്റ് ഈജിപ്ഷ്യൻ രാജകീയ ശവകുടീരങ്ങളെ അപേക്ഷിച്ച് ഇത് ചെറുതും വിസ്തൃതമായി അലങ്കരിച്ചതുമാണ്.
ഈ കണ്ടുപിടിത്തം തൂത്തൻഖാമൻ്റെ ഭരണത്തിൻ്റെ ചരിത്രത്തെക്കുറിച്ചും, അതിനു മുമ്പുള്ള കാലഘട്ടത്തെക്കുറിച്ചും പരിമിതമായ തെളിവുകൾ മാത്രമേ നൽകുന്നുള്ളൂവെങ്കിലും, സമ്പന്നരായ പുരാതന ഈജിപ്തുകാരുടെ ഭൗതിക സംസ്ക്കാരത്തെക്കുറിച്ചും, അവരുടെ രീതികളെക്കുറിച്ചും ലോകത്തിന് അറിവ് നൽകുന്നതിൽ സുപ്രധാന പങ്ക് വഹിച്ചു.