മുസഫർപുർ: പുതുവത്സര ആഘോഷങ്ങൾക്കിടെ പൊലീസ് നടത്തിയ റെയ്ഡിൽ ഉരുളക്കിഴങ്ങിനുള്ളിൽ ഒളിപ്പിച്ച നിലയിൽ പഞ്ചാബിൽ നിന്ന് കൊണ്ടുവന്ന 35 ലക്ഷം രൂപയുടെ മദ്യം കണ്ടെടുത്തു (Liquor smuggling).
മുസഫർപൂർ: പുതുവർഷത്തിൻ്റെ വരവിനു ഇനി ദിവസങ്ങൾ മാത്രമാണ് ബാക്കിയുള്ളത്. ഈ ദിവസങ്ങളിൽ മറ്റു സ്ഥലങ്ങളിലെ പോലെ ബിഹാറിലും പുതുവത്സരാഘോഷങ്ങളുടെ ഒരുക്കങ്ങൾ തകൃതിയായി നടക്കുകയാണ്. അതേസമയം , മദ്യമില്ലാതെ ആഘോഷിക്കാൻ കഴിയാത്തവരെ ലക്ഷ്യമിട്ട് ആണ് മദ്യക്കടത്തുകാരുടെ പ്രവർത്തനം. ഇതര സംസ്ഥാനങ്ങളിൽ നിന്ന് മദ്യനിരോധനമുള്ള ബിഹാറിലേക്ക് വൻതോതിൽ മദ്യം എത്തിക്കാൻ മദ്യവ്യാപാരികൾ ദിവസവും പല തന്ത്രങ്ങളും പയറ്റുന്നുണ്ട്. ചിലർ കൃത്യമായി മദ്യം കടത്തുമ്പോൾ, മറ്റുചിലർ പിടിക്കപ്പെടുകയാണ്.
ബീഹാറിൽ ഓരോ ദിവസവും ഏതെങ്കിലും ജില്ലയിൽ മദ്യക്കടത്തുകാരെ പിടികൂടുകയും വൻതോതിൽ വിദേശമദ്യവും കണ്ടെടുക്കുകയും ചെയ്യുന്നത് സാധാരണമായി മാറിയിരിക്കുകയാണ്. ഇത്തവണ ബിഹാറിലെ മുസാഫർപൂരിൽ നിന്നാണ് വൻതോതിൽ മദ്യം കണ്ടെടുത്തിരിക്കുന്നത്. ഡിസംബർ 20 ശനിയാഴ്ച രാവിലെ പഞ്ചാബിൽ നിന്ന് ഉരുളക്കിഴങ്ങിൽ ഒളിപ്പിച്ച് വൻതോതിൽ മദ്യം കൊണ്ടുവരുന്നതായി പോലീസിന് രഹസ്യ വിവരം ലഭിച്ചിരുന്നു. ഈ വിവരത്തിൻ്റെ അടിസ്ഥാനത്തിൽ പോലീസ് റെയ്ഡ് നടത്തി ഒരു ട്രക്ക് നിറയെ മദ്യം പിടികൂടി. പിടികൂടിയ മദ്യത്തിന് 35 ലക്ഷം രൂപ വില വരുമെന്നാണ് പോലീസ് പറയുന്നത്.
പഞ്ചാബിൽ നിന്ന് ബീഹാറിലേക്ക് ഉരുളക്കിഴങ്ങ് ചാക്കിൽ ഒളിപ്പിച്ചാണ് കള്ളക്കടത്തുകാർ മദ്യം കൊണ്ടുവന്നത്. മുസാഫർപൂരിലെ പുതുവത്സര ആഘോഷങ്ങളിൽ ചെലവഴിക്കാൻ ഉദ്ദേശിച്ചായിരുന്നു മദ്യക്കടത്ത്.
ട്രക്കിൽ നിന്ന് 750 എം.എൽ വീതമുള്ള 387 കാർട്ടൺ മദ്യമാണ് പോലീസ് പിടിച്ചെടുത്തത്. പോലീസിന് പെട്ടന്ന് കണ്ടുപിടിക്കാനാകാത്ത വിധം ഉരുളക്കിഴങ്ങ് ചാക്കിനുള്ളിലാണ് മദ്യം സൂക്ഷിച്ചിരുന്നത്. എന്നാൽ ആരോ പോലീസിനെ വിളിച്ച് ഇക്കാര്യം അറിയിച്ചതായി ട്രക്ക് ഡ്രൈവറും കള്ളക്കടത്തുകാരും അറിഞ്ഞില്ല. അതിനാലാണ് ഉത്തർപ്രദേശിൽ നിന്നുള്ള ട്രക്ക് പോലീസിന് അനായാസം കണ്ടെത്താനായത്. റെയിൽവേ ക്രോസിന് സമീപം ട്രക്ക് നിർത്തിയപ്പോൾ പോലീസ് വളയുകയും, പോലീസിനെ കണ്ടതോടെ ഡ്രൈവറും കടത്തുകാരനും ട്രക്ക് ഉപേക്ഷിച്ച് ഓടി രക്ഷപ്പെടുകയുമായിരുന്നു. നിലവിൽ പ്രതികൾക്കായി അന്വേഷണം നടത്തുകയാണ് പോലീസ്.