പാലക്കാട്: നിയമസഭാ തിരഞ്ഞെടുപ്പ് പ്രചാരണത്തിനിടെ പാലക്കാട്ടെ യുഡിഎഫ് സ്ഥാനാർത്ഥി രമേഷ് പിഷാരടിയെ ബിജെപി പ്രവർത്തകർ തടഞ്ഞു (Ramesh Pisharody Palakkad). പാലക്കാട് ടൗൺ സൗത്ത് മണ്ഡലത്തിലെ പര്യടനത്തിനിടെ വടക്കന്തറയിൽ വെച്ചാണ് സംഭവം. ബിജെപി കൗൺസിലർ സിന്ധു രാജന്റെ നേതൃത്വത്തിലുള്ള ഒരു സംഘം പ്രവർത്തകരാണ് സ്ഥാനാർത്ഥിയെ തടഞ്ഞുവെച്ചത്. ബിജെപിയുടെ ശക്തമായ സ്വാധീനമേഖലയായ വടക്കന്തറയിൽ വോട്ട് ചോദിക്കാൻ അനുവദിക്കില്ലെന്ന് വ്യക്തമാക്കിയായിരുന്നു തടസ്സപ്പെടുത്തിയത്. സ്ത്രീകളായ ബിജെപി പ്രവർത്തകരാണ് പര്യടനത്തിന് മുന്നിൽ തടസ്സമായി നിന്നത്.
ബിജെപിയുടെ കോട്ടകളായി കരുതപ്പെടുന്ന മൂത്താന്തറ, വടക്കന്തറ തുടങ്ങിയ മേഖലകളിൽ മുൻപ് ഷാഫി പറമ്പിൽ മത്സരിച്ചപ്പോഴും സമാനമായ രീതിയിൽ പ്രചാരണം തടസ്സപ്പെടുത്തുന്ന സംഭവങ്ങൾ ഉണ്ടായിരുന്നു. ഈ മേഖലകളിൽ എതിർ സ്ഥാനാർത്ഥികളുടെ ഫ്ലക്സുകളോ പോസ്റ്ററുകളോ പോലും സ്ഥാപിക്കാൻ ബിജെപി പ്രവർത്തകർ അനുവദിക്കാറില്ലെന്ന് യുഡിഎഫ് ആരോപിക്കുന്നു.
ജനാധിപത്യപരമായ രീതിയിൽ വോട്ട് ചോദിക്കാനുള്ള സ്ഥാനാർത്ഥിയുടെ അവകാശത്തെ തടയുന്നത് അംഗീകരിക്കാനാവില്ലെന്ന് യുഡിഎഫ് പ്രവർത്തകർ വ്യക്തമാക്കി. സംഭവസ്ഥലത്ത് യുഡിഎഫ് പ്രവർത്തകർ പ്രതിഷേധം രേഖപ്പെടുത്തിയതോടെ നേരിയ തോതിൽ സംഘർഷാവസ്ഥ ഉടലെടുത്തു.
സംഭവത്തെത്തുടർന്ന് പ്രദേശത്ത് പോലീസ് സുരക്ഷ ശക്തമാക്കിയിട്ടുണ്ട്. തിരഞ്ഞെടുപ്പ് പ്രചാരണം അവസാന ഘട്ടത്തിലേക്ക് കടക്കവെ മണ്ഡലത്തിലെ രാഷ്ട്രീയ പോര് കടുക്കുന്നതിന്റെ സൂചനയായാണ് ഈ സംഭവം വിലയിരുത്തപ്പെടുന്നത്.
Story Summary:
UDF candidate Ramesh Pisharody was blocked by BJP workers during his election campaign in Vadakkanthara, Palakkad. Led by BJP councillor Sindhu Rajan, the group prevented Pisharody from seeking votes in the area, which is considered a BJP stronghold. UDF workers protested the move, citing similar incidents in previous elections involving Shafi Parambil.
