ബെംഗളൂരു: ഓരോ ദിവസം കഴിയുംതോറും സൈബർ തട്ടിപ്പുകാർ തട്ടിപ്പിന് പുതിയ വഴികൾ കണ്ടെത്തുകയാണെന്നാണ് സമീപകാല അനുഭവങ്ങൾ നമ്മെ പഠിപ്പിക്കുന്നത് (Cyber criminals). ലാഭകരമായ സഹകരണ അവസരങ്ങൾ വാഗ്ദാനം ചെയ്യുന്ന ബ്രാൻഡുകളുടെയോ ഏജൻസികളുടെയോ വേഷത്തിൽ സോഷ്യൽ മീഡിയ സ്വാധീനമുള്ളവരെ, പ്രത്യേകിച്ച് സ്ത്രീകളെ ലക്ഷ്യമിടുന്നതാണ് സമീപകാല പ്രവണതയെന്നാണ് ഇപ്പോൾ പുറത്ത് വരുന്ന റിപ്പോർട്ടുകൾ.
പ്രൊഫഷണൽ പങ്കാളിത്തത്തിൻ്റെ പേരിൽ സ്ത്രീകളുടെ സ്വകാര്യ വിവരങ്ങളും ഫോട്ടോകളും വീഡിയോകളും ഈ തട്ടിപ്പുകാർ ആവശ്യപ്പെടുന്നു. തുടർന്ന് ആർട്ടിഫിഷ്യൽ ഇൻ്റലിജൻസും (AI) ഡീപ്ഫേക്ക് സാങ്കേതികവിദ്യയും ഉപയോഗിച്ച്, അവ കൃത്രിമമായി കൈകാര്യം ചെയ്യുന്നു. പിന്നെ ഇതുകാട്ടി ബ്ലാക്ക്‌മെയിലും പണം തട്ടിപ്പും നടത്തുകയാണ് ഇത്തരക്കാരുടെ ലക്ഷ്യം. വർദ്ധിച്ചുവരുന്ന ഈ പ്രവണതയെക്കുറിച്ച് ബാംഗ്ലൂർ പോലീസ് ആണ് മുന്നറിയിപ്പ് നൽകിയിരിക്കുന്നത്.
വ്യാജ പാർട്ണര്ഷിപ്പ് അവസരങ്ങൾ ഉപയോഗിച്ച് സോഷ്യൽ മീഡിയ സ്വാധീനമുള്ളവരെ വശീകരിച്ച് സൈബർ കുറ്റവാളികൾ സോഷ്യൽ മീഡിയ പ്ലാറ്റ്‌ഫോമുകളെ ചൂഷണം ചെയ്യുകയാണെന്നാണ് പോലീസ് പറയുന്നത്. വ്യക്തിഗത വിവരങ്ങളും ഫോട്ടോകളും വീഡിയോകളുമാണ് സൈബർ തട്ടിപ്പുകാർ ആദ്യം ശേഖരിക്കുന്നത്. ഇരയെ ഭീഷണിപ്പെടുത്താൻ അവർ ചിത്രങ്ങളെ മോർഫ് ചെയ്ത് നഗ്നചിത്രങ്ങളും മറ്റുമാക്കി മാറ്റുന്നു. തുടർന്ന് ഈ ചിത്രങ്ങളോ വീഡിയോകളോ കുടുംബാംഗങ്ങൾക്ക് അയക്കുമെന്നോ സോഷ്യൽ മീഡിയയിൽ പോസ്റ്റ് ചെയ്യുമെന്നോ ഭീഷണിപ്പെടുത്തി പണം തട്ടുന്നതാണ് രീതിയെന്ന് സിറ്റി പോലീസ് കമ്മീഷണർ ബി ദയാനന്ദ പറയുന്നു.
അതിനാൽ, സോഷ്യൽ നെറ്റ്‌വർക്കുകളിൽ അപരിചിതരുമായി ചാറ്റുചെയ്യുന്നത് ഒഴിവാക്കണം. ഇത്തരം സന്ദർഭങ്ങളിൽ, സൈബർ ക്രൈം ഹെൽപ്പ് ലൈൻ നമ്പറായ '1930' എന്ന നമ്പറിൽ ബന്ധപ്പെടാനോ അടുത്തുള്ള പോലീസ് സ്റ്റേഷനിൽ പരാതി നൽകാനോ പോലീസ് ജനങ്ങളോട് അഭ്യർത്ഥിച്ചു.
പരസ്യങ്ങൾക്കും പാർട്ണർഷിപ്പുകൾക്കുമായി ഓഫറുകൾ നൽകുന്ന യുവ ഉള്ളടക്ക സ്രഷ്‌ടാക്കളുടെ അക്കൗണ്ടുകൾ സൈബർ കുറ്റവാളികൾ നിരീക്ഷിക്കുന്നുണ്ടെന്നും പോലീസ് പറഞ്ഞു. കൂടുതലും യുവതികളാണ് ഇത്തരം തട്ടിപ്പിന് ഇരയാകുന്നത്. വ്യാജ ചിത്രങ്ങളോ വീഡിയോകളോ സൃഷ്‌ടിച്ചായിരിക്കും ഇവരുടെ ഭീഷണി. സോഷ്യൽ മീഡിയ ഉപയോഗിക്കുന്നവർ ഇത്തരം തട്ടിപ്പുകാരെ കരുതിയിരിക്കണമെന്നും പോലീസ് പറയുന്നു. ബ്രാൻഡുകളുമായോ ഏജൻസികളുമായോ നിങ്ങളെ സമീപിച്ചാൽ , അവരുടെ ആധികാരികത പരിശോധിക്കുന്നതിന് ഔദ്യോഗിക ചാനലുകൾ വഴി നേരിട്ട് ബന്ധപ്പെടാൻ പോലീസ് നിർദ്ദേശിക്കുന്നു.
കൂടാതെ, നിങ്ങളുടെ സ്വന്തം ഉള്ളടക്കത്തിൻ്റെ ഒരു വീഡിയോ നൽകാൻ സ്കാമർമാർ നിങ്ങളോട് ആവശ്യപ്പെടുന്നു. എന്നിട്ട് അവയെ മോർഫ് ചെയ്തു പണം തട്ടിയെടുക്കാൻ ശ്രമിക്കുന്നു. ചില സന്ദർഭങ്ങളിൽ, തട്ടിപ്പുകാർ ഫോമുകളുടെ രൂപത്തിൽ APK ലിങ്കുകൾ അയയ്ക്കുന്നു. സെൻസിറ്റീവ് ഡാറ്റ മോഷ്ടിക്കാനാണ് ഇവ ഉപയോഗിക്കുന്നതെന്നും പോലീസ് ഉദ്യോഗസ്ഥർ പറഞ്ഞു.