പട്‌ന: ബീഹാറിൽ സൈബർ കുറ്റകൃത്യങ്ങൾ അതിവേഗം വർധിക്കുന്നതായി റിപ്പോർട്ട്. പ്രത്യേകിച്ചും, "ഡിജിറ്റൽ അറസ്റ്റ്" എന്ന പേരിൽ തട്ടിപ്പ് കേസുകൾ തുടർച്ചയായി നടക്കുന്നതായാണ് കണക്കുകൾ വ്യക്തമാക്കുന്നത് (Digital arrest). ഈ വർഷം ജനുവരി മുതൽ 10 കോടിയിലധികം രൂപയുടെ തട്ടിപ്പ് നടന്നതായും , 320 ലധികം കേസുകൾ രജിസ്റ്റർ ചെയ്തതായുംകണ് കണക്കുകൾ വ്യക്തമാക്കുന്നത്.
സംസ്ഥാനത്തെ 40 സൈബർ പോലീസ് സ്റ്റേഷനുകളിലായി ഈ വർഷം ഇതുവരെ സൈബർ കുറ്റകൃത്യങ്ങളുമായി ബന്ധപ്പെട്ട് 9,000 ലധികം കേസുകൾ രജിസ്റ്റർ ചെയ്തിട്ടുണ്ട്. ഇതിൽ, എടിഎം വഴിയും, ഫോണിൽ വിളിച്ച് പാസ്‌വേഡ് ചോദിച്ച് മറ്റ് മാർഗങ്ങളിലൂടെയും നടത്തിയ തട്ടിപ്പ് കേസുകൾ കൂടുതലാണ്. അതേസമയം , ഇത്തവണ ഡിജിറ്റൽ അറസ്റ്റ് കേസുകൾ മുൻവർഷങ്ങളെ അപേക്ഷിച്ച് 8 മുതൽ 10 മടങ്ങ് വരെ വർധിച്ചിട്ടുണ്ട്.
സംസ്ഥാനത്ത് ഡിജിറ്റൽ അറസ്റ്റിൻ്റെ കേസുകൾ തുടർച്ചയായി പുറത്തു വരുന്നു. ഡിജിറ്റൽ അറസ്റ്റിൽ, സൈബർ കുറ്റവാളികൾ പോലീസിൻ്റെയോ നിയമ നിർവ്വഹണ ഏജൻസിയുടെയോ ഉദ്യോഗസ്ഥരായി നടിച്ച് ആളുകളെ ഭീഷണിപ്പെടുത്തുകയും അവരിൽ നിന്ന് പണം തട്ടുകയും ചെയ്യുന്നു. തങ്ങൾ ചില കുറ്റകൃത്യങ്ങളിൽ ഏർപ്പെട്ടിട്ടുണ്ടെന്നും പണം നൽകിയില്ലെങ്കിൽ അറസ്റ്റ് ചെയ്യുമെന്നും അവർ ആളുകളോട് പറഞ്ഞാണ് ഭീഷണിപ്പെടുത്തി വലയിൽ വീഴ്തുന്നത്. ഇത്തരം സാഹചര്യത്തിൽ ജനങ്ങൾ ജാഗ്രത പാലിക്കണമെന്നാണ് അധികൃതർ നൽകുന്ന നിർദ്ദേശം.
അജ്ഞാത നമ്പറിൽ നിന്നുള്ള കോളുകളോടും സന്ദേശങ്ങളോടും പ്രതികരിക്കരുത്. ഒരു പോലീസുകാരനും ഫോണിലൂടെയോ വീഡിയോ കോളിലൂടെയോ മൊഴി എടുക്കുകയോ അറസ്റ്റ് ചെയ്യുകയോ ചെയ്യില്ലെന്ന കാര്യം പൊതുജനങ്ങൾ ഓർക്കണം. നിങ്ങൾ വഞ്ചനയുടെ ഇരയാണെന്ന് നിങ്ങൾക്ക് തോന്നുന്നുവെങ്കിൽ, ഉടൻ തന്നെ 1930 എന്ന നമ്പറിൽ വിളിക്കുക. സൈബർ കുറ്റവാളികൾ നിരന്തരം പുതിയ രീതികൾ സ്വീകരിക്കുന്നു. ഇത്തരം തട്ടിപ്പുകളെ കുറിച്ച് ജനങ്ങൾക്ക് അറിവില്ല. അത്തരമൊരു സാഹചര്യത്തിൽ, സൈബർ തട്ടിപ്പുകാരുടെ കെണിയിൽ ഒരാൾ എളുപ്പത്തിൽ വീഴാനും സാധ്യതകളുണ്ട്.
ഈ പ്രശ്നം പരിഹരിക്കാൻ സർക്കാരും പോലീസും നിരവധി നടപടികൾ സ്വീകരിച്ചുവരികയാണ്. എല്ലാ സൈബർ പോലീസ് സ്റ്റേഷനുകളിലും ബോധവൽക്കരണ കാമ്പെയ്‌നുകൾ നടക്കുന്നു, അതിനാൽ ആളുകൾക്ക് ജാഗ്രത പാലിക്കാൻ കഴിയും. സൈബർ തട്ടിപ്പ് ഗുരുതരമായ പ്രശ്നമായി മാറുകയാണ്. ജനങ്ങൾ ജാഗ്രത പാലിക്കുകയും സംശയാസ്പദമായ എന്തെങ്കിലും പ്രവർത്തനങ്ങൾ ശ്രദ്ധയിൽപ്പെട്ടാൽ പോലീസിൽ അറിയിക്കുകയും വേണം.