തിരുവനന്തപുരം: സോഷ്യൽ മീഡിയ ഇൻഫ്ലുവൻസറും അന്തരിച്ച നടൻ കൊല്ലം സുധിയുടെ ഭാര്യയുമായ രേണു സുധിയുടെ ക്യാൻസർ ചികിത്സയും രോഗാവസ്ഥയും കെട്ടിച്ചമച്ചതാണെന്ന് പ്രചരിപ്പിക്കുന്നവർക്കെതിരെ കടുത്ത പ്രതികരണവുമായി രേണുവിന്റെ സഹോദരി രംഗത്ത്. രേണുവിന് നൽകുന്ന മരുന്നുകളുടെ കുറിപ്പടിയും അവയുടെ യഥാർത്ഥ വിലയും വീഡിയോയിലൂടെ പരസ്യമാക്കിയാണ് സഹോദരി വ്യാജ പ്രചാരണങ്ങൾക്ക് മറുപടി നൽകിയത്. രേണുവിന് ബ്രെസ്റ്റ് ക്യാൻസറിന്റെ അതിതീവ്ര വിഭാഗത്തിൽപ്പെടുന്ന ‘HER2-Positive’ ആണെന്നും ഇത് ശരീരത്തിൽ വേഗത്തിൽ പടരുന്ന ഒന്നാണെന്നും സഹോദരി വ്യക്തമാക്കി.
ചില വ്ലോഗർമാരും സോഷ്യൽ മീഡിയ പ്രൊഫൈലുകളും രേണുവിന്റെ ചികിത്സാ ചിലവുകളെക്കുറിച്ച് തെറ്റായ വിവരങ്ങൾ പ്രചരിപ്പിക്കുന്ന പശ്ചാത്തലത്തിലാണ് കുടുംബം പ്രതികരണവുമായി എത്തിയത്. സർക്കാർ മെഡിക്കൽ കോളേജിൽ ഒരു ഇഞ്ചക്ഷന് രണ്ട് ലക്ഷം രൂപയാകില്ലെന്നും തങ്ങൾക്ക് അയ്യായിരം രൂപയ്ക്കാണ് ക്യാൻസർ മരുന്ന് ലഭിച്ചതെന്നും കാണിച്ച് ചിലർ തെറ്റിദ്ധാരണ പരത്തുന്നുണ്ടെന്ന് സഹോദരി ചൂണ്ടിക്കാട്ടി.
“ക്യാൻസർ പല തരത്തിലുണ്ട്, അതിന്റെ സ്റ്റേജുകളും ചികിത്സാ രീതികളും വ്യത്യസ്തമാണ്. HER2-Negative ഉള്ളവർക്ക് സാധാരണ കീമോതെറാപ്പി മാത്രം മതിയാകും. എന്നാൽ രേണുവിന്റേത് ശരീരത്തിൽ അതിവേഗം പടരുന്ന ടാർഗെറ്റഡ് തെറാപ്പി (Targeted Therapy) ആവശ്യമുള്ള ക്യാൻസറാണ്. ഇതിനായി തിരുവനന്തപുരം മെഡിക്കൽ കോളേജിൽ നിന്നും വാങ്ങുന്ന ഇഞ്ചക്ഷന് മാത്രം 2,02,628 രൂപയാണ് വില. ഓരോ കീമോയ്ക്ക് മുൻപും ഈ ഇഞ്ചക്ഷൻ എടുക്കണം. ആകെ ആറ് കീമോയാണ് ഡോക്ടർമാർ നിർദ്ദേശിച്ചിട്ടുള്ളത്. ഇതിനുശേഷമായിരിക്കും സർജറി.” – സഹോദരി വ്യക്തമാക്കി.
രേണു ആശുപത്രിയിലല്ലെന്നും സാമ്പത്തിക ലാഭത്തിനായി കഥയുണ്ടാക്കുകയാണെന്നുമുള്ള ആക്ഷേപങ്ങൾക്കെതിരെയും കുടുംബം വികാരാധീനരായി സംസാരിച്ചു. കീമോതെറാപ്പിയുടെ സൈഡ് എഫക്റ്റുകൾ കാരണം കൗണ്ട് കുറയുന്നതും, ഛർദ്ദിയും വയറിളക്കവും അനുഭവിച്ച് ഐസിയുവിൽ പ്രവേശിക്കേണ്ടി വരുന്നതുമായ അവസ്ഥ നേരിട്ട് കണ്ട് ബോധ്യമുള്ളവർക്ക് മാത്രമേ ഇതിന്റെ തീവ്രത മനസ്സിലാകൂ എന്ന് സഹോദരി പറഞ്ഞു.
രേണുവിന് ഒരു ചെറിയ കുഞ്ഞുണ്ടെന്നും അവൾ ആരോഗ്യത്തോടെ എഴുന്നേറ്റ് വരണമെന്നാണ് കുടുംബവും ആഗ്രഹിക്കുന്നതെന്നും വ്യക്തമാക്കിയ സഹോദരി, സഹായിക്കാൻ മനസ്സില്ലെങ്കിൽ പോലും ഇത്തരം വ്യാജ പ്രചാരണങ്ങൾ നടത്തി ദ്രോഹിക്കരുതെന്നും സ്നേഹിക്കുന്നവരുടെ പ്രാർത്ഥന മാത്രം മതിയെന്നും കൂട്ടിച്ചേർത്തു.
Story Summary: Renu Sudhi’s sister released medical bills to counter online allegations that Renu’s cancer diagnosis and the two-lakh rupee cost per injection were fabricated. She explained that Renu is battling aggressive HER2-positive breast cancer, requiring targeted therapy injections costing ₹2,02,628 each at Trivandrum Medical College, and urged people to stop spreading misinformation.