ഫൂ ക്വോക്ക്: വിയറ്റ്നാമിലെ വിനോദസഞ്ചാര ദ്വീപായ ഫൂ ക്വോക്കിന് സമീപം ഇന്ത്യൻ വിനോദസഞ്ചാരികൾ സഞ്ചരിച്ച സ്പീഡ് ബോട്ട് മറിഞ്ഞ് രണ്ട് മലയാളികൾ ഉൾപ്പെടെ 15 പേർ മരിച്ചു (Vietnam boat tragedy). കൊല്ലം കൊട്ടാരക്കര സ്വദേശികളായ വിക്ടറി വ്യവസായ ഗ്രൂപ്പ് ഉടമ എ.സി. തോമസ്, ഭാര്യ ലൊവേനി എന്നിവരാണ് അപകടത്തിൽപ്പെട്ട മലയാളികൾ. ഇവരുടെ മരണം കൊടിക്കുന്നിൽ സുരേഷ് എം.പി സ്ഥിരീകരിച്ചു. അപകടത്തിൽ മരിച്ചവരിൽ ഭൂരിഭാഗവും തമിഴ്നാട് സ്വദേശികളാണ്. രണ്ട് സ്ത്രീകളും 13 പുരുഷന്മാരുമാണ് ദുരന്തത്തിൽ ഇരയായത്.
ബോട്ടിലുണ്ടായിരുന്ന 39 പേരിൽ 21 പേരെ വിയറ്റ്നാം രക്ഷാസേനയ്ക്ക് ജീവനോടെ പുറത്തെടുക്കാനായി. മരിച്ചവരിൽ തമിഴ്നാട് പഴനി സ്വദേശിയായ മുരുകപ്രഭു (44), നാല് ആന്ധ്രാപ്രദേശ് സ്വദേശികൾ എന്നിവരും ഉൾപ്പെടുന്നു. ലാവ മൊബൈൽ കമ്പനിയുടെ വിതരണക്കാരനായ മുരുകപ്രഭുവിനെ, മികച്ച പ്രവർത്തനത്തിനുള്ള അംഗീകാരമായി കമ്പനിയാണ് വിദേശയാത്രയ്ക്ക് അയച്ചിരുന്നത്. ‘മിൻ ഹുയ് ഫൂ ക്വോക്ക് ട്രേഡിംഗ് ടൂറിസം’ കമ്പനിയുടെ ഉടമസ്ഥതയിലുള്ള ബോട്ട് മേ റൂട്ട് എൻഗോയ് ദ്വീപിൽ നിന്ന് അൻ തോയ് തുറമുഖത്തേക്ക് മടങ്ങുന്നതിനിടെയാണ് അപകടത്തിൽപ്പെട്ടത്. യാത്ര തിരിച്ച് 400 മീറ്റർ പിന്നിട്ടപ്പോഴേക്കും പ്രാദേശിക സമയം ഉച്ചയ്ക്ക് ഒന്നോടെ ശക്തമായ കാറ്റിലും കടൽക്ഷോഭത്തിലും പെട്ട് ബോട്ട് തലകീഴായി മറിയുകയായിരുന്നു.
ദുരന്തത്തിൽ പ്രധാനമന്ത്രി നരേന്ദ്ര മോദിയും പ്രതിപക്ഷ നേതാവ് രാഹുൽ ഗാന്ധിയും ആദരാഞ്ജലികൾ അർപ്പിച്ചു. പരിക്കേറ്റവർക്ക് മികച്ച ചികിത്സ ഉറപ്പാക്കാനും മരിച്ചവരുടെ മൃതദേഹങ്ങൾ നാട്ടിലെത്തിക്കാനുള്ള നിയമനടപടികൾ വേഗത്തിലാക്കാനും വിയറ്റ്നാം അധികൃതരുമായി ചേർന്ന് ഇന്ത്യൻ നയതന്ത്ര ഉദ്യോഗസ്ഥർ സജീവമായി രംഗത്തുണ്ടെന്ന് പ്രധാനമന്ത്രി അറിയിച്ചു. വിയറ്റ്നാം സൈന്യവും പോലീസും സിവിൽ രക്ഷാപ്രവർത്തകരും ചേർന്നാണ് നിലവിൽ രക്ഷാപ്രവർത്തനം നടത്തുന്നത്. പരിക്കേറ്റ് ആശുപത്രിയിൽ കഴിയുന്ന ചിലരുടെ നില അതീവ ഗുരുതരമായി തുടരുകയാണ്.
Story Summary: Two Keralites from Kottarakkara were among the 15 Indian tourists killed after a speed boat capsized off Phu Quoc island in Vietnam. Prime Minister Narendra Modi and Opposition Leader Rahul Gandhi condoled the deaths, while Indian officials are coordinating with Vietnamese authorities to assist the victims.
