വാഷിംഗ്ടൺ: ലോകസമ്പന്നൻ ഇലോൺ മസ്കിന്റെ ഉടമസ്ഥതയിലുള്ള ബഹിരാകാശ ഗവേഷണ സ്ഥാപനമായ സ്പേസ് എക്സും (SpaceX), ആർട്ടിഫിഷ്യൽ ഇന്റലിജൻസ് കമ്പനിയായ എക്സ്.എ.ഐയും (xAI) തമ്മിൽ ലയിച്ചു (Elon Musk SpaceX xAI Merger). ഈ വർഷം അവസാനം സ്പേസ് എക്സ് ഓഹരി വിപണിയിൽ ലിസ്റ്റ് ചെയ്യപ്പെടാനിരിക്കെയാണ് മസ്കിന്റെ സാമ്രാജ്യത്തിലെ പ്രധാനപ്പെട്ട രണ്ട് കമ്പനികൾ ഒന്നാകുന്നത്. ഇതോടെ സ്പേസ് എക്സിന്റെ മൂല്യം 1 ട്രില്യൺ ഡോളറിൽ (ഏകദേശം 83 ലക്ഷം കോടി രൂപ) കവിയുമെന്നാണ് സാമ്പത്തിക വിദഗ്ധരുടെ കണക്കുകൂട്ടൽ. ആർട്ടിഫിഷ്യൽ ഇന്റലിജൻസ്, റോക്കറ്റുകൾ, സ്പേസ് ഇന്റർനെറ്റ് എന്നിവ സമന്വയിപ്പിച്ചുകൊണ്ടുള്ള ലോകത്തിലെ ഏറ്റവും വലിയ അത്യാധുനിക സാങ്കേതിക വിദ്യയുടെ കേന്ദ്രമായി ഈ ലയനത്തിലൂടെ കമ്പനി മാറും.
ഭൂമിയിലെ ഡാറ്റാ സെന്ററുകൾ നേരിടുന്ന വൈദ്യുതിക്ഷാമവും ചൂടും പരിഹരിക്കാൻ ബഹിരാകാശത്ത് ഡാറ്റാ സെന്ററുകൾ സ്ഥാപിക്കുക എന്ന വലിയ ലക്ഷ്യമാണ് മസ്കിനുള്ളത്. എഐ വികസിപ്പിക്കാൻ ആവശ്യമായ ഭീമമായ ഊർജ്ജം ഭൂമിയിലെ പരിസ്ഥിതിക്ക് ദോഷകരമാകാതെ കണ്ടെത്താൻ ബഹിരാകാശത്തെ ഡാറ്റാ സെന്ററുകളും സോളാർ ഉപഗ്രഹങ്ങളും സഹായിക്കുമെന്ന് ലയന വാർത്ത പുറത്തുവിട്ടുകൊണ്ട് കമ്പനി വ്യക്തമാക്കി. ഇതോടെ എക്സ്.എ.ഐയുടെ ഉടമസ്ഥതയിലുള്ള ‘ഗ്രോക്ക്’ (Grok) ചാറ്റ് ബോട്ട്, സോഷ്യൽ മീഡിയ പ്ലാറ്റ്ഫോമായ ‘എക്സ്’ എന്നിവയും ഇനി സ്പേസ് എക്സിന്റെ ഭാഗമാകും.
എക്സ്.എ.ഐയുടെ മൂല്യം അടുത്തിടെ 230 ബില്യൺ ഡോളറായി വർദ്ധിച്ചിരുന്നു. ടെസ്ലയുൾപ്പെടെയുള്ള മസ്കിന്റെ മറ്റ് കമ്പനികൾ എക്സ്.എ.ഐയിൽ വൻതോതിൽ നിക്ഷേപം നടത്തിവരികയായിരുന്നു. എന്നാൽ, എക്സ്.എ.ഐയിലെ ചില ഉള്ളടക്കങ്ങൾ വിവാദത്തിലായതും ജെഫ്രി എപ്സ്റ്റീൻ കേസുമായി ബന്ധപ്പെട്ട പുതിയ ഫയലുകളിൽ മസ്കിന്റെ പേര് പരാമർശിക്കപ്പെട്ടതും ഈ നീക്കത്തിന് പിന്നിലെ ചർച്ചാവിഷയങ്ങളാകുന്നുണ്ട്. എങ്കിലും, ബഹിരാകാശ സാങ്കേതിക വിദ്യയെയും ആർട്ടിഫിഷ്യൽ ഇന്റലിജൻസിനെയും യോജിപ്പിച്ചുകൊണ്ടുള്ള ഈ നീക്കം ശാസ്ത്രലോകത്ത് വലിയ മാറ്റങ്ങൾ കൊണ്ടുവരുമെന്ന് ഉറപ്പാണ്.
Summary: Elon Musk has merged SpaceX with his AI company xAI to create a vertically integrated innovation engine focused on space-based AI and datacenters.
