ടെഹ്റാൻ: അമേരിക്കൻ വ്യോമാക്രമണങ്ങൾക്ക് പകരമായി ബഹ്റൈനിലെയും കുവൈറ്റിലെയും ഡസൻകണക്കിന് യുഎസ് സൈനിക താവളങ്ങൾക്ക് നേരെ ഇറാൻ ശക്തമായ ആക്രമണം നടത്തിയതായി റിപ്പോർട്ട്. ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സ് രാത്രിയോടെയാണ് ഇരു രാജ്യങ്ങളിലെയും യുഎസ് കേന്ദ്രങ്ങൾക്ക് നേരെ മിസൈലുകളും ഡ്രോണുകളും ഉപയോഗിച്ച് സംയുക്ത ആക്രമണം നടത്തിയത്. ഇറാന്റെ ഔദ്യോഗിക വാർത്താ മാധ്യമമാണ് റെവല്യൂഷണറി ഗാർഡിന്റെ പ്രസ്താവന പുറത്തുവിട്ടത്.(Iran IRGC Strikes US Military Facilities In Bahrain And Kuwait Shoots Down Drone)
അമേരിക്ക നടത്തിയ ആക്രമണങ്ങൾക്കുള്ള ആദ്യഘട്ട മറുപടിയാണിതെന്ന് ഇറാൻ വ്യക്തമാക്കി. ഐആർജിസിയുടെ നേവിയും എയറോസ്പേസ് വിഭാഗവും സംയുക്തമായി നടത്തിയ നീക്കത്തിലൂടെ ഇരു രാജ്യങ്ങളിലുമായി പ്രവർത്തിക്കുന്ന 85 പ്രധാന യുഎസ് സൈനിക കേന്ദ്രങ്ങൾ തകർത്തതായാണ് പ്രസ്താവനയിൽ അവകാശപ്പെടുന്നത്. ആക്രമണത്തിനിടെ അമേരിക്കയുടെ അത്യാധുനിക എംക്യു-9 (MQ-9) റീപ്പർ ഡ്രോൺ വെടിവെച്ചിട്ടതായും ഇറാൻ സൈന്യം അറിയിച്ചു.
പശ്ചിമേഷ്യയിൽ യുഎസും ഇറാനും തമ്മിലുള്ള സൈനിക സംഘർഷം പുതിയ യുദ്ധമുഖത്തേക്ക് വഴിമാറുന്നു എന്ന സൂചനകളാണ് ഈ ആക്രമണത്തോടെ പുറത്തുവരുന്നത്. ആക്രമണത്തിൽ ഉണ്ടായ നാശനഷ്ടങ്ങളെക്കുറിച്ചോ ആളപായത്തെക്കുറിച്ചോ ഉള്ള ഔദ്യോഗിക വിവരങ്ങൾ അമേരിക്കൻ പ്രതിരോധ മന്ത്രാലയം ഇതുവരെ പുറത്തുവിട്ടിട്ടില്ല.
Story Summary
Iran’s Islamic Revolutionary Guard Corps (IRGC) announced that it launched a massive joint missile and drone strike targeting 85 key US military facilities in Bahrain and Kuwait overnight. The IRGC claimed the operation was an initial response to recent US aggression and stated they also shot down a US MQ-9 Reaper drone.
