ന്യൂഡൽഹി : ഇൻസ്റ്റഗ്രാം ഉപയോക്താക്കളുടെ സ്വകാര്യതയ്ക്ക് വൻ ഭീഷണിയുയർത്തിക്കൊണ്ട് മെറ്റ തങ്ങളുടെ പുതിയ ആർട്ടിഫിഷ്യൽ ഇന്റലിജൻസ് (AI) ചിത്ര നിർമ്മാണ ടൂളായ ‘മ്യൂസ് ഇമേജ്’ (Muse Image) അവതരിപ്പിച്ചു. മെറ്റാ സൂപ്പർഇന്റലിജൻസ് ലാബ്സ് വികസിപ്പിച്ച ഈ ഇൻ-ഹൗസ് ടൂൾ നിലവിൽ മെറ്റാ AI ആപ്പ്, ഇൻസ്റ്റഗ്രാം സ്റ്റോറീസ്, വാട്സാപ്പ് ചാറ്റുകൾ എന്നിവയിൽ ലഭ്യമാക്കിയിട്ടുണ്ട്. താമസിയാതെ ഇത് ഫേസ്ബുക്കിലും മെസഞ്ചറിലും എത്തും.
ലളിതമായ ടെക്സ്റ്റ് നിർദ്ദേശങ്ങളിലൂടെ മികച്ച ചിത്രങ്ങൾ നിർമ്മിക്കാൻ സാധിക്കുന്ന ടൂളാണിത്. ഒന്നിലധികം ചിത്രങ്ങൾ കൂട്ടിച്ചേർക്കാനും, ചിത്രത്തിലെ ചില ഭാഗങ്ങൾ മാത്രം എഡിറ്റ് ചെയ്യാനും, ക്യൂആർ കോഡുകൾ വരെ കൃത്യതയോടെ നിർമ്മിക്കാനും മ്യൂസ് ഇമേജിന് സാധിക്കും. ഏറ്റവും ആശങ്കപ്പെടുത്തുന്ന കാര്യം, ഇൻസ്റ്റഗ്രാമിൽ പബ്ലിക് അക്കൗണ്ടുള്ള ഏതൊരു വ്യക്തിയുടെയും ചിത്രങ്ങൾ അവരുടെ അനുവാദമില്ലാതെ മറ്റൊരാൾക്ക് AI ചിത്രങ്ങൾ നിർമ്മിക്കാൻ ഉപയോഗിക്കാം എന്നതാണ്.
മെറ്റാ AI പ്രോംപ്റ്റിൽ ഏതെങ്കിലും ഒരു പബ്ലിക് ഇൻസ്റ്റഗ്രാം അക്കൗണ്ട് ടാഗ് ചെയ്താൽ, സിസ്റ്റം ആ പ്രൊഫൈലിൽ നിന്നുള്ള ചിത്രങ്ങൾ സ്വയം ശേഖരിക്കുകയും ആ വ്യക്തിയുടെ മുഖവും രൂപവും ഉപയോഗിച്ച് പുതിയ AI ചിത്രങ്ങൾ നിർമ്മിക്കുകയും ചെയ്യും. ഇതിനായി ചിത്രത്തിന്റെ ഉടമസ്ഥന്റെ അനുവാദം വാങ്ങുകയോ അവർക്ക് യാതൊരുവിധ നോട്ടിഫിക്കേഷനും നൽകുകയോ ഇല്ല. പബ്ലിക് അക്കൗണ്ടുകളിൽ ഈ സെറ്റിംഗ്സ് മെറ്റാ ‘ബൈ ഡിഫോൾട്ട്’ ആയി ഓൺ ആക്കി വെച്ചിരിക്കുകയാണ്. അതായത്, നിങ്ങളുടെ അറിവോ സമ്മതമോ ഇല്ലാതെ നിങ്ങളുടെ ചിത്രങ്ങൾ മറ്റാരെങ്കിലും AI വഴി ദുരുപയോഗം ചെയ്താൽ പോലും നിങ്ങൾക്കത് കണ്ടെത്താൻ കഴിയില്ല.
AI വഴി നിർമ്മിക്കുന്ന ചിത്രങ്ങളിൽ തിരിച്ചറിയലിനായി കാണാനാകാത്ത ‘കണ്ടന്റ് സീൽ’ വാട്ടർമാർക്ക് ഉൾപ്പെടുത്തുമെന്നാണ് മെറ്റാ വ്യക്തമാക്കുന്നത്. എന്നാൽ ഇത് ചിത്രം നിർമ്മിച്ചത് AI ആണെന്ന് തെളിയിക്കാൻ മാത്രമാണ് സഹായിക്കുക. നിങ്ങളുടെ അനുവാദമില്ലാതെ മറ്റൊരാൾ നിങ്ങളുടെ മുഖം ഉപയോഗിക്കുന്നത് തടയാൻ ഇതിനാവില്ല. നിങ്ങളുടെ ഇൻസ്റ്റഗ്രാം ചിത്രങ്ങൾ മെറ്റ AI ദുരുപയോഗം ചെയ്യുന്നത് പൂർണ്ണമായി തടയാൻ താഴെ പറയുന്ന സ്റ്റെപ്പുകൾ ഉടൻ ചെയ്യുക:
നിങ്ങളുടെ Instagram App തുറന്ന് പ്രൊഫൈൽ പേജിലേക്ക് പോകുക.
മുകളിൽ വലതുവശത്തുള്ള മൂന്ന് വരകളിൽ ക്ലിക്ക് ചെയ്യുക.
താഴേക്ക് സ്ക്രോൾ ചെയ്ത് “Sharing and reuse” എന്ന ഓപ്ഷൻ തിരഞ്ഞെടുക്കുക.
അതിൽ “Allow people to use your content on Instagram and with AI features on Meta” എന്ന ഭാഗം കണ്ടെത്തുക.
ഇവിടെയുള്ള “Posts” എന്നതിനടുത്തുള്ള ടോഗ്ഗിൾ ബട്ടൺ ഓഫ് ചെയ്യുക.
ഒപ്പം “Reels” എന്ന ഓപ്ഷനും ഓഫ് ചെയ്തു വെക്കുക.
ഇതോടെ ഭാവിയിൽ നിങ്ങളുടെ പബ്ലിക് ചിത്രങ്ങൾ ആർക്കും AI നിർമ്മാണത്തിനായി ഉപയോഗിക്കാൻ കഴിയില്ല. നിങ്ങൾ ഈ സെറ്റിംഗ്സ് ഓഫ് ചെയ്യുന്നതിന് മുൻപ് തന്നെ ആരെങ്കിലും നിങ്ങളുടെ ചിത്രങ്ങൾ ഉപയോഗിച്ച് AI ഇമേജ് നിർമ്മിച്ചിട്ടുണ്ടെങ്കിൽ അവ ഡിലീറ്റ് ആകില്ല. ഇനി അക്കൗണ്ട് പൂർണ്ണമായി പ്രൈവറ്റ് ആക്കിയാലും പഴയ പബ്ലിക് ചിത്രങ്ങൾ ഉപയോഗിച്ച് നിർമ്മിച്ച AI ഫോട്ടോകൾ തുടർന്നും നിലനിൽക്കും. മെറ്റാ ഈ സുരക്ഷാ ഫീച്ചറുകൾ ഘട്ടഘട്ടമായാണ് ഉപയോക്താക്കളിലേക്ക് എത്തിക്കുന്നത്. അതിനാൽ നിങ്ങളുടെ അക്കൗണ്ടിൽ നിലവിൽ ഈ ഓപ്ഷൻ കാണുന്നില്ലെങ്കിൽ ഏതാനും ദിവസങ്ങൾക്കുള്ളിൽ ഇത് ലഭ്യമാകും.
Story Summary
Meta has rolled out its first in-house AI image-generation tool called Muse Image, which allows users to clone anyone’s look by simply tagging their public Instagram account without explicit consent. Users can secure their privacy and stop Meta from using their content by disabling the AI features under the “Sharing and reuse” settings on Instagram.
