കൊച്ചി: സോഷ്യൽ മീഡിയയിലെ പ്രശസ്ത ഡിജിറ്റൽ ക്രിയേറ്ററും നടനുമായ അനന്തരാമൻ അജയ് ആദ്യമായി രചനയും സംവിധാനവും നിർവ്വഹിച്ച ഹ്രസ്വചിത്രം ‘ഗ്രാനി’ (Anantharaman Ajay Granny Short Film Release) പുറത്തിറങ്ങി. മികച്ച തീയേറ്റർ സിനിമകളോട് കിടപിടിക്കുന്ന ദൃശ്യമികവും അണിയറപ്രവർത്തകരുടെ സാങ്കേതിക നിലവാരവുമാണ് ഈ ഹ്രസ്വചിത്രത്തിന്റെ പ്രധാന ആകർഷണം. റിലീസ് ചെയ്തത് മുതൽ മികച്ച പ്രതികരണങ്ങളാണ് ചിത്രത്തിന് സോഷ്യൽ മീഡിയയിൽ നിന്നും ലഭിച്ചുകൊണ്ടിരിക്കുന്നത്. പ്രശസ്ത താരങ്ങളായ ശിവരാജും കെപിഎസി ലീലയുമാണ് ചിത്രത്തിൽ കേന്ദ്ര കഥാപാത്രങ്ങളായി എത്തിയിട്ടുള്ളത്.
പൂർണ്ണമായും ഒരു ഹൊറർ മിസ്റ്ററി (Horror Mystery) മൂഡിൽ കഥ പറയുന്ന ചിത്രത്തിൽ ഹോം നഴ്സായ റോണി എന്ന യുവാവായി ശിവരാജും, ദുരൂഹതകൾ നിറഞ്ഞ മുത്തശ്ശിയായി കെപിഎസി ലീലയും തങ്ങളുടെ കരിയറിലെ തന്നെ ഏറ്റവും മികച്ച പ്രകടനങ്ങളിലൊന്ന് കാഴ്ചവെച്ചിരിക്കുന്നു. വലിയൊരു ബംഗ്ലാവിൽ ഒറ്റയ്ക്ക് താമസിക്കുന്ന ഒരു മുത്തശ്ശിയെ പരിചരിക്കാൻ ഹോം നഴ്സായി ഒരു യുവാവ് എത്തുന്നതും, അതിന് ശേഷം ആ വീട്ടിൽ അരങ്ങേറുന്ന ഭീതിജനകമായ അസ്വാഭാവിക സംഭവങ്ങളുമാണ് ചിത്രത്തിന്റെ പ്രധാന ഇതിവൃത്തം. ഏകദേശം 40 മിനിറ്റോളം ദൈർഘ്യമുള്ള ചിത്രം പ്രേക്ഷകരെ ആദ്യാവസാനം ആകാംഷയുടെ മുനയിൽ നിർത്താൻ പോന്നതാണ്. ആരെയും ഞെട്ടിക്കുന്ന തരത്തിലുള്ള ഇതിലെ ക്ലൈമാക്സ് രംഗങ്ങൾ ചിത്രത്തിന്റെ വലിയൊരു ഹൈലൈറ്റാണ്. ഒരു നിമിഷം പോലും ബോറടിപ്പിക്കാതെ മികച്ച താളത്തിലാണ് സംവിധായകൻ കഥ പറഞ്ഞുപോയിട്ടുള്ളത്.
ബിഗ് ബജറ്റ് സിനിമകളെ ഓർമ്മിപ്പിക്കുന്ന രീതിയിലുള്ള ശക്തമായ ഒരു സാങ്കേതിക നിര തന്നെയാണ് ചിത്രത്തിന് പിന്നിൽ അണിനിരന്നിട്ടുള്ളത്. വിജയ് രഘു കൃഷ്ണൻ ഛായാഗ്രഹണവും മിഥുൻ മുരളി എഡിറ്റിങ്ങും നിർവ്വഹിച്ചിരിക്കുന്നു. ആർക്കിയുടേതാണ് പശ്ചാത്തല സംഗീതം. പ്രൊഡക്ഷൻ ഡിസൈനർ: ഹംസ വള്ളിത്തോട്, ക്രിയേറ്റീവ് ഡയറക്ടർ: സംഗീത് ശ്യാം, സൗണ്ട് ഡിസൈൻ: അജയൻ അടാട്ട്, ശബ്ദമിശ്രണം: പയസ്മോൻ സണ്ണി. കോസ്റ്റ്യൂം രഞ്ജിനി മേരി റെജിയും മേക്കപ്പ് പ്രദീപ് വിതുരയുമാണ് കൈകാര്യം ചെയ്തിട്ടുള്ളത്. ജോയ്നർ തോമസ് കളർ ഗ്രേഡിംഗും ബോബി രാജൻ വിഎഫ്എക്സും (VFX) നിർവ്വഹിച്ചു. ചിത്രത്തിന്റെ പിആർഒ (PRO) വൈശാഖ് സി. വടക്കേവീട്, ജിനു അനിൽകുമാർ എന്നിവരാണ്. കൃഷ്ണ ബാല ഷേണായിയാണ് ആകർഷകമായ പോസ്റ്ററുകൾ ഡിസൈൻ ചെയ്തിരിക്കുന്നത്. ഒരു പുതിയ സിനിമാറ്റിക് അനുഭവം സമ്മാനിക്കുന്ന ‘ഗ്രാനി’ യൂട്യൂബിൽ മികച്ച വ്യൂസ് നേടി മുന്നേറുകയാണ്.
Story Summary:
Popular digital creator and actor Anantharaman Ajay has made his directorial debut with the horror-mystery short film ‘Granny’. Starring Shivaraj as a home nurse named Rony and KPAC Leela as an elderly woman living alone, the 40-minute short film revolves around the mysterious events that unfold inside a house. The short film has received widespread praise for its high technical standards, background score, and gripping climax.
