പുനെയിൽ വീടിന് മുന്നിൽ കളിച്ചുകൊണ്ടിരുന്ന രണ്ടുവയസ്സുകാരൻ മഴവെള്ളം നിറഞ്ഞ ഓടയിൽ വീണ് ദാരുണമായി മരിച്ചു. സോഹം ലഖൻ കാസ്ബെ എന്ന കുട്ടിയാണ് മരിച്ചത്. വ്യാഴാഴ്ച രാവിലെ 10.30-ഓടെയാണ് സംഭവം. വീടിന് സമീപം മലിനജലവും മഴവെള്ളവും ഒഴുകിപ്പോകാൻ എടുത്ത നാല് കുഴികൾ സുരക്ഷാ മുൻകരുതലുകളൊന്നുമില്ലാതെ തുറന്നുകിടക്കുകയായിരുന്നു. ഇതിലൊന്നിലേക്കാണ് കുട്ടി അബദ്ധത്തിൽ വീണത്. സംഭവത്തിൽ ലോണി കാൽബോർ പോലീസ് ഒരു അജ്ഞാത കരാറുകാരനെതിരെ കേസെടുത്തിട്ടുണ്ട്. (Pune Toddler Death Sewage Pit)
നഗരങ്ങളിലെ സിവിൽ അനാസ്ഥ മൂലം തുടർച്ചയായുണ്ടാകുന്ന മരണങ്ങളിൽ വലിയ പ്രതിഷേധമാണ് ഉയരുന്നത്. മുംബൈ ചെമ്പൂരിൽ മരം വീണ് സ്കൂൾ ബസ് തകർന്നതിനെത്തുടർന്ന് 11 വയസ്സുകാരൻ മരിച്ച സംഭവത്തിന് പിന്നാലെയാണ് പുണെയിലെ ഈ ദുരന്തം. അപകടസാധ്യതയുള്ള മരങ്ങൾ മുറിച്ചുമാറ്റണമെന്ന നാട്ടുകാരുടെ പരാതികൾ അധികൃതർ അവഗണിച്ചതാണ് ചെമ്പൂരിലെ ദുരന്തത്തിന് കാരണമായതെന്ന് മേയർ ഋതു താവ്ഡെ ആരോപിച്ചിരുന്നു.
മഴക്കാലത്ത് നഗരങ്ങളിലെ തുറന്നുകിടക്കുന്ന മാൻഹോളുകൾ മരണക്കെണികളായി മാറുകയാണ്. കഴിഞ്ഞ ദിവസം മുംബൈയിൽ മഴവെള്ളത്തിൽ നടന്നുപോകുമ്പോൾ മാൻഹോളിൽ വീണ് 55-കാരനായ ഷെയ്ഖ് മരിച്ചതും വലിയ ചർച്ചയായിരുന്നു. മൂന്ന് കരാർ തൊഴിലാളികൾ അറ്റകുറ്റപ്പണിക്കായി തുറന്നുവെച്ച മാൻഹോളിലാണ് ഇദ്ദേഹം വീണത്. ഈ സംഭവത്തിൽ നാല് ഉദ്യോഗസ്ഥരെ സസ്പെൻഡ് ചെയ്യുകയും ഉന്നതതല അന്വേഷണത്തിന് ഉത്തരവിടുകയും ചെയ്തിട്ടുണ്ട്. തുടർച്ചയായുണ്ടാകുന്ന ഇത്തരം ദുരന്തങ്ങൾക്കെതിരെ കർശന നടപടി വേണമെന്നാണ് പൊതുജനങ്ങളുടെ ആവശ്യം.
Summary: A two-year-old boy, Soham Lakhan Kasbe, died after falling into an unguarded, rainwater-filled sewage pit in Pune, marking yet another tragic incident highlighting civic negligence in urban areas. This death follows a series of recent infrastructure-related fatalities, including a boy killed by a falling tree in Mumbai and a man drowning in an open manhole during heavy rains. These events have sparked widespread public outrage, leading to investigations and suspensions of officials, as residents demand stricter safety measures and accountability from municipal authorities.
