ന്യൂഡൽഹി: ബിഹാർ, മധ്യപ്രദേശ്, ഗുജറാത്ത് എന്നീ സംസ്ഥാനങ്ങളിലെ മൂന്ന് പ്രധാന നിയമസഭാ മണ്ഡലങ്ങളിലേക്കുള്ള ഉപതെരഞ്ഞെടുപ്പ് തീയതികൾ കേന്ദ്ര തെരഞ്ഞെടുപ്പ് കമ്മീഷൻ പ്രഖ്യാപിച്ചു (Assembly By Elections 2026). ബിഹാറിലെ ബങ്കിപൂർ, മധ്യപ്രദേശിലെ ദാതിയ, ഗുജറാത്തിലെ മഞ്ചൽപൂർ എന്നീ മണ്ഡലങ്ങളിലാണ് ജൂലൈ 30-ന് ഉപതെരഞ്ഞെടുപ്പ് നടക്കുക. വോട്ടെണ്ണലും ഫലപ്രഖ്യാപനവും ഓഗസ്റ്റ് 3-ന് നടക്കും. തെരഞ്ഞെടുപ്പ് പ്രഖ്യാപിച്ചതോടെ ഈ മണ്ഡലങ്ങൾ ഉൾപ്പെടുന്ന ജില്ലകളിൽ മാതൃകാ പെരുമാറ്റച്ചട്ടം (Model Code of Conduct) ഉടനടി നിലവിൽ വന്നതായി തെരഞ്ഞെടുപ്പ് കമ്മീഷൻ ഔദ്യോഗികമായി അറിയിച്ചു.
ഉപതെരഞ്ഞെടുപ്പുമായി ബന്ധപ്പെട്ട ഔദ്യോഗിക വിജ്ഞാപനം ജൂലൈ 6-ന് പുറപ്പെടുവിക്കും. സ്ഥാനാർത്ഥികൾക്ക് നാമനിർദ്ദേശ പത്രിക സമർപ്പിക്കാനുള്ള അവസാന തീയതി ജൂലൈ 13 ആണ്. സമർപ്പിച്ച പത്രികകളുടെ സൂക്ഷ്മപരിശോധന ജൂലൈ 14-ന് നടക്കും. പത്രിക പിൻവലിക്കാൻ താല്പര്യമുള്ള സ്ഥാനാർത്ഥികൾക്ക് അതിനുള്ള അവസാന തീയതി ജൂലൈ 16 ആയിരിക്കുമെന്നും കമ്മീഷൻ വ്യക്തമാക്കിയിട്ടുണ്ട്. രാജ്യത്തെ പ്രമുഖ നേതാക്കളുടെ പദവി മാറ്റവും അയോഗ്യതയുമാണ് ഈ മൂന്ന് മണ്ഡലങ്ങളിലും ഇപ്പോൾ ഉപതെരഞ്ഞെടുപ്പിന് വഴിയൊരുക്കിയിരിക്കുന്നത്.
ബിഹാറിലെ ബങ്കിപൂർ മണ്ഡലത്തിൽ നിന്നുള്ള എംഎൽഎയും ബിജെപി ദേശീയ അധ്യക്ഷനുമായ നിതിൻ നവിൻ കഴിഞ്ഞ ഏപ്രിലിൽ രാജ്യസഭയിലേക്ക് തിരഞ്ഞെടുക്കപ്പെട്ടതിനെ തുടർന്ന് നിയമസഭാംഗത്വം രാജിവെച്ച പശ്ചാത്തലത്തിലാണ് ഇവിടെ ഉപതിരഞ്ഞെടുപ്പ് വേണ്ടി വന്നത്. മധ്യപ്രദേശിലെ ദാതിയയിലാകട്ടെ, ബാങ്ക് തട്ടിപ്പും രേഖകൾ ചമയ്ക്കലും ഉൾപ്പെട്ട ക്രിമിനൽ കേസിൽ ഡൽഹി പ്രത്യേക കോടതി മൂന്ന് വർഷത്തെ തടവുശിക്ഷയ്ക്ക് വിധിച്ചതിനെ തുടർന്ന് കോൺഗ്രസ് എംഎൽഎ രാജേന്ദ്ര ഭാരതിയെ ജനപ്രതിനിധി സ്ഥാനത്തുനിന്ന് നിയമസഭാ സെക്രട്ടേറിയറ്റ് അയോഗ്യനാക്കിയിരുന്നു. ഗുജറാത്തിലെ മഞ്ചൽപൂർ സീറ്റ് ഒഴിഞ്ഞുകിടക്കുന്നത് മുതിർന്ന ബിജെപി നേതാവും മുൻ മന്ത്രിയുമായിരുന്ന എംഎൽഎ യോഗേഷ്ഭായ് നാരാണദാസ് പട്ടേലിന്റെ നിര്യാണത്തെ തുടർന്നാണ്.
എല്ലാ പോളിംഗ് സ്റ്റേഷനുകളിലും പൂർണ്ണമായും ഇലക്ട്രോണിക് വോട്ടിംഗ് മെഷീനുകളും (EVM) വിവിപാറ്റുകളും (VVPAT) ഉപയോഗിച്ചായിരിക്കും വോട്ടെടുപ്പ് നടത്തുകയെന്ന് കമ്മീഷൻ ഉറപ്പുനൽകിയിട്ടുണ്ട്. കൂടാതെ സുതാര്യത ഉറപ്പാക്കുന്നതിന്റെ ഭാഗമായി, ക്രിമിനൽ പശ്ചാത്തലമുള്ള സ്ഥാനാർത്ഥികളും അവർക്ക് സീറ്റ് നൽകിയ രാഷ്ട്രീയ പാർട്ടികളും സുപ്രീംകോടതിയുടെ കർശന നിർദ്ദേശപ്രകാരം തങ്ങളുടെ ക്രിമിനൽ റെക്കോർഡുകൾ സംബന്ധിച്ച വിവരങ്ങൾ പ്രമുഖ പത്രങ്ങളിലും ടെലിവിഷൻ ചാനലുകളിലും ഔദ്യോഗിക വെബ്സൈറ്റുകളിലും പൊതുജനങ്ങൾക്കായി പരസ്യപ്പെടുത്തണമെന്നും തെരഞ്ഞെടുപ്പ് കമ്മീഷൻ കടുപ്പിച്ചു പറഞ്ഞിട്ടുണ്ട്.
Story Summary: The Election Commission of India has announced by-elections for three assembly constituencies—Bankipur in Bihar, Datia in Madhya Pradesh, and Manjalpur in Gujarat—to be held on July 30, with counting on August 3. The Bankipur seat became vacant following BJP National President Nitin Nabin’s election to the Rajya Sabha, while the Datia seat fell vacant due to the disqualification of Congress MLA Rajendra Bharti after his conviction in a fraud case. The Manjalpur seat was vacated due to the demise of BJP leader Yogeshbhai Patel.
