ബാങ്കോക്ക്: തായ്ലൻഡിലെ മുക്ദഹാൻ പ്രവിശ്യയിലുണ്ടായ വാഹനാപകടത്തിൽ എട്ട് ബുദ്ധ സന്യാസിമാർ കൊല്ലപ്പെട്ടു. പതിനൊന്ന് വയസ്സുള്ള ആൺകുട്ടി ഓടിച്ച പിക്ക്-അപ്പ് ട്രക്ക്, തീർത്ഥാടനയാത്രയിലായിരുന്ന സന്യാസിമാർക്കിടയിലേക്ക് ഇടിച്ചുകയറുകയായിരുന്നു. പരിക്കേറ്റ പത്തോളം പേർ ചികിത്സയിലാണ്.(11 year old boy crashes truck into monks procession in Thailand killing eight)
മുക്ദഹാൻ പ്രവിശ്യയിൽ തീർത്ഥാടനത്തിന്റെ ഭാഗമായി റോഡരികിലൂടെ നടക്കുകയായിരുന്നു 35 സന്യാസിമാരും അഞ്ച് അനുയായികളും അടങ്ങുന്ന സംഘം. പെട്ടെന്നാണ് അനിയന്ത്രിതമായ വേഗതയിൽ വന്ന ട്രക്ക് ഇവർക്കിടയിലേക്ക് ഇടിച്ചുകയറിയത്. അഞ്ച് പേർ സംഭവസ്ഥലത്ത് വെച്ചും മൂന്ന് പേർ ആശുപത്രിയിൽ വെച്ചുമാണ് മരണപ്പെട്ടത്. അപകടമുണ്ടാക്കിയ കുട്ടിയെയും മാതാപിതാക്കളെയും പോലീസ് കസ്റ്റഡിയിലെടുത്ത് ചോദ്യം ചെയ്തുവരികയാണ്.
കുട്ടിയുടെ മാതാപിതാക്കളെ സ്റ്റേഷനിലേക്ക് വിളിച്ചുവരുത്തിയിട്ടുണ്ടെന്നും, വാഹനത്തിന്റെ അശ്രദ്ധമായ ഉപയോഗത്തിന് ഉത്തരവാദികളായവർക്കെതിരെ കർശന നിയമനടപടികൾ സ്വീകരിക്കുമെന്നും മുക്ദഹാൻ പോലീസ് കമാൻഡർ പൈറോജ് തായ്ഫുത്സ അറിയിച്ചു. സമാനമായ ദുരന്തങ്ങൾ ആവർത്തിക്കാതിരിക്കാൻ മാതാപിതാക്കൾ അതീവ ശ്രദ്ധ പുലർത്തണമെന്നും റോഡ് സുരക്ഷാ നിയമങ്ങൾ കർശനമായി പാലിക്കണമെന്നും മുക്ദഹാൻ ഗവർണർ വോരായൻ ബുണ്ണാരത്ത് മുന്നറിയിപ്പ് നൽകി. വാഹനത്തിന്റെ സാങ്കേതിക തകരാറുകൾ പരിശോധിക്കാൻ ഫൊറൻസിക് പരിശോധനയും ആരംഭിച്ചിട്ടുണ്ട്.
Story Summary
Eight Buddhist monks were killed and 10 others injured in Thailand’s Mukdahan province after an 11-year-old boy, who took his parents’ pickup truck without permission, lost control and crashed into their pilgrimage procession. Local authorities have launched a forensic investigation into the vehicle and are initiating legal proceedings against those responsible for the child’s supervision.
