ന്യൂഡൽഹി: ഓടുന്ന കാറിനുള്ളിൽ വെച്ച് യുവാവ് യുവതിയെ ലൈംഗികമായി പീഡിപ്പിക്കാൻ ശ്രമിച്ചതായി പരാതി. കിഴക്കൻ ഡൽഹിയിലെ മണ്ഡാവലിയിൽ ആണ് സംഭവം. സംഭവത്തിൽ യുവതിയുടെ പരാതി പ്രകാരം പൊലീസ് എഫ്.ഐ.ആർ രജിസ്റ്റർ ചെയ്ത് അന്വേഷണം ആരംഭിച്ചു.(Woman Records Sexual Harassment Incident Inside Moving Car in Delhi)
യുവതിയുടെ പരാതി പ്രകാരം, പ്രതിയെ അവർക്ക് മുൻപരിചയമുണ്ട്. ഭക്ഷണം കഴിക്കാൻ പോകാം എന്ന് പറഞ്ഞ് യുവതിയെ കാറിൽ കയറ്റിയ ശേഷം, സി.എൻ.ജി നിറയ്ക്കാനെന്ന വ്യാജേന വാഹനം ആളൊഴിഞ്ഞ സ്ഥലത്തേക്ക് കൊണ്ടുപോകുകയായിരുന്നു. വഴിമധ്യേ പ്രതി ലൈംഗികച്ചുവയുള്ള അശ്ലീല പരാമർശങ്ങൾ നടത്തുകയും, യുവതിയെ ശാരീരികമായി ഉപദ്രവിക്കുകയും കാറിൽ നിന്ന് ഇറങ്ങാൻ അനുവദിക്കാതെ തടഞ്ഞുവെക്കുകയുമായിരുന്നു.
അതിക്രമത്തിനിടെ യുവതി സംഭവം മൊബൈലിൽ പകർത്തി. ഭയത്തിലും പരിഭ്രമത്തിലും ഇരിക്കുമ്പോഴും ധീരമായി പ്രതികരിക്കുന്ന യുവതിയെ വീഡിയോയിൽ കാണാം. തന്നെ ഉപദ്രവിക്കാൻ ശ്രമിച്ചാൽ കാറിൽ നിന്ന് ചാടുമെന്നും, മരിക്കാനും മടിക്കില്ലെന്നും യുവതി വീഡിയോയിൽ ഉറച്ച ശബ്ദത്തിൽ പറയുന്നുണ്ട്. താൻ വഴങ്ങില്ലെന്നും പ്രതിയുടെ ആവശ്യങ്ങൾ നിരസിക്കുന്നതായും യുവതി ദൃശ്യങ്ങളിൽ വ്യക്തമാക്കുന്നു. എന്നാൽ രണ്ട് മിനിറ്റ് മാത്രം മതിയെന്ന് പറഞ്ഞ് പ്രതി യുവതിയെ നിരന്തരം ശല്യം ചെയ്യുന്നതും ഭീഷണിപ്പെടുത്തുന്നതും വീഡിയോയിൽ കേൾക്കാം. യുവതി നൽകിയ പരാതിയുടെ അടിസ്ഥാനത്തിൽ മണ്ഡാവലി പൊലീസ് കേസ് എടുത്ത് അന്വേഷണം ഊർജ്ജിതമാക്കി. പ്രതിയെ ഉടൻ പിടികൂടുമെന്ന് അധികൃതർ അറിയിച്ചു.
Story Summary
A 24-year-old woman bravely recorded a video of a man sexually harassing her inside a moving car in Delhi after he lured her out under false pretenses. The Mandawali Police have registered an FIR based on her complaint, and the footage of the incident has become a key piece of evidence in the ongoing investigation.
