ചെന്നൈ: തമിഴ്നാട് മുഖ്യമന്ത്രി വിജയ് പങ്കെടുത്ത ഒരു ഔദ്യോഗിക ചടങ്ങിലെ ദൃശ്യങ്ങളാണ് ഇപ്പോൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നത് (Tamil Nadu CM Vijay). ഒമ്പത് മാസം ഗർഭിണിയായ ഉദ്യോഗാർഥിക്ക് നിയമന ഉത്തരവ് കൈമാറുന്നതിനായി വേദിയിൽ നിന്ന് നേരിട്ട് സദസ്സിലേക്ക് ഇറങ്ങിയ മുഖ്യമന്ത്രിയുടെ നടപടി ശ്രദ്ധ നേടുകയാണ്.
തമിഴ്നാട് പബ്ലിക് സർവീസ് കമ്മീഷൻ മുഖേന വൈദ്യുതി വകുപ്പിലേക്ക് തിരഞ്ഞെടുക്കപ്പെട്ട ഉദ്യോഗാർഥികൾക്കുള്ള നിയമന ഉത്തരവ് വിതരണ ചടങ്ങിനിടെയായിരുന്നു സംഭവം. ചെന്നൈയിലെ കലൈവാണർ അരങ്ങം ഓഡിറ്റോറിയത്തിൽ നടന്ന ചടങ്ങിൽ 401 ഉദ്യോഗാർഥികൾക്കാണ് നിയമന രേഖകൾ കൈമാറിയത്. ഇതിൽ 383 അസിസ്റ്റന്റ് എൻജിനീയർമാരും 18 അസിസ്റ്റന്റ് അക്കൗണ്ട്സ് ഓഫീസർമാരും ഉൾപ്പെട്ടിരുന്നു.
നിയമന ഉത്തരവ് സ്വീകരിക്കാനായി വിളിക്കപ്പെട്ടവരിൽ അക്ഷയ ലക്ഷ്മിയും ഉണ്ടായിരുന്നു. അവരുടെ പേര് പ്രഖ്യാപിച്ചപ്പോൾ അവർ പൂർണ ഗർഭിണിയാണെന്നും പ്രസവത്തിന് ദിവസങ്ങൾ മാത്രം ശേഷിക്കുന്നുവെന്നും മുഖ്യമന്ത്രി ശ്രദ്ധിച്ചു.
സ്റ്റേജിലേക്കുള്ള പടവുകൾ കയറുന്നത് അക്ഷയയ്ക്ക് ബുദ്ധിമുട്ടാകാമെന്ന് മനസിലാക്കിയ വിജയ്, പതിവ് പ്രോട്ടോക്കോൾ മാറ്റിവെച്ച് നേരിട്ട് വേദിയിൽ നിന്ന് താഴെയിറങ്ങി സദസ്സിൽ ഇരുന്ന അക്ഷയയുടെ അടുത്തേക്ക് എത്തുകയായിരുന്നു. തുടർന്ന് നിയമന ഉത്തരവ് കൈമാറി പുതിയ ജോലിക്ക് എല്ലാ ആശംസകളും നേർന്നു.
അക്ഷയയ്ക്ക് സുരക്ഷിതമായ പ്രസവം നേരുകയും അമ്മയ്ക്കും കുഞ്ഞിനും ആരോഗ്യവും സന്തോഷവും ഉണ്ടാകട്ടെയെന്ന് മുഖ്യമന്ത്രി ആശംസിച്ചതോടെ സദസ്സിൽ നിന്ന് വലിയ കൈയടി ഉയർന്നു. ചടങ്ങിന്റെ വീഡിയോ പിന്നീട് സമൂഹമാധ്യമങ്ങളിൽ വൈറലായി മാറി.
ജൂൺ 28നാണ് അക്ഷയ ലക്ഷ്മിക്ക് ഡോക്ടർമാർ നിർദേശിച്ചിരിക്കുന്ന പ്രസവ തീയതി. മുഖ്യമന്ത്രിയുടെ ഈ മാനുഷിക ഇടപെടൽ നിരവധി പേരുടെ പ്രശംസ നേടുകയാണ്.
Story Summary: Tamil Nadu Chief Minister Vijay won praise after stepping down from the stage to personally hand over an appointment letter to a nine-month pregnant candidate. The gesture, captured on video, has gone viral on social media.
