ഇന്ത്യയുടെ 15 കാരനായ യുവ ക്രിക്കറ്റ് താരം വൈഭവ് സൂര്യവംശിയുടെ യുണൈറ്റഡ് കിംഗ്ഡം (യു.കെ) പര്യടനവുമായി ബന്ധപ്പെട്ട് ഡ്രെസ്സിംഗ് റൂം നിയന്ത്രണങ്ങൾ കായികലോകത്ത് വലിയ ചർച്ചയാവുകയാണ് (Vaibhav Sooryavanshi UK Tour). അയർലൻഡ്, ഇംഗ്ലണ്ട് എന്നിവർക്കെതിരായ ട്വന്റി-20 പരമ്പരയ്ക്കുള്ള സീനിയർ ഇന്ത്യൻ ടീമിൽ ഇടംനേടിയ സൂര്യവംശിക്ക് പ്രാദേശിക നിയമങ്ങൾ മൂലം പ്രത്യേക ചേഞ്ചിംഗ് റൂം അനുവദിക്കേണ്ടി വരുമെന്നാണ് റിപ്പോർട്ടുകൾ വ്യക്തമാക്കുന്നത്. ഇംഗ്ലണ്ട് ആൻഡ് വെയ്ൽസ് ക്രിക്കറ്റ് ബോർഡിന്റെ (ഇ.സി.ബി) സുരക്ഷാ നയങ്ങൾ അനുസരിച്ച് പ്രായപൂർത്തിയാകാത്ത താരങ്ങൾക്ക് മുതിർന്ന താരങ്ങൾക്കൊപ്പം ഡ്രെസ്സിംഗ് റൂമും ഷവർ സൗകര്യങ്ങളും പങ്കിടുന്നതിന് കർശന വിലക്കുണ്ട്. കായികരംഗത്ത് പ്രായപൂർത്തിയാകാത്തവരുടെ സുരക്ഷ ഉറപ്പാക്കുന്നതിനായി ബ്രിട്ടനിൽ വർഷങ്ങളായി നിലനിൽക്കുന്ന നിയമമാണിത്.
ബ്രിട്ടനിലെ ചൈൽഡ് സേഫ്ഗാർഡിംഗ് പോളിസി അനുസരിച്ച് 16 വയസ്സിൽ താഴെയുള്ള കളിക്കാരെ മുതിർന്ന കായികതാരങ്ങൾക്കൊപ്പം പൊതുവായ ചേഞ്ചിംഗ് റൂമുകളിൽ പ്രവേശിപ്പിക്കാൻ കഴിയില്ല. ‘ക്രിക്കറ്റ് റെഗുലേറ്റർ’ എന്ന സ്വതന്ത്ര സമിതിയാണ് ഈ നിയമങ്ങൾ കർശനമായി നിരീക്ഷിക്കുന്നത്. കളിക്ക് മുമ്പുള്ള തന്ത്രപരമായ ചർച്ചകളിലും ടീം മീറ്റിംഗുകളിലും സൂര്യവംശിക്ക് പങ്കെടുക്കാമെങ്കിലും, വസ്ത്രം മാറുന്നതിനും ഷവർ ചെയ്യുന്നതിനും പ്രത്യേകമായി നിശ്ചയിച്ച സ്വകാര്യ സൗകര്യം ഉപയോഗിക്കേണ്ടി വരും. മുൻപ് ഇംഗ്ലീഷ് ഫുട്ബോൾ ക്ലബ്ബായ ആഴ്സണലിലും 16 വയസ്സിന് താഴെയുള്ള കൗമാര താരങ്ങൾക്കായി ഇത്തരം പ്രത്യേക സൗകര്യങ്ങൾ ഏർപ്പെടുത്തിയിട്ടുണ്ട്.
ഇക്കാര്യത്തിൽ അന്താരാഷ്ട്ര ക്രിക്കറ്റ് കൗൺസിലിന് (ഐ.സി.സി) ഇടപെടാൻ കഴിയില്ലെന്നാണ് റിപ്പോർട്ടുകൾ സൂചിപ്പിക്കുന്നത്. ഇന്ത്യയും ഇംഗ്ലണ്ടും തമ്മിൽ നടക്കുന്നത് ഉഭയകക്ഷി പരമ്പര ആയതിനാലും ഇത് ഐ.സി.സിയുടെ നേരിട്ടുള്ള നിയന്ത്രണത്തിലുള്ള ടൂർണമെന്റ് അല്ലാത്തതിനാലും പ്രാദേശിക നിയമങ്ങൾക്കാണ് മുൻഗണന. യു.കെയിലെ കടുത്ത സുരക്ഷാ നിയമങ്ങളെ മറികടക്കാൻ ഐ.സി.സി ചട്ടങ്ങൾക്ക് സാധിക്കില്ലെന്ന് ഈ രംഗത്തെ വിദഗ്ധർ വ്യക്തമാക്കുന്നു. സമാനമായ ചട്ടങ്ങൾ അയർലൻഡ് പര്യടനത്തിലും ബാധകമായിരിക്കുമെന്നും ഇന്ത്യൻ ടീമിനായി പവലിയനിൽ മൂന്ന് വ്യത്യസ്ത ചേഞ്ചിംഗ് റൂമുകൾ അനുവദിച്ചിട്ടുണ്ടെന്നും അധികൃതർ അറിയിച്ചു.
Summary: Indian cricket prodigy Vaibhav Sooryavanshi will be provided with a separate changing room during India’s upcoming T20I tour of the United Kingdom due to local child safeguarding laws. The England and Wales Cricket Board (ECB) policy strictly prohibits under-16 players from sharing dressing rooms and shower facilities with adult athletes. Since the tour is a bilateral series and not an official ICC event, the International Cricket Council cannot intervene over the implementation of the UK’s regional legislation.
