ലഖ്നൗവിലെ അലിഗഞ്ച് മേഖലയിലുള്ള ഉഷ മേത്ത മാർഗിലെ ബഹുനില കെട്ടിടത്തിലുണ്ടായ തീപിടിത്തത്തിൽ 15 പേർ കൊല്ലപ്പെട്ട സംഭവം വലിയ ചർച്ചയാകുന്നു. 2026 ജൂൺ 22-ന് നടന്ന ഈ ദാരുണ സംഭവത്തിൽ മരിച്ചവരിൽ ഭൂരിഭാഗവും വിദ്യാർത്ഥികളാണ് (Lucknow Fire Tragedy). അനധികൃത നിർമ്മാണം ആരോപിച്ച് 2016-ൽ ഈ കെട്ടിടത്തിനെതിരെ അധികൃതർ പൊളിക്കൽ ഉത്തരവ് പുറപ്പെടുവിച്ചിരുന്നെങ്കിലും, രണ്ട് മാസത്തിനുള്ളിൽ തന്നെ അത് പിൻവലിച്ചുവെന്ന ഞെട്ടിക്കുന്ന വിവരം ഉത്തർപ്രദേശ് സർക്കാർ പുറത്തുവിട്ട പ്രസ്താവനയിലൂടെ പുറത്തുവന്നു.
ഈ മൂന്നുനില കെട്ടിടത്തിൽ ഒരു അനിമേഷൻ സ്റ്റുഡിയോയും കോച്ചിങ് സെന്ററും പെറ്റ് ക്ലിനിക്കും പ്രവർത്തിച്ചിരുന്നു. തീപിടിത്തം നടന്ന സമയത്ത് രണ്ടാം നിലയിൽ ഉണ്ടായിരുന്ന വിദ്യാർത്ഥികളാണ് കൂടുതലും അപകടത്തിൽപ്പെട്ടത്. കെട്ടിടത്തിൽ അത്യാവശ്യമായ എമർജൻസി എക്സിറ്റുകളോ സുരക്ഷാ സംവിധാനങ്ങളോ ഉണ്ടായിരുന്നില്ലെന്ന് പ്രാഥമിക അന്വേഷണത്തിൽ തെളിഞ്ഞിട്ടുണ്ട്. തീയണയ്ക്കാൻ ഫയർഫോഴ്സ് എത്തിയെങ്കിലും, കെട്ടിടത്തിന്റെ ഭിത്തി പൊളിച്ചാണ് രക്ഷാപ്രവർത്തകർക്ക് ഉള്ളിലേക്ക് കടക്കാൻ സാധിച്ചത്.
സംഭവത്തിൽ അലിഗഞ്ച് പോലീസ് കേസെടുക്കുകയും കെട്ടിടത്തിന്റെ ഉടമസ്ഥരടക്കം നാല് പേരെ അറസ്റ്റ് ചെയ്യുകയും ചെയ്തു. കൃത്യവിലോപത്തിനും സുരക്ഷാ മാനദണ്ഡങ്ങൾ പാലിക്കാത്തതിനും ഉത്തരവാദികളായ നാല് ഉദ്യോഗസ്ഥരെയും സർക്കാർ സസ്പെൻഡ് ചെയ്തിട്ടുണ്ട്. മുഖ്യമന്ത്രി യോഗി ആദിത്യനാഥ് സംഭവസ്ഥലം സന്ദർശിക്കുകയും സംഭവത്തെക്കുറിച്ച് അന്വേഷിക്കാൻ പ്രത്യേക അന്വേഷണ സംഘത്തെ നിയമിക്കുകയും ചെയ്തു. മരിച്ചവരുടെ കുടുംബങ്ങൾക്ക് 5 ലക്ഷം രൂപയും പരിക്കേറ്റവർക്ക് 50,000 രൂപയും സഹായധനമായി സർക്കാർ പ്രഖ്യാപിച്ചിട്ടുണ്ട്. കൂടാതെ പ്രധാനമന്ത്രിയുടെ ദുരിതാശ്വാസ നിധിയിൽ നിന്ന് മരിച്ചവരുടെ കുടുംബങ്ങൾക്ക് 2 ലക്ഷം രൂപയും സഹായം നൽകുമെന്ന് അറിയിച്ചിട്ടുണ്ട്.
Summary: At least 15 people, mostly students, died in a devastating fire at a three-storey commercial building in Lucknow’s Aliganj area on June 22, 2026. Official records revealed that the building had received a demolition order for unauthorized construction in 2016, which was suspiciously revoked within two months. The building lacked basic fire safety exits and housed an animation studio and coaching center, trapping many victims.
