അമേരിക്കയിൽ ജോലി ചെയ്യുന്ന വൈദഗ്ധ്യമുള്ള തൊഴിലാളികൾക്ക് ലഭിക്കുന്ന വലിയ പ്രതിഫലത്തെക്കുറിച്ച് ഇൻസ്റ്റാഗ്രാമിലൂടെ തുറന്നുപറഞ്ഞ് അമൃത സിംഗ് എന്ന ഇന്ത്യൻ യുവതി (US Work Culture). തന്റെ ഗാരേജ് വാതിലിന്റെ ചെറിയൊരു തകരാർ പരിഹരിക്കാൻ എത്തിയ മെക്കാനിക് 20 മിനിറ്റ് ജോലിക്ക് 100 ഡോളർ (ഏകദേശം 9,500 രൂപ) ഈടാക്കിയെന്ന് അമൃത വീഡിയോയിൽ പറയുന്നു. ഈ തുക ഒട്ടും കൂടുതലല്ലെന്നും, സന്ദർശന ഫീസായി മാത്രം 100 ഡോളർ വാങ്ങുന്നവരാണ് ഇത്തരം ടെക്നീഷ്യന്മാർ എന്നും അവർ വിശദീകരിക്കുന്നു. അമേരിക്കയിൽ തൊഴിലുകൾക്ക് ചെറിയതോ വലിയതോ എന്ന വ്യത്യാസമില്ലെന്നും, വൈദഗ്ധ്യത്തിനാണ് അവിടെ വലിയ മൂല്യമെന്നും അവർ ചൂണ്ടിക്കാട്ടുന്നു.
പ്ലംബർമാർ, ഇലക്ട്രീഷ്യൻമാർ, ഗാരേജ് ടെക്നീഷ്യന്മാർ തുടങ്ങിയ വൈദഗ്ധ്യമുള്ള തൊഴിലാളികൾക്ക് നല്ല വരുമാനവും ജീവിതനിലവാരവും അവിടെയുണ്ടെന്ന് അമൃത പറയുന്നു. വലിയ കാറുകൾ സ്വന്തമാക്കാനും മാന്യമായ രീതിയിൽ നികുതി അടയ്ക്കാനും ഇവർക്ക് കഴിയുന്നുണ്ട്. ബിരുദമുണ്ടോ ഇല്ലയോ എന്നതല്ല, മറിച്ച് ഒരു മേഖലയിൽ നൈപുണ്യം ഉണ്ടോ എന്നതാണ് അവിടെ പ്രധാനം. വൈദഗ്ധ്യമുള്ള തൊഴിലുകൾക്ക് അമേരിക്കയിൽ വലിയ ഡിമാൻഡായതിനാൽ, ഇത്തരം ജോലികളിൽ ഏർപ്പെടുന്നവർക്ക് മികച്ച പ്രതിഫലം ലഭിക്കുന്നു. ഈ പോസ്റ്റ് ഇപ്പോൾ സോഷ്യൽ മീഡിയയിൽ വലിയ ചർച്ചകൾക്ക് വഴിവെച്ചിരിക്കുകയാണ്.
അമേരിക്കയിലെ സേവന മേഖലയിലെ ഉയർന്ന ചെലവുകളെക്കുറിച്ചും തൊഴിൽ സംസ്കാരത്തെക്കുറിച്ചും നിരവധിപേർ അഭിപ്രായങ്ങൾ പങ്കുവെച്ചു. ചിലർ ഉയർന്ന ജീവിതച്ചെലവുകളെക്കുറിച്ച് സൂചിപ്പിക്കുമ്പോൾ, മറ്റു ചിലർ വൈദഗ്ധ്യമുള്ള തൊഴിലുകൾക്ക് ലഭിക്കുന്ന ആദരവിനെ പ്രശംസിക്കുന്നു. വിദഗ്ധ തൊഴിലാളികളുടെ കുറവ് അമേരിക്കയിൽ വലിയ പ്രതിഫലം ലഭിക്കാൻ കാരണമാകുന്നുണ്ടെന്നും റിപ്പോർട്ടുകൾ വ്യക്തമാക്കുന്നു.
