സുൽത്താൻ ബത്തേരി: കർണാടകയിൽ നിന്നും കേരളത്തിലേക്ക് കെ.എസ്.ആർ.ടി.സി ബസിൽ മലദ്വാരത്തിൽ ഒളിപ്പിച്ചു കടത്താൻ ശ്രമിച്ച മാരക മയക്കുമരുന്നായ എം.ഡി.എം.എയുമായി (MDMA) കോഴിക്കോട് സ്വദേശി പോലീസ് പിടിയിൽ (Sultan Bathery MDMA drug bust). കോഴിക്കോട് പരപ്പൻപൊയിൽ തെക്കേപുരയിൽ സനീഷ് കുമാറിനെയാണ് (40) വയനാട് സുൽത്താൻ ബത്തേരി പോലീസ് 64 ഗ്രാം എം.ഡി.എം.എയുമായി അറസ്റ്റ് ചെയ്തത്. ചൊവ്വാഴ്ച ലഹരിവിരുദ്ധ സ്ക്വാഡിന്റെയും പോലീസിന്റെയും സംയുക്ത പരിശോധനയിലാണ് പ്രതി കുടുങ്ങിയത്.
കർണാടകയിൽ നിന്നും സുൽത്താൻ ബത്തേരി വഴി വരികയായിരുന്ന കെ.എസ്.ആർ.ടി.സി ബസിൽ ബത്തേരി കോട്ടക്കുന്ന് ഭാഗത്ത് വെച്ചാണ് പോലീസ് കടുത്ത പരിശോധന നടത്തിയത്. ഈ സമയം ബസിലെ യാത്രക്കാരനായ സനീഷ് കുമാറിന്റെ പെരുമാറ്റത്തിൽ കടുത്ത സംശയം തോന്നിയ പോലീസ് ഇയാളെ കസ്റ്റഡിയിലെടുക്കുകയായിരുന്നു. എന്നാൽ പ്രാഥമിക ശരീര പരിശോധനയിൽ മയക്കുമരുന്നൊന്നും കണ്ടെത്താൻ കഴിഞ്ഞില്ല.
തുടർന്ന് സംശയം ബലപ്പെട്ടതോടെ പ്രതിയെ ബത്തേരി ടൗണിലെ സ്വകാര്യ ആശുപത്രിയിലെത്തിച്ച് വിശദമായ എക്സ്റേ സ്കാനിംഗിന് വിധേയനാക്കി. ഈ പരിശോധനയിലാണ് പ്രതിയുടെ ശരീരത്തിനകത്ത് മലദ്വാരത്തിൽ ഒളിപ്പിച്ച നിലയിൽ ഉരുള രൂപത്തിലാക്കി പൊതിഞ്ഞ മൂന്ന് വലിയ പാക്കറ്റുകൾ കണ്ടെത്തിയത്. തുടർന്ന് സുരക്ഷ മുൻനിർത്തി സനീഷ്കുമാറിനെ വിദഗ്ധ ചികിത്സയ്ക്കായി മാനന്തവാടി ഗവ. മെഡിക്കൽ കോളേജ് ആശുപത്രിയിലേക്ക് മാറ്റി. ഇവിടെ വെച്ച് ഡോക്ടർമാരുടെ സഹായത്തോടെയാണ് ശരീരത്തിനകത്തെ പാക്കറ്റുകൾ പുറത്തെടുത്തത്. തുടർന്ന് നടത്തിയ പരിശോധനയിലാണ് ഇത് അന്താരാഷ്ട്ര വിപണിയിൽ ലക്ഷങ്ങൾ വിലമതിക്കുന്ന മാരക ലഹരിമരുന്നായ എം.ഡി.എം.എ ആണെന്ന് പോലീസ് സ്ഥിരീകരിച്ചത്. പ്രതി ഇതിന് മുൻപും സമാനമായ രീതിയിൽ ലഹരിക്കടത്ത് നടത്തിയിട്ടുണ്ടോ എന്നതിനെക്കുറിച്ച് സുൽത്താൻ ബത്തേരി പോലീസ് അന്വേഷണം ശക്തമാക്കിയിട്ടുണ്ട്.
Story Summary: Saneesh Kumar (40), a native of Kozhikode Parappanpoyil, was arrested in Sultan Bathery with 64 grams of MDMA hidden inside his rectum. He was intercepted during a routine police inspection of a KSRTC bus coming from Karnataka at Kottakkunnu. After a medical scan at a local hospital revealed wrapped capsule-like packets inside his body, he was shifted to Mananthavadi Gov. Medical College to safely retrieve the synthetic drug.
