കോട്ടയം: കേരളത്തിലെ ക്രൈസ്തവ ഭക്തിഗാന രംഗത്ത് സമാനതകളില്ലാത്ത സംഭാവനകൾ നൽകിയ പ്രശസ്ത ഗാനരചയിതാവും വിൻസെൻഷ്യൽ സന്യാസസഭാംഗവുമായ ഫാ. മൈക്കിൾ പനച്ചിക്കൽ (77) അന്തരിച്ചു (Fr Michael Panachickal passed away). വാർദ്ധക്യസഹജമായ അസുഖങ്ങളെ തുടർന്ന് കോട്ടയത്തെ സ്വകാര്യ ആശുപത്രിയിൽ ചികിത്സയിലായിരിക്കെയായിരുന്നു അന്ത്യം. ഭൗതികശരീരം പൊതുദർശനത്തിന് വെച്ച ശേഷം വ്യാഴാഴ്ച ഉച്ചകഴിഞ്ഞ് അടിച്ചറിയിലെ വിൻസെൻഷ്യൽ ധ്യാനകേന്ദ്രത്തിൽ പ്രത്യേക സംസ്കാര ശുശ്രൂഷകൾ ആരംഭിക്കും.
1948 സെപ്റ്റംബർ 6-ന് ദേവസ്യയുടെയും ഏലിയുടെയും മകനായാണ് ജനനം. ചെറുപ്പകാലത്ത് തന്നെ ആത്മീയവഴി തിരഞ്ഞെടുത്ത അദ്ദേഹം 1965-ൽ അങ്കമാലിയിലെ വിൻസെൻഷ്യൽ സെമിനാരിയിൽ വൈദിക വിദ്യാർത്ഥിയായി ചേർന്നു. തുടർന്ന് പഠനം പൂർത്തിയാക്കി 1974 ഡിസംബർ 19-ന് അങ്കമാലിയിൽ വെച്ചാണ് പൗരോഹിത്യം സ്വീകരിച്ചത്.
‘നിത്യത തീര്ക്കുന്ന നിമിഷങ്ങളെ, സ്വര്ഗം തുറക്കുന്ന നിമിഷങ്ങളെ’ എന്ന മനോഹരമായ ഗാനത്തിലൂടെയാണ് ഫാ. പനച്ചിക്കല് ഭക്തിഗാന രചനാരംഗത്തേക്ക് ഔദ്യോഗികമായി പ്രവേശിക്കുന്നത്. മലയാളി ക്രിസ്ത്യാനികളുടെ പ്രാർത്ഥനാ മുറികളിലും ദേവാലയങ്ങളിലും ഇന്നും അലയടിക്കുന്ന ’തിരുനാമകീര്ത്തനം പാടുവാനല്ലെങ്കില് നാവെനിക്കെന്തിന് നാഥാ’ എന്ന വിഖ്യാത ഗാനമുൾപ്പെടെ എഴുന്നൂറോളം വരികൾ അദ്ദേഹത്തിന്റെ തൂലികയിൽ നിന്ന് പിറന്നവയാണ്. അഞ്ച് പതിറ്റാണ്ടിലേറെക്കാലം ക്രൈസ്തവ സംഗീത ശാഖയ്ക്ക് അദ്ദേഹം നൽകിയ സംഭാവനകൾ അമൂല്യമാണ്.
കേവലം ഒരു ഗാനരചയിതാവ് എന്നതിലുപരി മികച്ചൊരു നാടകകൃത്ത്, നോവലിസ്റ്റ്, മാധ്യമപ്രവർത്തകൻ, പ്രഭാഷകൻ എന്നീ നിലകളിലെല്ലാം അദ്ദേഹം തിളങ്ങിയിരുന്നു. ആത്മാവിൽ ദരിദ്രർ ഭാഗ്യവാന്മാർ, സത്യം നിങ്ങളെ സ്വതന്ത്രരാക്കും, സത്യങ്ങളും വസ്തുതകളും (താമരശ്ശേരി രൂപതയുടെ കാറ്റക്കിസം ടെക്സ്റ്റ്), വീണ്ടെടുപ്പിന്റെ വിശ്വാസ വഴി, കുരിശിന്റെ വഴി (വിയ സാക്രാ), നിത്യത തീർക്കുന്ന നിമിഷങ്ങൾ (ഗാനസമാഹാരം) എന്നിവയാണ് അദ്ദേഹത്തിന്റെ പ്രധാന ഗ്രന്ഥങ്ങൾ.
സഹോദരങ്ങൾ: സിസ്റ്റർ ജിസ്സെല്ല (മുംബൈ), സിസ്റ്റർ ഫ്രാൻസിന (കോഴിക്കോട്), സിസ്റ്റർ മാത്യൂസ് മേരി സി.എം.സി (വെട്ടിമറ്റം), റൂബി ലോപ്പസ്, അച്ചാമ്മ സേവ്യർ, സിസ്റ്റർ കുഞ്ഞമ്മ (എറണാകുളം), ആനി സൈഫി. പരേതരായ ജോസഫ്, സെബാസ്റ്റ്യൻ എന്നിവർ മറ്റ് സഹോദരങ്ങളാണ്.
Story Summary: Renowned Christian devotional songwriter and Vincentian priest Fr. Michael Panachickal (77) passed away while undergoing treatment at a private hospital in Kottayam. Famous for penning over 700 iconic hymns, including “Thirunaamakeerthanam Paaduvaanallenkil,” he contributed to Christian spiritual music for over five decades. He was also a noted author, playwright, and journalist. The funeral services will be held at the Vincentian Retreat Centre in Adichira on Thursday afternoon.
