കാലിഫോർണിയ : കാലിഫോർണിയയിലെ എഡ്വേർഡ്സ് എയർഫോഴ്സ് ബേസിൽ നിന്ന് പറന്നുയർന്ന ഉടൻ യുഎസ് വ്യോമസേനയുടെ ബി-52 ബോംബർ തകർന്ന് എട്ടുപേർ കൊല്ലപ്പെട്ടു. തിങ്കളാഴ്ച പ്രാദേശിക സമയം 11:20-ഓടെയായിരുന്നു അപകടം. പതിവ് പരീക്ഷണ പറക്കലിനിടെയായിരുന്നു ദുരന്തം. വിമാനം തകർന്നുണ്ടായ സ്ഫോടനത്തിൽ ഉയർന്ന കറുത്ത പുക മൈലുകൾക്ക് അപ്പുറത്തുനിന്നും കാണാമായിരുന്നു.(US Air Force B52 Bomber Crash at Edwards Air Force Base)
സൈനികർ, സർക്കാർ ഉദ്യോഗസ്ഥർ, കരാർ ജീവനക്കാർ എന്നിവരടങ്ങുന്നതായിരുന്നു വിമാനത്തിലെ സംഘമെന്നും, എട്ടുപേർ കൊല്ലപ്പെട്ടത് അതീവ ദുഃഖകരമാണെന്നും കേണൽ ജെയിംസ് ഹെയ്സ് മാധ്യമങ്ങളോട് പറഞ്ഞു. അപകടത്തിൽപ്പെട്ടവർ ആരും അതിജീവിച്ചിട്ടില്ലെന്നാണ് പ്രാഥമിക നിഗമനമെന്ന് വ്യോമതാവളം അധികൃതർ വ്യക്തമാക്കി. കൊല്ലപ്പെട്ടവരുടെ കുടുംബാംഗങ്ങളെ വിവരം അറിയിച്ചുവരികയാണെന്നും, 24 മണിക്കൂറിനുശേഷം പേരുകൾ ഔദ്യോഗികമായി പുറത്തുവിടുമെന്നും കേണൽ ഹെയ്സ് അറിയിച്ചു.
വിമാനം റൺവേയിൽ വെച്ചുതന്നെ പൂർണ്ണമായും തകർന്നുവെന്നും, തുടർന്ന് സ്ഥലത്ത് തീപിടുത്തമുണ്ടായെന്നും ഹെയ്സ് വിശദീകരിച്ചു. സംഭവത്തിൽ ഉന്നതതല അന്വേഷണം ആരംഭിച്ചിട്ടുണ്ട്. പ്രാരംഭ റിപ്പോർട്ട് ലഭിക്കാൻ 30 ദിവസമെങ്കിലും സമയമെടുക്കും. കൃത്യമായ കാരണം കണ്ടെത്താൻ ആറുമാസത്തിലധികം വേണ്ടിവരുമെന്നും അദ്ദേഹം കൂട്ടിച്ചേർത്തു. സുരക്ഷാ മുൻകരുതലിന്റെ ഭാഗമായി ബേസിലെ പ്രവർത്തനങ്ങൾ താൽക്കാലികമായി നിർത്തിവെച്ചു.
1950-കൾ മുതൽ യുഎസ് സൈന്യം ഉപയോഗിച്ചുവരുന്ന ദീർഘദൂര തന്ത്രപ്രധാന ബോംബറാണ് ബോയിംഗ് ബി-52 സ്ട്രാറ്റോഫോർട്രസ്. ‘ദ ബഫ്’ എന്നറിയപ്പെടുന്ന ഈ വിമാനത്തിന് ഒരേസമയം നൂറുകണക്കിന് ബോംബുകളും 32 ആണവ ക്രൂയിസ് മിസൈലുകളും വഹിക്കാൻ ശേഷിയുണ്ട്. നിലവിൽ ഇറാനെതിരെ നടക്കുന്ന യുദ്ധത്തിൽ ഈ വിമാനങ്ങൾ സജീവമായി പങ്കെടുക്കുന്നുണ്ട്. അപകടത്തെത്തുടർന്ന് യുഎസ് കോൺഗ്രസ് അംഗങ്ങളായ ജെയ് ഓബർനോൾട്ടെ, ലിസ മക്ലിൻ തുടങ്ങിയവർ അനുശോചനം രേഖപ്പെടുത്തി. രക്ഷാപ്രവർത്തനത്തിൽ ഏർപ്പെട്ടവരെ അവർ അഭിനന്ദിക്കുകയും ചെയ്തു.
Story Summary
Eight people were killed when a US Air Force B-52 bomber crashed shortly after takeoff from Edwards Air Force Base in California during a routine test mission. The base has grounded operations while officials conduct an investigation into the cause of the tragic crash.
