റാവലാകോട്ട്: പാക് അധിനിവേശ കശ്മീരിൽ ജനങ്ങൾക്കെതിരെ പാകിസ്ഥാൻ സൈന്യം നടത്തുന്ന അതിക്രമങ്ങൾ രൂക്ഷമാകുന്നു. റാവലാക്കോട്ടിലെ ഈദ്ഗാഹ് ഗ്രൗണ്ടിൽ ഒത്തുകൂടിയ ആയിരക്കണക്കിന് പ്രതിഷേധക്കാർക്ക് നേരെ സൈന്യം നടത്തിയ വെടിവെപ്പിൽ 16 പേർ കൊല്ലപ്പെട്ടു (Pakistan Army Firing PoK). അരി, ഗോതമ്പ്, വൈദ്യുതി തുടങ്ങിയ അവശ്യവസ്തുക്കളുടെ വിലവർദ്ധനയ്ക്കെതിരെയും അടിസ്ഥാന മനുഷ്യാവകാശങ്ങൾക്കുവേണ്ടിയും സമാധാനപരമായി തുടങ്ങിയ പ്രക്ഷോഭം, സൈന്യം ജനക്കൂട്ടത്തിന് നേരെ വെടിയുതിർത്തതോടെ ചോരക്കളമായി മാറുകയായിരുന്നു.
ഏകദേശം 60,000 മുതൽ 70,000 വരെ ആളുകളാണ് പാകിസ്ഥാന്റെ തുടർച്ചയായ അധിനിവേശത്തിനും തെറ്റായ നയങ്ങൾക്കുമെതിരെ മുദ്രാവാക്യം വിളിക്കാനായി റാവലാക്കോട്ടിൽ തടിച്ചുകൂടിയത്. കഴിഞ്ഞ ചൊവ്വാഴ്ച സുരക്ഷാ സേനയുമായുണ്ടായ സംഘർഷത്തിൽ കൊല്ലപ്പെട്ട 30 പേർക്ക് നീതി ലഭിക്കണമെന്നും, അന്ന് പരിക്കേറ്റ 200-ഓളം പേർക്ക് ചികിത്സാ സൗകര്യങ്ങൾ ഉറപ്പാക്കണമെന്നും പ്രതിഷേധക്കാർ ആവശ്യപ്പെട്ടു. ജനങ്ങളുടെ ന്യായമായ ആവശ്യങ്ങൾ കേൾക്കുന്നതിന് പകരം സൈനിക ശക്തി ഉപയോഗിച്ച് അവരെ അടിച്ചമർത്താനാണ് പാകിസ്ഥാൻ ഭരണകൂടം ശ്രമിക്കുന്നത്.
തുടർച്ചയായി ഉണ്ടാകുന്ന ഇത്തരം വെടിവെപ്പുകളും മരണങ്ങളും പാക് അധിനിവേശ കശ്മീരിലെ സ്ഥിതിഗതികൾ അതീവ ഗുരുതരമാക്കിയിരിക്കുകയാണ്. പട്ടിണിയും വിലക്കയറ്റവും മൂലം പൊറുതിമുട്ടിയ ജനങ്ങൾ തെരുവിലിറങ്ങുമ്പോൾ, അവരെ സംരക്ഷിക്കേണ്ട സൈന്യം തന്നെ അവർക്ക് നേരെ തോക്കെടുക്കുന്ന നടപടിക്കെതിരെ അന്താരാഷ്ട്ര തലത്തിൽ വലിയ പ്രതിഷേധമാണ് ഉയരുന്നത്. പ്രദേശത്ത് അശാന്തി പടരുമ്പോൾ മനുഷ്യാവകാശ ലംഘനങ്ങൾക്കെതിരെ നടപടിയെടുക്കാൻ പാകിസ്ഥാൻ ഭരണകൂടം തയാറാകണമെന്ന ആവശ്യം ശക്തമായിരിക്കുകയാണ്.
Summary: At least 16 people were killed in Pakistan-occupied Kashmir (PoK) after the Pakistani army opened fire on thousands of unarmed protesters gathered at the Eidgah Ground in Rawalakot. The demonstration, which began as a peaceful protest against rising food prices, electricity costs, and general lack of basic rights, escalated when security forces unleashed gunfire. This incident follows a violent clash just two days earlier, where 30 people were killed and 200 injured, as residents continue to demand justice and express their opposition to Pakistan’s ongoing occupation and policies in the region.
