കൊച്ചി: കേരളത്തിന്റെ സ്വന്തം ഇന്റർനെറ്റ് പദ്ധതിയായ കെഫോൺ (KFON) ഉപഭോക്താക്കൾക്ക് കൂടുതൽ വേഗതയേറിയതും സ്ഥിരതയുള്ളതുമായ ഇന്റർനെറ്റ് സേവനം ഉറപ്പാക്കുന്നതിനായി ‘ഗൂഗിൾ കാഷിംഗ്’ (KFON Google Caching technology) സാങ്കേതികവിദ്യ ഔദ്യോഗികമായി പ്രവർത്തനക്ഷമമാക്കി. ഈ പുതിയ സംവിധാനത്തിലൂടെ യൂട്യൂബ് ഉൾപ്പെടെയുള്ള ഗൂഗിളിന്റെ വിവിധ സേവനങ്ങളിലേക്കും ഡിജിറ്റൽ പ്ലാറ്റ്ഫോമുകളിലേക്കുമുള്ള ആക്സസ് കൂടുതൽ വേഗത്തിലും തടസ്സമില്ലാതെയും ലഭ്യമാകും. മികച്ച വീഡിയോ നിലവാരവും ബഫറിംഗ് ഇല്ലാത്ത സ്ട്രീമിംഗ് അനുഭവവും ഈ സംവിധാനം വഴി കെഫോൺ ഉപഭോക്താക്കൾക്ക് ഉറപ്പാക്കാൻ സാധിക്കും. കെഫോണിന്റെ കൊച്ചിയിലുള്ള അത്യാധുനിക നെറ്റ്വർക്ക് ഓപ്പറേഷൻസ് സെന്ററിലാണ് (NOC) ഗൂഗിൾ കാഷിംഗ് സാങ്കേതികവിദ്യ ഇൻസ്റ്റാൾ ചെയ്തിരിക്കുന്നത്.
ഉപഭോക്താക്കൾ ദൈനംദിന ആവശ്യങ്ങൾക്കായി ഏറ്റവും കൂടുതൽ ഉപയോഗിക്കുന്ന ഡിജിറ്റൽ സേവനങ്ങളുടെ ഉള്ളടക്കങ്ങൾ (Contents) പ്രാദേശിക സെർവറുകളിൽ തന്നെ ലഭ്യമാക്കുന്ന രീതിയാണിത്. ഇതിലൂടെ ഡാറ്റാ ലഭ്യതയുടെ വേഗത വർധിപ്പിക്കാനും സേവന നിലവാരം ഗണ്യമായി മെച്ചപ്പെടുത്താനും സാധിക്കും. അത്യാധുനിക കാഷിംഗ്, ട്രാഫിക് ഒപ്റ്റിമൈസേഷൻ സാങ്കേതികവിദ്യകളുടെ സഹായത്തോടെ ഡാറ്റാ ലാറ്റൻസി (Data Latency) കുറയ്ക്കുന്നതിനും, നെറ്റ്വർക്ക് ട്രാഫിക് കൂടുതൽ കാര്യക്ഷമമായി കൈകാര്യം ചെയ്യുന്നതിനും, ഇന്റർനാഷണൽ ബാൻഡ്വിഡ്ത്ത് ഉപയോഗം വലിയ തോതിൽ കുറയ്ക്കുന്നതിനും ഈ സംവിധാനം സഹായകരമാകും.
ഈ പുതിയ അപ്ഗ്രേഡിലൂടെ ഡാറ്റാ ഉപഭോഗം കുത്തനെ ഉയരുന്ന തിരക്കേറിയ സമയങ്ങളിൽ പോലും ഉയർന്ന സേവന നിലവാരം ഒരേപോലെ നിലനിർത്താൻ കെഫോണിന് സാധിക്കും. സംസ്ഥാനത്തെ ഡിജിറ്റൽ അടിസ്ഥാനസൗകര്യ വികസനത്തിന്റെയും സാങ്കേതിക നവീകരണങ്ങളുടെയും ഭാഗമായാണ് ഇത്തരം ആഗോള നിലവാരമുള്ള സംവിധാനങ്ങൾ നടപ്പാക്കിവരുന്നതെന്ന് കെഫോൺ അധികൃതർ അറിയിച്ചു. ഗൂഗിൾ കാഷിംഗ് സംവിധാനം യാഥാർത്ഥ്യമായതോടെ കെഫോൺ കണക്ഷനുള്ള വീടുകൾക്കും വാണിജ്യ സ്ഥാപനങ്ങൾക്കും സർക്കാർ ഓഫീസുകൾക്കും മുൻപത്തേക്കാൾ മികച്ച ഇന്റർനെറ്റ് അനുഭവം നൽകാൻ കെഫോണിനാകുമെന്ന് അധികൃതർ വ്യക്തമാക്കി.
Story Summary: KFON has activated Google Caching technology at its Kochi Network Operations Centre to provide faster and more stable internet services. This upgrade allows localized data access for popular Google services, reducing latency and international bandwidth usage while ensuring high-quality, buffer-free streaming for homes, businesses, and government offices in Kerala.
