തിരുവനന്തപുരം: ഗാർഹിക ആവശ്യങ്ങൾക്കുള്ള എൽപിജി (LPG) സിലിണ്ടറിന് 29 രൂപ വർധിപ്പിച്ച നടപടി സാധാരണ ജനങ്ങളുടെ ജീവിതഭാരം ഇരട്ടിയാക്കുമെന്ന് പ്രതിപക്ഷ നേതാവ് പിണറായി വിജയൻ (LPG price hike Kerala). മൂന്ന് മാസത്തിനിടെ ഇത് രണ്ടാം തവണയാണ് ഗാർഹിക പാചകവാതക വില വർധിപ്പിക്കുന്നത്. കേന്ദ്ര സർക്കാരിന്റെ ഈ ജനദ്രോഹ നടപടി അടിയന്തിരമായി പിൻവലിക്കാൻ തയ്യാറാകണമെന്ന് അദ്ദേഹം ആവശ്യപ്പെട്ടു.
ജനങ്ങൾ ത്യാഗസന്നദ്ധരാകണമെന്ന പ്രധാനമന്ത്രിയുടെ പ്രസ്താവനയ്ക്ക് പിന്നാലെ ജനജീവിതത്തെ ദോഷകരമായി ബാധിക്കുന്ന ഒട്ടേറെ നടപടികൾ കേന്ദ്രത്തിൽ നിന്ന് തുടർച്ചയായി ഉണ്ടായിക്കൊണ്ടിരിക്കുകയാണ്. പുതിയ വർദ്ധനവോടെ 14.2 കിലോഗ്രാം ഗാർഹിക സിലിണ്ടറിന്റെ വില 951 രൂപയായി ഉയർന്നു. ഇതിന് മുൻപ് മാർച്ച് ഏഴിന് സിലിണ്ടറിന് 60 രൂപ വർദ്ധിപ്പിച്ചിരുന്നു. വാണിജ്യ പാചകവാതകത്തിന്റെ വില ഇരട്ടിയിലധികം വർധിച്ചതിനാൽ സംസ്ഥാനത്തെ ഹോട്ടൽ വ്യവസായം സമ്പൂർണ്ണ തകർച്ചയിലേക്ക് കൂപ്പുകുത്തുകയാണെന്നും അദ്ദേഹം ചൂണ്ടിക്കാട്ടി.
മെയ് പകുതിക്ക് ശേഷം പെട്രോൾ, ഡീസൽ വിലകളിൽ ലിറ്ററിന് മൊത്തത്തിൽ 7.50 രൂപയുടെ വർധനവാണ് ഉണ്ടായത്. ഇതിനൊപ്പം സിഎൻജിയ്ക്കും (CNG) കിലോഗ്രാമിന് 6 രൂപയും വർധിച്ചു. ഇന്ധനവില കുതിച്ചുയരുമ്പോഴും ജനങ്ങൾക്ക് ആശ്വാസം ഉറപ്പാക്കുന്ന വിധത്തിൽ സംസ്ഥാന സർക്കാരിന്റെ ഭാഗത്തുനിന്നും യാതൊരുവിധ അടിയന്തിര ഇടപെടലും ഉണ്ടാകുന്നില്ലെന്ന് പിണറായി വിജയൻ കുറ്റപ്പെടുത്തി.
പെട്രോളിയം വിലവർദ്ധനവ് മൂലം ലഭ്യമാകുന്ന അധിക നികുതി (അഡീഷണൽ ടാക്സ്) ഉപേക്ഷിക്കാൻ യുഡിഎഫ് സർക്കാർ തയ്യാറാവണമെന്നും, വിലക്കയറ്റത്തിന്റെ രൂക്ഷതയിൽ നിന്ന് സാധാരണക്കാരെ രക്ഷിക്കണമെന്നും നിയമസഭയിൽ ആവശ്യപ്പെട്ടിരുന്ന കാര്യവും അദ്ദേഹം ഓർമ്മിപ്പിച്ചു. ജനജീവിതം ദുസ്സഹമാക്കുന്ന കാര്യത്തിൽ കേന്ദ്ര-സംസ്ഥാന സർക്കാരുകൾ തുടരുന്ന നിഷേധാത്മക നിലപാടുകൾ തിരുത്തണമെന്നും പ്രതിപക്ഷ നേതാവ് ആവശ്യപ്പെട്ടു.
Story Summary: Opposition Leader Pinarayi Vijayan criticized both the central and state governments over the ₹29 hike in domestic LPG cylinder prices, raising the cost to ₹951. He termed it the second increase in three months and slammed the UDF state government for not waiving additional petroleum taxes to provide relief amid rising fuel and CNG costs.
