ന്യൂഡൽഹി: ഡൽഹി യൂണിവേഴ്സിറ്റി (DU) അസിസ്റ്റന്റ് പ്രൊഫസറായ ഡോ. ദേബോസ്മിത പോളിനെ (45) ഫ്ലാറ്റിനുള്ളിൽ കൊലപ്പെടുത്തിയ കേസിൽ പശ്ചിമ ബംഗാളിൽ നിന്നുള്ള ദമ്പതികളെ ഡൽഹി പോലീസ് അറസ്റ്റ് ചെയ്തു (Delhi University professor murder). കുടുംബത്തിന്റെ തറവാട് സ്വത്ത് വിൽക്കുന്നതുമായി ബന്ധപ്പെട്ട തർക്കമാണ് ക്രൂരമായ കൊലപാതകത്തിൽ കലാശിച്ചതെന്ന് പോലീസ് വ്യക്തമാക്കി. കൊൽക്കത്തയിൽ നിന്നാണ് പ്രതികളെ പോലീസ് പിടികൂടിയത്.
ഡൽഹി രാജാ ഗാർഡനിലെ ശിവാജി കോളേജിലെ അസിസ്റ്റന്റ് പ്രൊഫസറായ ദേബോസ്മിതയെ കഴിഞ്ഞ വ്യാഴാഴ്ചയാണ് കിഴക്കൻ ഡൽഹിയിലെ വസുന്ധര എൻക്ലേവിലുള്ള ഫ്ലാറ്റിൽ മരിച്ച നിലയിൽ കണ്ടെത്തിയത്. തലയ്ക്ക് ഗുരുതരമായി പരിക്കേൽക്കുകയും കൈത്തണ്ടകൾ മുറിച്ച നിലയിലുമായിരുന്നു മൃതദേഹം. ദേബോസ്മിതയുടെ മാതാപിതാക്കളുടെ കൊൽക്കത്തയിലുള്ള തറവാട് വീട്ടിൽ ദീർഘകാലമായി വാടകയ്ക്ക് താമസിക്കുന്നവരും ഇവരുടെ അകന്ന ബന്ധുക്കളുമാണ് അറസ്റ്റിലായ ദമ്പതികൾ.
പ്രതികൾ താമസിക്കുന്ന ഈ വീട് വിലയ്ക്ക് വാങ്ങാൻ ഇവർ ആഗ്രഹിച്ചിരുന്നു. ഡൽഹിയിൽ സ്ഥിരതാമസമാക്കിയ ദേബോസ്മിതയുടെ മാതാപിതാക്കൾക്കും മറ്റ് സഹോദരങ്ങൾക്കും വീട് വിൽക്കാൻ സമ്മതമായിരുന്നെങ്കിലും ദേബോസ്മിത ഇതിനെ ശക്തമായി എതിർത്തു. ദേബോസ്മിതയാണ് തങ്ങളുടെ ലക്ഷ്യത്തിന് പ്രധാന തടസ്സമെന്ന് മനസ്സിലാക്കിയ ദമ്പതികൾ, കൊൽക്കത്തയിൽ നിന്നും 1400 കിലോമീറ്റർ സഞ്ചരിച്ച് ഡൽഹിയിലെത്തി ഇവരെ കൊലപ്പെടുത്തുകയായിരുന്നു. പിടിക്കപ്പെടാതിരിക്കാൻ സ്വന്തം കുട്ടിയെയും ഒപ്പം കൂട്ടിയാണ് ഇവർ ഫ്ലാറ്റിലെത്തിയത്. കൃത്യം നടത്തിയ ശേഷം ബുധനാഴ്ച തന്നെ ഇവർ കൊൽക്കത്തയിലേക്ക് മടങ്ങുകയും ചെയ്തു. സിസിടിവി ദൃശ്യങ്ങളും ഫോൺ രേഖകളും കേന്ദ്രീകരിച്ച് നടത്തിയ അന്വേഷണത്തിലാണ് പ്രതികൾ വലയിലായത്.
Short Story Summary: A couple from West Bengal has been arrested in Kolkata for the brutal murder of 45-year-old Delhi University assistant professor Dr. Debosmita Paul in East Delhi. The investigation revealed that the accused, who were tenants in the professor’s ancestral house in Kolkata, wanted to buy the property. While the rest of the family agreed, Dr. Paul strongly opposed the sale, making her the main hurdle. Enraged, the couple traveled 1,400 km to Delhi, murdered her inside her apartment, and fled back to West Bengal.
