കോഴിക്കോട്: വടകര ലോക്സഭാ തിരഞ്ഞെടുപ്പ് കാലത്ത് വലിയ രാഷ്ട്രീയ കൊടുങ്കാറ്റ് ഉയർത്തിയ ‘കാഫിർ സ്ക്രീൻഷോട്ട്’ വ്യാജ പ്രചാരണവുമായി ബന്ധപ്പെട്ട കേസ് പുനരന്വേഷിക്കാൻ രൂപീകരിച്ച പ്രത്യേക അന്വേഷണ സംഘത്തിന്റെ ആദ്യ യോഗം നാളെ ചേരും (Vadakara Kafir Screenshot Case). കോഴിക്കോട് റൂറൽ എസ്.പി. ടി. ഫറാഷിന്റെ നേതൃത്വത്തിലാണ് പുതിയ പ്രത്യേക സംഘം യോഗം ചേർന്ന് തുടനടപടികൾക്ക് രൂപം നൽകുന്നത്. കേസിൽ കൃത്യമായ പ്രതികളിലേക്ക് എത്താൻ കഴിഞ്ഞില്ലെന്ന് ചൂണ്ടിക്കാട്ടി മുൻപ് അന്വേഷണം അവസാനിപ്പിക്കുന്നതായി പൊലീസ് കോടതിയിൽ റിപ്പോർട്ട് നൽകിയിരുന്നു. എന്നാൽ ഈ വിവാദ റിപ്പോർട്ടിന് പിന്നാലെ കേസിൽ സമഗ്രമായ പുനരന്വേഷണം വേണമെന്ന് ആവശ്യപ്പെട്ട് പാറക്കൽ അബ്ദുള്ള എം.എൽ.എ. ആഭ്യന്തര മന്ത്രി രമേശ് ചെന്നിത്തലയ്ക്ക് നേരിട്ട് പരാതി നൽകിയതിനെ തുടർന്നാണ് ഇന്നലെ പുതിയ അന്വേഷണ സംഘത്തെ പ്രഖ്യാപിച്ചത്.
കണ്ണൂർ റേഞ്ച് ഡി.ഐ.ജി. യതീഷ് ചന്ദ്രയ്ക്കാണ് ഈ നിർണായക അന്വേഷണത്തിന്റെ പൂർണ്ണ മേൽനോട്ട ചുമതല നൽകിയിരിക്കുന്നത്. ക്രൈംബ്രാഞ്ച് ഡിവൈ.എസ്.പി. ടി. മനോഹരൻ മുഖ്യ അന്വേഷണ ഉദ്യോഗസ്ഥനായിരിക്കുന്ന സംഘത്തിൽ വടകര പൊലീസ് സ്റ്റേഷനിലെ എസ്.എച്ച്.ഓ. ഉൾപ്പെടെ മറ്റ് ഏഴ് ഉദ്യോഗസ്ഥർ കൂടിയുണ്ട്. വടകര ലോക്സഭാ തിരഞ്ഞെടുപ്പിന്റെ കൊട്ടിക്കലാശ സമയത്തായിരുന്നു യുഡിഎഫ് സ്ഥാനാർത്ഥിക്കെതിരെ വർഗീയ പരാമർശങ്ങളടങ്ങിയ സ്ക്രീൻഷോട്ട് വ്യാപകമായി പ്രചരിച്ചത്. എം.എസ്.എഫ്. നേതാവായ മുഹമ്മദ് കാസിമാണ് ഇത് പ്രചരിപ്പിച്ചതെന്നായിരുന്നു എൽഡിഎഫ് കോട്ടകളിൽ നിന്നുള്ള ആദ്യ ആരോപണം. എന്നാൽ ഈ ആരോപണം ശക്തമായി നിഷേധിച്ച കാസിം തന്റെ മൊബൈൽ ഫോൺ സ്വമേധയാ പൊലീസിന് കൈമാറി നിരപരാധിത്വം തെളിയിച്ചിരുന്നു.
തുടർന്ന് സൈബർ സെല്ലിന്റെ സഹായത്തോടെ പൊലീസ് നടത്തിയ ആഴത്തിലുള്ള അന്വേഷണത്തിൽ സിപിഐഎം അനുകൂല സൈബർ പേജുകളിലാണ് ഈ സ്ക്രീൻഷോട്ട് ആദ്യം പ്രത്യക്ഷപ്പെട്ടതെന്ന് കണ്ടെത്തിയിരുന്നു. ഡിവൈഎഫ്ഐ പ്രവർത്തകനായ റിബേഷ് രാമകൃഷ്ണന്റെ ഫോണിൽ നിന്നാണ് ഇത് ആദ്യം പ്രചരിച്ചതെന്നും അന്വേഷണത്തിൽ വ്യക്തമായെങ്കിലും പിന്നീട് രാഷ്ട്രീയ സ്വാധീനത്താൽ തുടർനടപടികൾ ഉണ്ടായില്ലെന്ന ആക്ഷേപം ശക്തമാണ്. ഇതേത്തുടർന്നാണ് തെളിവില്ലെന്ന് കാട്ടി പൊലീസ് കേസ് അട്ടിമറിക്കാൻ നോക്കിയത്. അതിനിടെ, സ്ക്രീൻഷോട്ടിന് പിന്നിൽ പ്രവർത്തിച്ച യഥാർത്ഥ കുറ്റവാളികൾ ആരാണെന്ന് പുതിയ അന്വേഷണത്തിലൂടെ പുറത്തുവരട്ടെയെന്നും താൻ വടകരയിൽ കേവലം ഒരു സ്ഥാനാർത്ഥി മാത്രമായിരുന്നുവെന്നും മുൻ മന്ത്രി കെ.കെ. ശൈലജ പ്രതികരിച്ചു.
Summary: The newly formed Special Investigation Team (SIT) is scheduled to hold its first meeting tomorrow to probe the controversial Vadakara ‘Kafir’ screenshot case. The re-investigation was ordered under the supervision of Kannur Range DIG Yatish Chandra following a complaint by Parakkal Abdulla MLA to the Home Minister. Earlier police findings revealed that the screenshot originated from CPM-aligned cyber groups and a DYFI worker’s phone, though the case was briefly closed due to lack of evidence.
