ന്യൂഡൽഹി: സിബിഎസ്ഇ പന്ത്രണ്ടാം ക്ലാസ് പരീക്ഷയുടെ ഡിജിറ്റൽ മൂല്യനിർണ്ണയത്തിനായുള്ള ‘ഓൺ-സ്ക്രീൻ മാർക്കിംഗ്’ടെൻഡർ നടപടികളിൽ വൻ അഴിമതിയും സുരക്ഷാ വീഴ്ചയും നടന്നതായി പ്രതിപക്ഷ നേതാവ് രാഹുൽ ഗാന്ധി ആരോപിച്ചു (Rahul Gandhi CBSE Class 12 Evaluation Scam). പരീക്ഷാ ഫലത്തിലെ അപാകതകൾക്കെതിരെ പരസ്യമായി രംഗത്തുവന്ന വിദ്യാർത്ഥികളുമായി നേരിട്ട് കൂടിക്കാഴ്ച നടത്തിയ ശേഷമാണ് അദ്ദേഹം കേന്ദ്ര സർക്കാരിനും സിബിഎസ്ഇക്കുമെതിരെ കടുത്ത വിമർശനവുമായി രംഗത്തെത്തിയത്. തന്റെ ‘മൻ കി ബാത്’ പരിപാടിയിൽ മാമ്പഴത്തെ കുറിച്ച് സംസാരിക്കാൻ സമയം കണ്ടെത്തുന്ന പ്രധാനമന്ത്രി നരേന്ദ്ര മോദി, രാജ്യത്തെ 18.5 ലക്ഷം കുട്ടികളുടെ ഭാവിയെ ബാധിക്കുന്ന ഈ ഗുരുതരമായ പ്രതിസന്ധിയിൽ കടുത്ത മൗനം പാലിക്കുകയാണെന്ന് രാഹുൽ ഗാന്ധി എക്സിലൂടെ കുറ്റപ്പെടുത്തി. ഈ വൻ അഴിമതിയുടെ ധാർമ്മിക ഉത്തരവാദിത്തം ഏറ്റെടുത്ത് കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ ഉടൻ രാജിവെക്കണമെന്നും പ്രതിപക്ഷ നേതാവ് ആവശ്യപ്പെട്ടു.
ഒരു പ്രത്യേക സ്വകാര്യ കമ്പനിയെ വഴിവിട്ട് സഹായിക്കാൻ വേണ്ടി ബോർഡ് ടെൻഡർ നിബന്ധനകളിൽ വലിയ രീതിയിൽ ഇളവുകൾ വരുത്തിയെന്നാണ് പ്രധാന ആരോപണം. ആദ്യ ടെൻഡർ പ്രകാരം കുറഞ്ഞത് 300 ഡിപിഐ (DPI) റെസല്യൂഷനുള്ള ഓട്ടോമാറ്റിക് റോബോട്ടിക് സ്കാനറുകൾ ഉപയോഗിച്ച് ഉത്തരക്കടലാസുകൾ സ്കാൻ ചെയ്യണമെന്നുണ്ടായിരുന്നിട്ടും, പിന്നീട് പുറത്തിറക്കിയ പുതുക്കിയ ടെൻഡറിൽ ഈ നിബന്ധനകളെല്ലാം ഒഴിവാക്കി റെസല്യൂഷൻ 200 ഡിപിഐ ആയി കുറച്ചു. പ്രൊഫഷണൽ ഉപകരണങ്ങൾക്ക് പകരം സാധാരണ മൊബൈൽ ഫോണുകൾ ഉപയോഗിച്ചാണ് ഉത്തര കടലാസുകൾ സ്കാൻ ചെയ്തതെന്നും ഇതാണ് മങ്ങിയ കോപ്പികൾക്കും പേജുകൾ വിട്ടുപോകുന്നതിനും കാരണമായതെന്നും രാഹുൽ ഗാന്ധി ചൂണ്ടിക്കാട്ടി. ഇതിനുപുറമേ, നിസാർഗ അധികാരി എന്ന 19 വയസ്സുകാരനായ എത്തിക്കൽ ഹാക്കർ ഒഎസ്എം പോർട്ടലിലെ ഗുരുതരമായ സുരക്ഷാ വീഴ്ചകൾ സ്ക്രീൻഷോട്ടുകൾ സഹിതം പുറത്തുവിട്ടതോടെ വിവാദം കൂടുതൽ ശക്തമായിരിക്കുകയാണ്. ആർക്കും ലോഗിൻ ചെയ്ത് കുട്ടികളുടെ ഉത്തരക്കടലാസുകൾ ഡൗൺലോഡ് ചെയ്യാവുന്ന അവസ്ഥയാണ് നിലവിലുള്ളതെന്നും, ഈ ഡിജിറ്റൽ അനാസ്ഥ കാരണം സിബിഎസ്ഇയുടെ പന്ത്രണ്ടാം ക്ലാസ് വിജയശതമാനം കഴിഞ്ഞ വർഷത്തെ 88.39 ശതമാനത്തിൽ നിന്ന് ഇത്തവണ 85.2 ശതമാനമായി കുറഞ്ഞുവെന്നും പ്രതിപക്ഷം ആരോപിക്കുന്നു.
Summary: Opposition Leader Rahul Gandhi has alleged a massive scam in the CBSE Class 12 ‘On-Screen Marking’ digital evaluation process, claiming mobile phones were used instead of professional scanners. He criticized Prime Minister Narendra Modi for remaining silent on the anxiety of 18.5 lakh students and demanded the immediate resignation of Education Minister Dharmendra Pradhan. The controversy intensified following reports of low-resolution scans, missing pages, and severe data security flaws exposed by an ethical hacker on the evaluation portal.
