തിരുവനന്തപുരം: കേരളത്തിൽ പുതിയ ഭരണത്തിന് കീഴിൽ കെഎസ്ആർടിസി (KSRTC) ബസുകളിൽ സ്ത്രീകൾക്ക് സൗജന്യ യാത്ര ഒരുക്കുന്ന പ്രഖ്യാപനത്തിൽ നിർണ്ണായക അന്തിമ തീരുമാനം തിങ്കളാഴ്ച ചേരുന്ന മന്ത്രിസഭാ യോഗത്തിലുണ്ടാകും (Free KSRTC travel for women Kerala). പ്രായപരിധിയോ വരുമാന പരിധിയോ ഇല്ലാതെ സംസ്ഥാനത്തെ മുഴുവൻ സ്ത്രീകൾക്കും പദ്ധതിയുടെ ആനുകൂല്യം ലഭ്യമാക്കുമെന്നാണ് സൂചന. കെഎസ്ആർടിസിക്ക് സാമ്പത്തിക നഷ്ടമുണ്ടാക്കാത്ത രീതിയിൽ സർക്കാർ പ്രത്യേക ഫണ്ട് അനുവദിച്ചുകൊണ്ട് സൗജന്യ യാത്ര നടപ്പിലാക്കുമെന്നും, ജീവനക്കാരുടെ പെൻഷൻ ഇനി മുതൽ എല്ലാ മാസവും ഒന്നാം തീയതി തന്നെ വിതരണം ചെയ്യുമെന്നും ഗതാഗത മന്ത്രി സി.പി. ജോൺ വ്യക്തമാക്കി.
വരുന്ന ജൂൺ 15-ാം തീയതി മുതൽ സ്ത്രീകൾക്കുള്ള സൗജന്യ യാത്രാ ഗ്യാരണ്ടി സംസ്ഥാനത്ത് നിലവിൽ വരുമെന്നാണ് മുഖ്യമന്ത്രി ഉറപ്പ് നൽകിയിരിക്കുന്നത്. പദ്ധതിയുമായി ബന്ധപ്പെട്ട് ചില സഹകരണ സ്ഥാപനങ്ങൾ സാമ്പത്തിക സഹകരണത്തിൽ നിന്ന് പിന്മാറിയത് ചെറിയ പ്രതിസന്ധി ഉണ്ടാക്കുന്നുണ്ടെന്നും അവരുമായി അടിയന്തരമായി ചർച്ച നടത്തി പ്രശ്നം പരിഹരിക്കുമെന്നും മന്ത്രി കൂട്ടിച്ചേർത്തു. പ്രമുഖ വനിതാ ചലച്ചിത്ര താരങ്ങളെ ഉൾപ്പെടെ പങ്കെടുപ്പിച്ചു കൊണ്ട് വിപുലമായ ചടങ്ങോടെ പദ്ധതി ഉദ്ഘാടനം ചെയ്യാനാണ് സർക്കാർ ആലോചിക്കുന്നത്.
അതേസമയം , സൗജന്യ യാത്രാ പദ്ധതി നടപ്പിലാക്കുമ്പോൾ കെഎസ്ആർടിസിക്ക് ഉണ്ടാകുന്ന നഷ്ടം സംബന്ധിച്ച് കോർപ്പറേഷൻ സർക്കാരിന് സമർപ്പിച്ച റിപ്പോർട്ടിലെ കണക്കുകൾ താഴെ നൽകുന്നു.
| ബസ് സർവീസ് തരം | പ്രതിമാസ അധിക ബാധ്യത |
| മുഴുവൻ ബസുകളിലും (ഓർഡിനറി, ഫാസ്റ്റ്, എക്സ്പ്രസ്സ്) | ₹112 കോടി രൂപ |
| ഓർഡിനറി ബസുകളിൽ മാത്രം (ലിമിറ്റഡ് സ്റ്റോപ്പ് ഉൾപ്പെടെ) | ₹57 കോടി രൂപ |
കെഎസ്ആർടിസിയുടെ നിലവിലെ കടുത്ത സാമ്പത്തിക പ്രതിസന്ധി കണക്കിലെടുത്ത് ആദ്യഘട്ടത്തിൽ ഓർഡിനറി ബസുകളിൽ മാത്രമായി പദ്ധതി പരിമിതപ്പെടുത്താനാണ് ധനവകുപ്പിന്റെ ശുപാർശ. തിങ്കളാഴ്ചത്തെ മന്ത്രിസഭാ യോഗത്തിന് ശേഷം മാത്രമേ ഇതിൽ അന്തിമമായ രൂപരേഖ പുറത്തുവരൂ.
Story Summary: The final decision on providing free KSRTC travel for women will be taken in Monday’s cabinet meeting. Transport Minister C.P. John stated that the scheme is planned to launch on June 15 without any age or income limits, and the government will bear the financial liability.
