ചെന്നൈ: തമിഴ്നാട്ടിൽ ഈ വർഷത്തെ പത്താം ക്ലാസ് (SSLC) പരീക്ഷാ ഫലം പ്രഖ്യാപിച്ചു. 94.31 ശതമാനമാണ് സംസ്ഥാനത്തെ ആകെ വിജയശതമാനം. കഴിഞ്ഞ നാല് വർഷത്തിനിടയിലെ ഏറ്റവും ഉയർന്ന വിജയശതമാനമാണിത്. രാവിലെ 9:30 മുതൽ വിദ്യാർത്ഥികൾക്ക് തങ്ങളുടെ ഫലങ്ങൾ tnresults.nic.in, dge.tn.gov.in, results.digilocker.gov.in എന്നീ ഔദ്യോഗിക വെബ്സൈറ്റുകൾ വഴി ലഭ്യമായിത്തുടങ്ങി.(Tamil Nadu SSLC Result Declared Girls Outperform Boys To Record Four Year High Pass Percentage)
ഇത്തവണയും ആൺകുട്ടികളെ മറികടന്ന് പെൺകുട്ടികളാണ് വിജയത്തിൽ മുന്നിലെത്തിയത്. പരീക്ഷ എഴുതിയ പെൺകുട്ടികളിൽ 96.47 ശതമാനം പേർ വിജയിച്ചപ്പോൾ, ആൺകുട്ടികളുടെ വിജയശതമാനം 92.15 ആണ്. സംസ്ഥാനത്തെ 5,171 സ്കൂളുകൾ എല്ലാ വിദ്യാർത്ഥികളെയും വിജയിപ്പിച്ചു നൂറുമേനി കൊയ്തു. ഇത്തവണ 8.82 ലക്ഷം റെഗുലർ വിദ്യാർത്ഥികളും 26,196 പ്രൈവറ്റ് വിദ്യാർത്ഥികളുമടക്കം ആകെ 9.09 ലക്ഷം പേരാണ് പരീക്ഷയ്ക്കായി രജിസ്റ്റർ ചെയ്തിരുന്നത്. മാർച്ച് 11 മുതൽ ഏപ്രിൽ 6 വരെയായിരുന്നു തമിഴ്നാട്ടിൽ പത്താം ക്ലാസ് പരീക്ഷകൾ നടന്നത്.
തമിഴ്നാട്ടിൽ മുൻവർഷങ്ങളെ അപേക്ഷിച്ച് വിജയശതമാനത്തിൽ വലിയ പുരോഗതിയാണ് ഉണ്ടായിരിക്കുന്നത്. കഴിഞ്ഞ വർഷം 93.80% ആയിരുന്നു വിജയം. അതിനു മുൻപത്തെ വർഷങ്ങളിൽ യഥാക്രമം 2024-ൽ 91.55%, 2023-ൽ 91.39%, 2022-ൽ 90.07% എന്നിങ്ങനെയായിരുന്നു വിജയനിരക്ക്. കോവിഡ് പ്രതിസന്ധിയുണ്ടായിരുന്ന 2020, 2021 വർഷങ്ങളിൽ സംസ്ഥാനത്ത് 100% വിജയമായിരുന്നു. ഇക്കഴിഞ്ഞ മേയ് 15-നായിരുന്നു കേരളത്തിലെ എസ്എസ്എൽസി ഫല പ്രഖ്യാപനം നടന്നത്. 99.07% വിജയമാണ് കേരളം കുറിച്ചത്.
തമിഴ്നാട് എസ്എസ്എൽസി ഫലം എങ്ങനെ പരിശോധിക്കാം?
ആദ്യം tnresults.nic.in എന്ന വെബ്സൈറ്റ് സന്ദർശിക്കുക.
ഹോം പേജിൽ കാണുന്ന ‘Class 10th SSLC result 2026’ എന്ന ലിങ്കിൽ ക്ലിക്ക് ചെയ്യുക.
തുറന്നുവരുന്ന വിൻഡോയിൽ നിങ്ങളുടെ പരീക്ഷാ റോൾ നമ്പർ/രജിസ്റ്റർ നമ്പർ, ജനനത്തീയതി എന്നിവ കൃത്യമായി നൽകുക.
തുടർന്ന് സബ്മിറ്റ് (Submit) ഓപ്ഷൻ നൽകുന്നതോടെ നിങ്ങളുടെ മാർക്ക് ഷീറ്റ് സ്ക്രീനിൽ തെളിയും. ഇത് ഡൗൺലോഡ് ചെയ്ത് സൂക്ഷിക്കാവുന്നതാണ്.
Story Summary
The Tamil Nadu Directorate of Government Examinations has announced the Class 10th SSLC results for 2026, recording a four-year high pass percentage of 94.31%. Girls outperformed boys with a pass rate of 96.47%, and over 5,100 schools across the state achieved a 100% success rate.
