ഹോളിവുഡ്: സ്വന്തം അടിവസ്ത്ര ബ്രാൻഡിന്റെ പ്രമോഷനായി ലോകപ്രശസ്തമായ ഹോളിവുഡ് സൈനിൽ അതിക്രമിച്ച് കയറിയ അമേരിക്കൻ നടി സിഡ്നി സ്വീനിക്കെതിരെ വ്യാപക വിമർശനം. സംരക്ഷിത സ്മാരകമായ ഹോളിവുഡ് സൈനിന്റെ അക്ഷരങ്ങളിൽ അടിവസ്ത്രങ്ങൾ തൂക്കിയിട്ട നടിയുടെ നടപടി വിലകുറഞ്ഞ ‘പ്രൊമോഷണൽ സ്റ്റണ്ട്’ ആണെന്നാണ് സോഷ്യൽ മീഡിയയുടെ പരിഹാസം.
കലിഫോർണിയയിലുള്ള ഹോളിവുഡ് സൈനിന്റെ സമീപപ്രദേശങ്ങളിൽ ചിത്രീകരണം നടത്താൻ ‘ഫിലിംഎൽഎ’ (FilmLA) എന്ന ഏജൻസിയിൽ നിന്ന് സ്വീനിയും സംഘവും അനുമതി വാങ്ങിയിരുന്നു. എന്നാൽ സ്മാരകത്തിൽ സ്പർശിക്കാനോ അതിൽ കയറാനോ യാതൊരു അനുവാദവും നൽകിയിരുന്നില്ലെന്ന് അധികൃതർ വ്യക്തമാക്കി. ഇത് മറികടന്ന് രാത്രിയിൽ സംഘത്തോടൊപ്പം എത്തിയ നടി, സൈനിന്റെ അക്ഷരങ്ങൾക്ക് മുകളിൽ അടിവസ്ത്രങ്ങൾ തൂക്കിയിടുകയായിരുന്നു. ഇതിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെയാണ് സംഭവം പുറത്തറിഞ്ഞത്.
സംരക്ഷിത ലാൻഡ്മാർക്കായ ഹോളിവുഡ് സൈനിൽ അനുമതിയില്ലാതെ അതിക്രമിച്ചു കയറിയതിന് (Trespassing) നടിക്കെതിരെ നിയമനടപടി ഉണ്ടായേക്കുമെന്നാണ് സൂചന. ഹോളിവുഡ് ചേംബർ ഓഫ് കൊമേഴ്സും പ്രാദേശിക അധികൃതരും സംഭവത്തിൽ അതൃപ്തി രേഖപ്പെടുത്തിയിട്ടുണ്ട്. ഇത്തരം നടപടികൾ സ്മാരകത്തിന്റെ പവിത്രതയെ ബാധിക്കുമെന്നും കർശനമായ ശിക്ഷ ഉറപ്പാക്കണമെന്നും പരിസ്ഥിതി പ്രവർത്തകരും ആവശ്യപ്പെടുന്നു.
