കൊച്ചി: തിയേറ്റർ ഹിറ്റുകളില്ലാത്ത നീണ്ട 13 വർഷങ്ങൾ… കൃത്യമായി പറഞ്ഞാൽ 4,697 ദിവസങ്ങളാണ് ‘നടിപ്പിൻ നായകൻ’ സൂര്യയുടെ ഒരു തകർപ്പൻ തിയേറ്റർ വിജയത്തിനായി അദ്ദേഹത്തിന്റെ ആരാധകരും സിനിമാ പ്രേമികളും കാത്തിരുന്നത് (Suriya Karuppu box office collection day 4). എന്നാൽ ഇപ്പോൾ, എവിടെയാണോ നിർത്തിയത് അവിടെനിന്ന് അതേ ശക്തിയോടെ, കൂടുതൽ ആവേശത്തോടെ സൂര്യ തിയേറ്ററുകളിൽ അതിശക്തമായ തിരിച്ചുവരവ് നടത്തിയിരിക്കുകയാണ്; പുതിയ ചിത്രം ‘കറുപ്പി’ലൂടെ!
തീയേറ്ററുകളിൽ റിലീസ് ചെയ്ത് വെറും നാല് ദിനങ്ങൾ പിന്നിടുമ്പോൾ തന്നെ ലോകമെമ്പാടുമുള്ള ബോക്സ് ഓഫീസുകളെ വിറപ്പിച്ചു കൊണ്ട് 147 കോടിയിലധികം രൂപയാണ് ചിത്രം വാരിക്കൂട്ടിയത്. സൂര്യയുടെ കരിയറിലെ തന്നെ ഏറ്റവും ഉയർന്ന റെക്കോർഡ് കളക്ഷനിലേക്കാണ് ‘കറുപ്പ്’ ഇപ്പോൾ കുതിച്ചുകൊണ്ടിരിക്കുന്നത്.
പ്രമുഖ ടിക്കറ്റ് ബുക്കിംഗ് പ്ലാറ്റ്ഫോമായ ബുക്ക് മൈ ഷോയിലൂടെ (BookMyShow) മാത്രം ഇതിനകം 2 മില്യണിൽപ്പരം (20 ലക്ഷത്തിലധികം) ടിക്കറ്റുകളാണ് വിറ്റഴിഞ്ഞത്.തമിഴ്നാടിന് പുറമെ കേരളത്തിലും ചിത്രത്തിന് ഗംഭീര പ്രേക്ഷക പ്രതികരണവും റെക്കോർഡ് കളക്ഷനുമാണ് ലഭിക്കുന്നത്. റിലീസ് ചെയ്ത ആദ്യ നാല് ദിവസവും ലോകവ്യാപകമായി ഹൗസ്ഫുൾ ഫാസ്റ്റ് ഫില്ലിംഗ് ഷോകളാണ് ചിത്രത്തിന് ലഭിച്ചത്.
സൂര്യയുടെ കരിയറിലെ ഏറ്റവും വലിയ തിയേറ്റർ വിജയമായിരുന്ന ‘സിങ്കം 2’-ന്റെ ലൈഫ് ടൈം കളക്ഷൻ റെക്കോർഡുകളെയാണ് വെറും 4 ദിവസം കൊണ്ട് ‘കറുപ്പ്’ മറികടന്നത്.
പ്രമുഖ നടനും സംവിധായകനുമായ ആർ.ജെ. ബാലാജി ഒരുക്കിയ ഈ ചിത്രം എല്ലാവിധ മാസ്സ് ഘടകങ്ങളും ചേർന്ന ഒരു സമ്പൂർണ്ണ ആക്ഷൻ എന്റർടൈനറാണ്. രണ്ട് പതിറ്റാണ്ടുകൾക്ക് (20 വർഷം) ശേഷം സൂര്യയും തൃഷയും വീണ്ടും ഒന്നിക്കുന്നു എന്നതായിരുന്നു ചിത്രത്തിന്റെ ഏറ്റവും വലിയ ആകർഷണം. മുൻ ചിത്രങ്ങളിൽ നിന്നും തികച്ചും വ്യത്യസ്തമായ ഗെറ്റപ്പിലും മേക്കോവറിലുമാണ് ഇരുവരും ചിത്രത്തിൽ പ്രത്യക്ഷപ്പെടുന്നത്.
വൈറൽ ഹിറ്റുകളിലൂടെ തെന്നിന്ത്യയിൽ ശ്രദ്ധേയനായ യുവ സംഗീത സംവിധായകൻ സായ് അഭ്യാങ്കറാണ് ചിത്രത്തിന് ആവേശം കൂട്ടുന്ന പശ്ചാത്തല സംഗീതവും ഗാനങ്ങളും ഒരുക്കിയിരിക്കുന്നത്. മലയാളത്തിൽ നിന്ന് ഇന്ദ്രൻസ്, സ്വാസിക, അനഘ, ഉണ്ണിമായ പ്രസാദ് (മായ രവി), ശിവദ എന്നിവർക്കൊപ്പം നാട്ടി, സുപ്രീത് റെഡ്ഡി തുടങ്ങിയ വൻ താരനിരയും ചിത്രത്തിൽ പ്രധാന വേഷങ്ങളിൽ അണിനിരക്കുന്നുണ്ട്. ചിത്രത്തിന്റെ പി.ആർ.ഒ (PRO) ആൻഡ് പ്രൊമോഷൻസ് നിർവ്വഹിക്കുന്നത് പ്രതീഷ് ശേഖറാണ്.
Story Summary: After a 13-year long wait at the box office, actor Suriya has made a historic theatrical comeback with his new movie ‘Karuppu’. Directed by RJ Balaji, the mass action entertainer has collected over ₹147 crores worldwide in just 4 days, breaking the records of ‘Singam 2’. The film, featuring Trisha as the female lead after 20 years, has already crossed 2 million ticket sales on BookMyShow.
