തിരുവനന്തപുരം: വി.എസ്. അച്യുതാനന്ദൻ ജീവിച്ചിരുന്നെങ്കിൽ പത്മ പുരസ്കാരം നിരസിക്കുമായിരുന്നുവെന്ന് എം.എ. ബേബി പറഞ്ഞു. പയ്യന്നൂർ ധൻരാജ് രക്തസാക്ഷി ഫണ്ട് വിവാദത്തിൽ പാർട്ടിക്ക് കൃത്യമായ കണക്കുണ്ടെന്നും അദ്ദേഹം വ്യക്തമാക്കി.(If VS Achuthanandan was alive, he would have refused the award, says MA Baby)
വി.എസിന് മരണാനന്തര ബഹുമതിയായി പത്മവിഭൂഷൺ നൽകിയതിൽ കേന്ദ്രത്തെ കുറ്റപ്പെടുത്തുന്നില്ല. എന്നാൽ മുമ്പ് ഇ.എം.എസ് അടക്കമുള്ള പാർട്ടി നേതാക്കൾ ഇത്തരം പുരസ്കാരങ്ങൾ നിരസിച്ച ചരിത്രമാണുള്ളത്. വി.എസ് ഉണ്ടായിരുന്നെങ്കിലും ഇതേ നിലപാട് സ്വീകരിക്കുമായിരുന്നു. പുരസ്കാരം സ്വീകരിക്കണോ വേണ്ടയോ എന്ന് തീരുമാനിക്കേണ്ടത് അദ്ദേഹത്തിന്റെ കുടുംബമാണെന്നും എം.എ. ബേബി കൂട്ടിച്ചേർത്തു.
പയ്യന്നൂരിലെ ഫണ്ട് വിനിയോഗത്തിൽ പാർട്ടിക്ക് യാതൊരു സംശയവുമില്ല. കണക്കുകൾ സുതാര്യമാണ്. വി. കുഞ്ഞിക്കൃഷ്ണൻ ഉയർത്തിയ ആരോപണങ്ങൾ സംസ്ഥാന ഘടകം കൈകാര്യം ചെയ്യുമെന്നും കേന്ദ്ര നേതൃത്വം ഇതിൽ ഇടപെടേണ്ട സാഹചര്യമില്ലെന്നും അദ്ദേഹം വ്യക്തമാക്കി.
സോണിയ ഗാന്ധിക്ക് സ്വർണ്ണക്കടത്ത് പ്രതികളുമായി നേരിട്ട് ബന്ധമുണ്ടെന്ന് പാർട്ടി കരുതുന്നില്ല. എന്നാൽ അതീവ സുരക്ഷയുള്ള അവർക്ക് സമീപത്തേക്ക് ഇത്തരം ആളുകളെ എത്തിച്ചത് ആരാണെന്ന് വ്യക്തമാക്കണമെന്നും അദ്ദേഹം വിശദീകരിച്ചു.
കുടുംബ സമ്പർക്ക പരിപാടിക്കിടെ പാത്രം കഴുകിയതിനെ പരിഹസിക്കുന്നവരോട് കഴിച്ച പാത്രം കഴുകി വെക്കുന്നത് കമ്മ്യൂണിസ്റ്റ് രീതിയാണെന്ന് അദ്ദേഹം വ്യക്തമാക്കി. എം. ലീലാവതി, ടി. പദ്മനാഭൻ തുടങ്ങിയ പ്രമുഖരെ പത്മ പുരസ്കാരങ്ങളിൽ നിന്ന് ഒഴിവാക്കിയത് എന്തുകൊണ്ടെന്ന ചോദ്യവും അദ്ദേഹം ഉന്നയിച്ചു.
