ഹൈദരാബാദ്: തെലങ്കാനയിലെ മഹബൂബ് നഗറിൽ അമിതവേഗതയിലെത്തിയ ഹയാബൂസ ബൈക്ക് കാറിലിടിച്ചുണ്ടായ ദാരുണമായ അപകടത്തിൽ അഞ്ച് പേർ കൊല്ലപ്പെട്ടു. ഞായറാഴ്ച രാത്രി പാലകൊണ്ട ബൈപ്പാസ് റോഡിലാണ് സംഭവം. മണിക്കൂറിൽ 140 കിലോമീറ്ററിലധികം വേഗതയിൽ പാഞ്ഞെത്തിയ ബൈക്ക് നിയന്ത്രണം വിട്ട് കാറിലിടിക്കുകയായിരുന്നു. (Hayabusa Crash Mahabubnagar)
കാറിൽ സഞ്ചരിച്ചിരുന്ന ഒരു കുടുംബത്തിലെ മൂന്ന് പേർ സംഭവസ്ഥലത്ത് വെച്ച് തന്നെ മരിച്ചു. അർഷിയ ബീഗം (30), ഏഴ് വയസ്സുകാരൻ ഉജെപ, രണ്ട് വയസ്സുകാരൻ അമർ എന്നിവരാണ് മരിച്ച കാർ യാത്രക്കാർ. ബൈക്കിലുണ്ടായിരുന്ന രണ്ട് യുവാക്കളെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ബൈക്ക് യാത്രക്കാരിൽ ഒരാൾ യാക്കൂബ് അഫ്സൽ (25) ആണെന്ന് തിരിച്ചറിഞ്ഞിട്ടുണ്ട്.
രാത്രികാലങ്ങളിൽ ബൈപ്പാസ് റോഡുകൾ യുവാക്കളുടെ നിയമവിരുദ്ധ ബൈക്ക് റേസിംഗിനും അഭ്യാസപ്രകടനങ്ങൾക്കും വേദിയാകുന്നുണ്ടെന്ന് പ്രദേശവാസികൾ ആരോപിച്ചു. സ്പോർട്സ് ബൈക്കുകളിൽ അമിതവേഗതയിൽ പായുന്ന യുവാക്കൾ കാൽനടയാത്രക്കാരുടെയും മറ്റ് വാഹനയാത്രക്കാരുടെയും ജീവന് ഭീഷണിയാകുന്നുണ്ട്. പലതവണ പരാതിപ്പെട്ടിട്ടും പോലീസ് കർശന നടപടി സ്വീകരിച്ചിട്ടില്ലെന്ന് നാട്ടുകാർ കുറ്റപ്പെടുത്തി. ഹൈവേകളിൽ രാത്രികാല പട്രോളിംഗ് ശക്തമാക്കണമെന്നും സ്പീഡ് ഗണ്ണുകളും സിസിടിവി ക്യാമറകളും സ്ഥാപിച്ച് നിയമലംഘകർക്കെതിരെ കർശന നടപടി എടുക്കണമെന്നും ആവശ്യപ്പെട്ട് പ്രതിഷേധം ശക്തമാണ്.
Summary: Five people, including three members of a family, died in a horrific accident in Telangana’s Mahabubnagar after a speeding Hayabusa bike, traveling at 140 kmph, crashed into a car. Locals alleged that the bypass has become a hub for illegal night racing and demanded immediate police intervention to prevent further tragedies.
,
