ന്യൂഡൽഹി: റിപ്പബ്ലിക് ദിനാഘോഷങ്ങളുടെ ഭാഗമായി ഡൽഹിയിൽ മുമ്പെങ്ങുമില്ലാത്ത വിധത്തിലുള്ള ഹൈടെക് സുരക്ഷയാണ് ഒരുക്കിയിരിക്കുന്നത്. ഉദ്യോഗസ്ഥർ സാധാരണ കണ്ണടകൾക്ക് പകരം ആർട്ടിഫിഷ്യൽ ഇന്റലിജൻസ് അധിഷ്ഠിതമായ സ്മാർട്ട് ഗ്ലാസുകൾ ധരിച്ചാണ് പട്രോളിംഗ് നടത്തുന്നത്.(Republic Day celebrations, Delhi Police with AI smart glasses)
എങ്ങനെയാണ് ഈ സ്മാർട്ട് ഗ്ലാസുകൾ പ്രവർത്തിക്കുന്നത്?
ഫേസ് റെക്കഗ്നിഷൻ: പോലീസ് ഡാറ്റാബേസിലെ കുറ്റവാളികളുടെയും സംശയിക്കപ്പെടുന്നവരുടെയും വിവരങ്ങളുമായി ഈ ഗ്ലാസുകൾ ബന്ധിപ്പിച്ചിരിക്കുന്നു. ഒരു വ്യക്തിയെ നോക്കുമ്പോൾ തന്നെ ആ മുഖം ഡാറ്റാബേസുമായി ഒത്തുനോക്കാൻ ഇതിന് സാധിക്കും.
നിറങ്ങളിലൂടെ തിരിച്ചറിയാം: പരിശോധനയിൽ വ്യക്തിക്ക് ക്രിമിനൽ പശ്ചാത്തലമില്ലെങ്കിൽ ഗ്ലാസിൽ പച്ച സിഗ്നൽ തെളിയും. മറിച്ച് കുറ്റവാളിയാണെങ്കിൽ ചുവപ്പ് സിഗ്നൽ നൽകി ഉദ്യോഗസ്ഥർക്ക് മുന്നറിയിപ്പ് നൽകും.
തെർമൽ ഇമേജിംഗ്: വസ്ത്രങ്ങൾക്കുള്ളിൽ ഒളിപ്പിച്ചുവെച്ചിരിക്കുന്ന ലോഹ വസ്തുക്കളോ ആയുധങ്ങളോ കണ്ടെത്താൻ ഈ ഗ്ലാസുകളിലെ തെർമൽ സെൻസറുകൾ സഹായിക്കുന്നു.
രൂപം മാറിയാലും കുടുങ്ങും: വർഷങ്ങൾ കഴിഞ്ഞോ വേഷം മാറിയോ എത്തുന്നവരെപ്പോലും നിമിഷങ്ങൾക്കുള്ളിൽ തിരിച്ചറിയാൻ ഈ AI സാങ്കേതികവിദ്യയ്ക്ക് കരുത്തുണ്ട്.
ആഘോഷങ്ങളുടെ സുരക്ഷയ്ക്കായി മാത്രം പതിനായിരത്തോളം പേരെ പ്രത്യേകമായി വിന്യസിച്ചു. ആറ് തലങ്ങളിലുള്ള സുരക്ഷാ പരിശോധനയാണ്കർത്തവ്യപഥിലും പരിസരത്തും ഏർപ്പെടുത്തിയിരിക്കുന്നത്. സിസിടിവികൾക്ക് പുറമെ ഫേസ് റെക്കഗ്നിഷൻ സംവിധാനമുള്ള പ്രത്യേക വാഹനങ്ങളും നഗരത്തിന്റെ വിവിധ ഭാഗങ്ങളിൽ നിലയുറപ്പിച്ചിട്ടുണ്ട്.
