കൊച്ചി: നിയമസഭാ തിരഞ്ഞെടുപ്പിൽ യുഡിഎഫ് നേടിയ വൻ വിജയത്തിന് പിന്നാലെ എറണാകുളം സൗത്ത് റെയിൽവേ സ്റ്റേഷനിലെത്തിയ പ്രതിപക്ഷ നേതാവ് വി.ഡി. സതീശന് ആവേശകരമായ സ്വീകരണം നൽകി പ്രവർത്തകർ (V.D. Satheesan Kochi Visit). തിരുവനന്തപുരത്ത് നിന്ന് വന്ദേഭാരത് എക്സ്പ്രസിൽ എത്തിയ അദ്ദേഹത്തെ സ്വീകരിക്കാൻ നൂറുകണക്കിന് കോൺഗ്രസ്, യൂത്ത് കോൺഗ്രസ്, കെഎസ് യു പ്രവർത്തകരാണ് റെയിൽവേ സ്റ്റേഷനിൽ തടിച്ചുകൂടിയത്.
ട്രെയിൻ പ്ലാറ്റ്ഫോമിലെത്തിയപ്പോൾ തന്നെ മുദ്രാവാക്യം വിളികളുമായി പ്രവർത്തകർ സതീശനെ പൊതിഞ്ഞു. പ്ലാറ്റ്ഫോമിൽ വെച്ച് അദ്ദേഹത്തെ ചുമലിലേറ്റിയാണ് പ്രവർത്തകർ പുറത്തേക്ക് ആനയിച്ചത്. വർഷങ്ങൾക്ക് ശേഷം യുഡിഎഫ് സംസ്ഥാനത്ത് നേടിയ പടുകൂറ്റൻ വിജയം പ്രവർത്തകരിൽ വലിയ ആവേശം സൃഷ്ടിച്ചിട്ടുണ്ട്.
റെയിൽവേ സ്റ്റേഷന് പുറത്തെത്തിയ സതീശനെ പ്രവർത്തകർ പുഷ്പവൃഷ്ടിയോടെയാണ് വരവേറ്റത്. തുടർന്ന് കാറിന്റെ സൺറൂഫിലൂടെ പുറത്തേക്ക് വന്ന് അദ്ദേഹം പ്രവർത്തകരെ കൈവീശി അഭിവാദ്യം ചെയ്തു. ജില്ലയുടെ വിവിധ ഭാഗങ്ങളിൽ നിന്നുള്ള നൂറുകണക്കിന് പ്രവർത്തകർ ഒരേസമയം സ്റ്റേഷനിലേക്ക് എത്തിയതോടെ സൗത്ത് റെയിൽവേ സ്റ്റേഷൻ പരിസരം അക്ഷരാർത്ഥത്തിൽ കോൺഗ്രസ് കടലായി മാറി.
തിരഞ്ഞെടുപ്പിൽ യുഡിഎഫിനെ നയിക്കുന്നതിൽ നിർണ്ണായക പങ്കുവഹിച്ച നേതാവ് എന്ന നിലയിലാണ് സതീശന് ഇത്രയും വലിയൊരു സ്വീകരണം പാർട്ടി ഒരുക്കിയത്. സംസ്ഥാനത്ത് യുഡിഎഫ് ഭരണം ഉറപ്പായതോടെ പുതിയ സർക്കാരിന്റെ രൂപീകരണവുമായി ബന്ധപ്പെട്ട ചർച്ചകളിലേക്ക് മുന്നണി ഉടൻ കടക്കും.
Story Summary: UDF leader V.D. Satheesan received a massive welcome at Ernakulam South Railway Station following the alliance’s landslide victory in the 2026 Kerala Assembly elections. Hundreds of supporters from Congress, Youth Congress, and KSU gathered to cheer the leader, who addressed the crowd from his car’s sunroof.
