ന്യൂഡൽഹി: മുംബൈയിൽ വൻ അന്താരാഷ്ട്ര മയക്കുമരുന്ന് മാഫിയയെ തകർത്ത് നാർക്കോട്ടിക് കൺട്രോൾ ബ്യൂറോ. ഏകദേശം 1,745 കോടി രൂപ വിലമതിക്കുന്ന 349 കിലോഗ്രാം ഉയർന്ന നിലവാരമുള്ള കൊക്കെയ്ൻ എൻസിബി പിടിച്ചെടുത്തു. ഈ വൻ വിജയത്തിൽ എൻസിബി ടീമിനെ കേന്ദ്ര ആഭ്യന്തര മന്ത്രി അമിത് ഷാ അഭിനന്ദിച്ചു.(NCB busts major narcotics ring, cocaine worth ₹1,745 crore seized in Mumbai, says Amit Shah)
മയക്കുമരുന്ന് മാഫിയകളെ രാജ്യം നിർദ്ദയം അടിച്ചമർത്തുമെന്ന് എക്സ് പ്ലാറ്റ്ഫോമിലൂടെ അദ്ദേഹം വ്യക്തമാക്കി. മുംബൈയിൽ 1,745 കോടി രൂപയുടെ 349 കിലോഗ്രാം കൊക്കെയ്ൻ പിടിച്ചെടുത്ത് അന്താരാഷ്ട്ര മയക്കുമരുന്ന് സംഘത്തെ എൻസിബി തകർത്തിരിക്കുന്നു. ചെറിയൊരു ശൃംഖലയിൽ നിന്ന് തുടങ്ങി വൻ റാക്കറ്റുകളെ വലയിലാക്കുന്ന രീതിയുടെ ഉത്തമ ഉദാഹരണമാണിത്. ഈ വലിയ വിജയത്തിന് എൻസിബി ടീമിനെ അഭിനന്ദിക്കുന്നു, അദ്ദേഹം കുറിച്ചു.
അന്താരാഷ്ട്ര ഭീകരൻ ദാവൂദ് ഇബ്രാഹിമിന്റെ അടുത്ത അനുയായിയും മയക്കുമരുന്ന് കടത്തുകാരനുമായ സലിം ഡോളയെ തുർക്കിയിൽ നിന്ന് ഇന്ത്യയിലെത്തിച്ചതിന് തൊട്ടുപിന്നാലെയാണ് ഈ വലിയ മയക്കുമരുന്ന് വേട്ട നടന്നത് എന്നത് ശ്രദ്ധേയമാണ്. മയക്കുമരുന്ന് വിമുക്ത ഭാരതം എന്ന ലക്ഷ്യത്തിലേക്കുള്ള നിർണ്ണായക ചുവടുവെപ്പായിട്ടാണ് ഈ നീക്കത്തെ കേന്ദ്ര സർക്കാർ കാണുന്നത്.
